[1] Sâ-mo̍k lâu hôn-thi voi fôn-hí khoai-lo̍k; khóng-yâ khôi-mân mòi-kui-fâ.
[2] Sâ-mo̍k fâ-fâ liu̍k-liu̍k, van-chṳ́ chhiên-fùng, thai-sâng fôn-hí chhong-kô. Kì voi chhiong Lì-pâ-nun ke yùng-kông, chhiong Kâ-me̍t lâu Sâ-lùn án-chiâng. Tak-ke ngìn voi khon-tó Song-chú ke yùng-kông, khon-tó ngài-têu Song-ti ke vî-ngiàm.
[3] Ngì-têu oi sṳ́ ngiôn-ngio̍k ke sú yúng-khien, sṳ́ mò-li̍t ke chhit-thèu kiên-khiòng hí-lòi.
[4] Oi lâu mò-tám ke ngìn kóng: “Oi kiên-khiòng, m̀-sṳ́ kiâng! Song-ti oi lòi chṳ́n-kiu ngì-têu; Kì oi vi ngì-têu po-sù.”
[5] Ke-sṳ̀, mô-muk ke voi khon tet-tó, ngí-lûng ke voi thâng tet-tó,
[6] pâi-kiok ke voi chhiong lu̍k-é thiau-vú, á-khiéu voi thai-sâng chhong-kô. Khóng-yâ voi yúng-chhut chhièn-súi; sâ-mo̍k voi yû hò-pa.
[7] Voi lu̍k ngìn ke sâ-phû voi pien-sṳ̀n pî-thòng; hôn-thi voi yû súi-ngièn. Yâ-kiéu soi ke só-chhai, voi sâng-chhut chhiâng-chhó, lù-chuk lâu phû-chhó.
[8] Voi yû yit-thiàu thai-lu, oi chhṳ̂n-cho “Sṳn-kiet ke Lu”. Mò chhiang-li ke ngìn cho-m̀-tet hàng liá-thiàu lu, oi chôn-mùn pûn Song-ti ke chṳ́-mìn hàng; lu-hong ke lî-hak, sṳm-chṳ ngong-tong ngìn, ya m̀-voi hàng chhâ-lu.
[9] Ke só-chhai mò sṳ̂-é, ya mò yâ-chhu. Chṳ́-yû Song-chú chṳ́n-kiu ke ngìn, chhai liá-thiàu thai-lu hong hàng.
[10] Song-chú kiu-su̍k ke ngìn yit-thin voi chón-lòi; kì-têu voi khoai-lo̍k thai-sâng chhong-kô, fôn-fôn hí-hí lòi-to Siak-ôn. Kì-têu voi yún-yén fôn-hí khoai-lo̍k, m̀-voi chai yù-sèu than-sit.