[1] Song-chú â, ngien Ngì pûn thiên lie̍t-khôi, chhîn-sṳ̂n kong-lìm ngìn-kiên! Kô-sân khon-tó Ngì chhiu voi pi̍t-pi̍t-chhat,
[2] chhiong fó-sêu châu-chhèu, chhiong lie̍t-fó chiông súi chú-kún. Khiù Ngì hiong Ngì ke thi̍t-ngìn hién-mìn Ngì ke miàng, sṳ́ van-koet chhai Ngì mien-chhièn pi̍t-pi̍t-chhat!
[3] Ngì yî-chhièn sṳt kong-lìm, cho án tet-ngìn-kiâng ke sṳ, he ngài-têu m̀-sṳt sióng-tó ke; kô-sân khon-tó Ngì chhiu pi̍t-pi̍t-chhat.
[4] Chhṳ-kú yî-lòi mò ngìn khon-ko, ya mò ngìn thâng-ko chhiong Ngì án-ngiòng ke sṳ̀n, m̀-sṳt yû khì-thâ ke sṳ̀n vi fu̍k-sṳ Kì ke ngìn cho-ko án-thai ke sṳ.
[5] Fôn-hí hàng-san, ki-tet Ngì kau-hiun ke, liá-chúng ngìn chang he Ngì oi chhîn-khiun ke ngìn; chúng-he, ngài-têu fam-chhui ngiâ Ngì fat-khién yí-kîn chhin kiú lé, ngài-têu ngióng yû khó-nèn tet-kiu nè?
[6] Ngài-têu lûng-chúng yû chhui, lièn ngài-têu ke hó hàng-vì ya chhiong ô-chô ke sâm-fu. Yîn-vi ngài-têu ke chhui, ngài-têu chhiong châu-thet ke su-ya̍p pûn-fûng chhôi-san.
[7] Mò ngìn hiong Ngì khì-tó; mò ngìn hiong Ngì khiù pông-chhu. Yîn-vi ngài-têu ke chhui, Ngì êm-mien m̀-tap ngài-têu; Ngì chiông ngài-têu fit-thet.
[8] Chúng-he Song-chú â, Ngì he ngài-têu ke Â-pâ. Ngài-têu chhiong nài, Ngì he sêu-fì sṳ̂-fu; ngài-têu chhiòn-phu he Ngì chhîn-sú chho ke.
[9] Song-chú â, khiù Ngì m̀-hó hiong ngài-têu thai fat-khién; khiù Ngì m̀-hó yún-yén ki-tet ngài-têu ke chhui. Ngài-têu chhiòn-phu he Ngì ke chṳ́-mìn; khiù Ngì khon-ku ngài-têu.
[10] Ngì sṳ̀n-sṳn ke sàng — Siak-ôn yí-kîn pien-cho khóng-yâ; Yâ-lu-sat-lâng yí-kîn sàng-cho fông-phû.
[11] Ke chui sṳ̀n-sṳn, chui chiâng ke sṳn-thien — ngài-têu ke chú-siên sṳt chhai ke-vi siung-chan Ngì ke só-chhai, yí-kîn pûn-ngìn sêu-thet lé. Ngài-têu só pó-pi ke thú-thi chhiòn-phu fông-thet lé.
[12] Song-chú â, fat-sên liá-têu sṳ-chhìn, Ngì hàn ngiûn tet-he̍t mò? Ngì hàn tiâm-tiâm, m̀ pông-chhu ngài-têu he-mò? Ngì pûn ngài-têu ke khú-nan ngióng án-tô nè?