[1] Ngâ-kok-kâ ke ngìn â, oi thâng liá-ke fa! Ngì-têu chhṳ̂n-cho Yî-set-lie̍t-ngìn, he Yù-thai ke chṳ́-sûn. Ngì-têu chṳ́ Song-chú ke miàng fat-sṳ, chhṳ-chhṳ̂n he kin-pai Yî-set-lie̍t ke Song-ti; khì-sṳ̍t ngì-têu mò sṳ̀n-sṳ̍t, ya mò chṳn-chhṳ̍t.
[2] Ngì-têu hàn láu-tó chhṳ-kâ he sṳn-sàng ke ngìn-mìn, só yí-kho ke he Yî-set-lie̍t ke Song-ti — Song-chú, Van-kiûn ke Ngièn-soi.
[3] Song-chú tui Yî-set-lie̍t kóng: Ngài chó chhiu yi-ngièn siên-chhièn ke sṳ; Ngài kóng-chhut choi, yu kóng-to mìn-mìn; to-sṳ̀ Ngài fut-yèn-kiên chhut-sú, sṳ́ ke-têu sṳ-chhìn vàn-sṳ̀n.
[4] Ngài tî ngì chhin ngang-hok, kiáng-kîn chhiong thiet, ngiak-thèu chhiong thùng án-ngang.
[5] Ngài chó chhiu yi-ngièn ngì ke chiông-lòi, chhai sṳ-chhìn fat-sên chhièn yí-kîn siên-pu, sṳ́ ngì cho-m̀-tet kóng liá-têu sṳ he ká-sṳ̀n cho ke, he ngì chhṳ-kâ tiâu-khiet lâu chu-chho ke ngiéu-siong só chu-thin ke.
[6] Ngài só yi-ngièn ke sṳ chhiòn-phu fat-sên lé; ngì oi sṳ̀n-ngin Ngài ke yi-ngièn chṳn-khok. Liá-ha Ngài oi lâu ngì kóng chiông-lòi ke sîn sṳ, he thèu-pái khong-tén ngì m̀-tî ke sṳ.
[7] Ngài to liá-ha chang sṳ́ liá-têu sîn sṳ fat-sên; liá-têu sṳ chhiùng-kú to-kîm ngì m̀-sṳt thâng-ko; só-yî ngì cho-m̀-tet kóng, ngì chó chhiu tî lé.
[8] Mò m̀-chho̍k, ngì mò thâng-ko; mò m̀-chho̍k, ngì pin m̀-tî; mò m̀-chho̍k, ngì ke ngí-kûng chhiùng-lòi m̀-sṳt tá-khôi. Ngài chó chhiu tî ngì ke kúi-cha; ngì yit chhut-se chhiu-he phoi-ngia̍k ke ngìn.
[9] Vi-tó oi sṳ́ ngìn chan-mî Ngài ke miàng, Ngài chhiam-sṳ̀ ngiûn-tén Ngài ke su-hi; Ngài khiòng-khiòng ngiûn-tén, mò-oi fí-me̍t ngì.
[10] Ngài sṳ-lien ngì, chúng-he mò chhiong chhai fó-lù chûng lien ngiùn-è; Ngài he yung khú-nan cho fó-lù lòi thon-lien ngì.
[11] Ngài án-ngiòng cho he vi-tó Ngài chhṳ-kâ. Ngài mò-oi pûn chhṳ-kâ ke miàng su-tó siet-thu̍k; Ngài thin-chho̍k m̀ chiông Ngài ke yùng-yeu kûi-pûn ká sṳ̀n.
[12] Ngâ-kok-kâ â, thâng Ngài kóng! Ngài só fû-seu ke Yî-set-lie̍t-ngìn â, oi thâng Ngài kóng! Ngài he Song-chú — thu̍k-yit vù-ngi ke Song-ti, Ngài he khôi-sṳ́ ke, ya he kiet-suk ke.
[13] Ngài chhîn-sú kien-li̍p thi ke kî-chhú; Ngài yung chṳn-sú chán-khôi thiên-khûng. Ngài seu-si̍p thiên lâu thi, thiên lâu thi chhiu ngiàm-sṳ̀ khî chhai Ngài mien-chhièn.
[14] Ngì-têu chhiòn-phu oi si̍p-ha̍p, lòi thâng Ngài kóng-fa! M̀-sṳt yû sṳ̀n-mìn yi-ngièn, Ngài só sién-li̍p ke ngìn voi kûng-kit Pâ-pí-lùn-ngìn; kì voi cheu Ngài ke chṳ́-yi chhai Pâ-pí-lùn hàng-sṳ.
[15] He Ngài tui kì kóng-fa, fû-seu kì; Ngài tai kì chhut-lòi, sṳ́ kì hîn-vong.
[16] Hàng-kiâm to Ngài mien-chhièn lòi, thâng Ngài kóng-fa! Ngài yit khôi-sṳ́ chhiu kûng-khôi hiong ngì-têu kóng-fa, yu sṳ́ Ngài ke fa ki-ki sṳ̍t-hien. Liá-ha Chṳ-kô ke Song-chú yí-kîn chiông Kì ke Lìn su-pûn ngài, chhâi-phai ngài.
[17] Yî-set-lie̍t sṳ̀n-sṳn ke Song-ti, chṳ́n-kiu ngì ke Song-chú án-ngiòng kóng: Ngài he Song-chú — ngì ke Song-ti; vi-tó ngì ke li-yit, Ngài kâu ngì; Ngài chṳ́-sṳ ngì yin-kôi hàng ke lu.
[18] Ngài ngióng-pân hî-mong ngì yit-chhṳ̍t thâng Ngài ke min-lin â! Na-he ngì thâng Ngài ke min-lin, phìn-ôn chhiu-chhiong hò-pa súi án-ngiòng, m̀-voi thôn-thet; kûng-ngi chhiu-chhiong hói-long án-ngiòng, yit-chhṳn yu yit-chhṳn chiap-tén lòi.
[19] Ngì ke chṳ́-sûn voi chhiong sâ-é án-tô; Ngài yún-yén m̀-voi pûn kì-têu ke miàng me̍t-thet.
[20] Ngì-têu oi tui Pâ-pí-lùn chhut-lòi! Tui Pâ-pí-lùn-ngìn tông-chûng lì-khôi! Thai-sâng fôn-hí lòi-po liá hó sêu-sit; to thiên-ngài hói-kok hi chhòn-yòng kóng: Song-chú yí-kîn chṳ́n-kiu Kì ke phu̍k-ngìn Yî-set-lie̍t!
[21] Song-chú tai-liâng Kì ke chṳ́-mìn hàng-ko sâ-mo̍k ke sṳ̀, kì-têu pin-mò hot-sí; yîn-vi Kì sṳ́ phàn-sa̍k liù-chhut súi lòi; Kì tá-lie̍t phàn-sa̍k, chhièn-súi chhiu yúng chhut-lòi.
[22] Song-chú kóng: Chok-ok ke ngìn m̀-voi yû phìn-ôn!