[1] Song-chú kóng: Hó-ngìn sí-thet, mò-ngìn piong chhai sîm-song; khièn-sṳ̀n ngìn ko-sṳ̂n, ya mò-ngìn liáu-kié, kì-têu sí-thet, fán-chón he thot-lì châi-fo.
[2] Hàng-vì chṳn-chhṳ̍t ke ngìn ko-sṳ̂n ke-sṳ̀, ôn-yèn soi chhai chhṳ-kâ ke mìn-chhòng, sṳ-sṳ̍t-song kì-têu he chin-ngi̍p phìn-ôn ke só-chhai.
[3] Chúng-he, ngì liá-têu ngìn chhiu-chhiong he siên-kû ke lai-é, kiên-fû, kî-ńg ke chṳ́-sûn. Hàng-khiûn lòi chiap-su sṳ́m-phan!
[4] Ngì-têu oi sâu-nat má-ngìn? Ngì-têu pien-kúi pien-koai oi met-sa má-ngìn? Ngì-têu kám m̀-he phoi-ngia̍k ngìn ke heu-thoi, lau-é ke chṳ́-sûn?
[5] Ngì-têu chhai siong-su chûng-kiên, chhai tak-thèu thai-su hâ hàng kiên-yìm, pai fàn-chhṳ̍t ke sṳ̀n-mìn! Ngì-têu chhai sân-lak chûng ke sa̍k-lùng tú chiông chhṳ-kâ ke se-ngìn-è chhṳ̀-lòi hien-chi.
[6] Ngì-têu pai sân-lak chûng kông-va̍t ke sa̍k-thèu, hien-chiú cho chi-chiú, yu hien su-chi. Liá-têu sṳ oi ham Ngài ngióng-pân ngiûn-su?
[7] Ngì-têu sông-to kô-sân táng hàng kiên-yìm, yu chhai ke-vi hien-chi.
[8] Ngì-têu chhai chhṳ-kâ vuk-tú ke thai-mùn lâu mùn-khiông heu-poi ôn ngoi-pâng sià-yìm ke ki-ho. Ngì-têu chhiu-chhiong phoi-tén Ngài, thot-kông sâm-fu, sông thai mìn-chhòng, lâu fâ-chhièn seu-lòi ke chhìn-ngìn soi-muk. Ngì-têu thâm-lien kì-têu ke mìn-chhòng, lòi mân-chiuk chhṳ-kâ ke yu̍k-mong.
[9] Ngì-têu hàn tai hiông-yù hi pai Mô-lo̍k-sṳ̀n, yu hien chhin-tô hiông-liau, ya phai sṳ́-chá to yén-yén ke só-chhai hi, sṳm-chṳ to yîm-kiên hi chhìm sṳ̀n-mìn.
[10] Yîn-vi lu-thù tông-yén, ngì-têu kám-kok tông-khioi tông-thiám, hàn-he m̀ sí-sîm. Ngì-têu láu-tó chhìm liá-têu sià-sṳ̀n voi pûn ngì-têu tet-tó hi-li̍t, ngì-têu chhiu m̀-voi án-thiám.
[11] Ngì-têu kiâng má-ngìn? Ngì-têu yîn-vi kiâng sṳ̀n-mìn sa lòi tui Ngài kóng fâ-liâu, m̀ ki-tet Ngài, ya mò chiông Ngài piong chhai sîm-song. He m̀-he yîn-vi Ngài tui ngì-têu tiâm-tiâm án-kiú, ngì-têu chhiu m̀ kiâng Ngài?
[12] Ngì-têu sa láu-tó chhṳ-kâ cho tông-chho̍k. Ngài oi chṳ́-chhut ngì-têu só-cho ke chhui-ok, ngì-têu pai ngiéu-siong tui chhṳ-kâ mò pan-si̍t pông-chhu.
[13] Ngì-têu khiù pông-chhu ke sṳ̀, khon ke-têu sû-lòi ke ngiéu-siong voi lòi kiu ngì-têu mò! Khì-sṳ̍t, yit-chhṳn fûng chhiu voi chiông kì-têu chhôi-chéu, yit-héu hi chhiu voi chiông kì-têu phùn-chéu! Chúng-he ke-têu sin-kho Ngài ke ngìn voi sṳ̀n-chiap liá-te thú-thi; kì-têu voi tet-tó Ngài ke sṳn-sân cho sán-ngia̍p.
[14] Song-chú kóng: “Thi oi thùn-kô, lu oi cháng hó-se, vi Ngài ke chṳ́-mìn chhîn-chhù chha-lu ke tûng-sî!
[15] “Ngài he chṳ-kô vù-song, yún-yén chhùn-chhai, sṳ̀n-sṳn ke Song-ti. Ngài he̍t chhai chṳ-kô sṳ̀n-sṳn ke só-chhai, ya he̍t chhai chṳ̂n-sîm fí-kói lâu khiâm-pî ke ngìn tông-chûng. Ngài sṳ́ khiâm-pî ke ngìn fî-fu̍k sin-sîm, sṳ́ chṳ̂n-sîm fí-kói ke ngìn chhùng-sîn tet-tó hî-mong.
[16] Ngài m̀-voi yún-yén chit-phi, ya m̀-voi yún-yén fat-khién; yîn-vi Ngài na án-ngiòng cho, Ngài chho ke chṳ́-mìn yit-thin voi chhai Ngài mien-chhièn me̍t-thet.
[17] Ngài hiong kì-têu fat-khién, yîn-vi kì-têu thâm-sîm fam-chhui; só-yî Ngài êm-tén mien chit-fa̍t kì-têu. Kì-têu hàn-he ngang-kiáng, ki-siu̍k hàng chhṳ-kâ ke lu.
[18] “Ngài yû khon-tó kì-têu ke hàng-vì, chúng-he Ngài hàn-he oi yî-chhṳ kì-têu. Ngài oi tai-liâng kì-têu, pûn kì-têu chhùng-sîn tet-tó ôn-ví; ke sông-sîm ke ngìn choi-sùn voi fat-chhut chan-mî.”
[19] Song-chú kóng: “Phìn-ôn! Phìn-ôn! Mò-lun yén-khiûn ke ngìn, Ngài oi su kì-têu phìn-ôn; Ngài oi yî-chhṳ kì-têu.
[20] Chúng-he fái-ngìn chhiong mò phìn-chhin ke hói-mien, yû tet-ngìn-kiâng ke thai hói-long; kì-têu ke ngìn-sên yúng-chhut lá-sap lâu ô-chô ke tûng-sî.”
[21] Ngài ke Song-ti kóng: “Chok-ok ke ngìn m̀-voi yû phìn-ôn!”