[1] Vû-sî-ngâ-vòng ko-sṳ̂n ke-ngièn, ngài khon-tó Chú kô-kô chhô chhai pó-chho, Kì ke chhòng-phàu sâm-kî châ-koi kûi-chho sṳn-thien.
[2] Chhai Kì chû-vì yû thiên-sṳ́ Sat-lâ-fut sṳ-fung, tak-ke yû liuk-chak yi̍t-kap: Lióng-chak châ-mien, lióng-chak châ-kiok, lióng-chak yung-lòi pî ke.
[3] Kì-têu yû-têu chhong, yû-têu fò, kóng: “Sṳn-châi, sṳn-châi, sṳn-châi! Song-chú — Van-kiûn ke Ngièn-soi! Kì ke yùng-kông chhûng-mân chhiòn sṳ-kie.”
[4] Kì-têu chhong-fò ke sâng sṳ́ mùn-chhû ke kîn-kî chṳ́n-thung; sṳn-thien tú chhiu chhûng-mân mùng-yên.
[5] Ngài kóng: “Ngài chhám lé! Ngài voi sí lé! Yîn-vi ngài he kóng-fa mò chhiang-li ke ngìn; ngài ya he̍t chhai kóng-fa mò chhiang-li ke ngìn tông-chûng; yu yîn-vi ngài hàn chhîn-ngién khon-tó kiûn-vòng — Song-chú, Van-kiûn ke Ngièn-soi!”
[6] Só-yî, yû yit-ke thiên-sṳ́ Sat-lâ-fut hiong ngài pî ko-lòi, nâ-tén yit-kî fó-khiàm, kia̍p-tén chi-thàn táng sêu-chho̍k ke fó-than,
[7] kì chiông fó-than tut ngài ke choi-sùn, kóng: “Khon nâ, liá-te fó-than tut ngì ke choi-sùn, ngì ke ko-fam chhiòn-phu chhù-thet lé; ngì ke chhui chhiu sa-miên lé.”
[8] Yèn-heu, ngài thâng-tó Chú kóng: “Ngài cho-tet chhâi-khién má-ngìn? Má-ngìn hén thoi ngài-têu hi nè?” Ngài en-kóng: “Ngài lòi-hi! Chhiáng chhâi-khién ngài!”
[9] Só-yî, Kì kóng: “Ngì hi lâu liá-ke chṳ́-mìn kóng: Ngì-têu thâng-liáu yu thâng, chúng-he m̀-voi ngi̍p-ngí; khon-liáu yu khon, chúng-he m̀-voi liáu-kié.”
[10] Chiap-tén, Kì tui ngài kóng: “Oi pûn liá chṳ́-mìn ke sîm chhin thun, ngí-kûng poi-poi, muk-chû sap-sap. Na-m̀-he án-ngiòng, kì-têu ke muk-chû voi khon tet-tó, ngí-kûng voi thâng-tet ngi̍p-ngí, sîm ya voi mìn-pha̍k, kì-têu chhiu voi fì-sîm chón-yi, lòi tet-tó yî-chhṳ.”
[11] Ngài mun: “Chú â, án-ngiòng ke chhìn-hìn oi kí-kiú nè?” Kì en-kóng: “Chhṳ̍t-to sàng-sṳ fí-me̍t, mò-ngìn he̍t, vuk-è khûng-khûng, thú-thi chhiòn-phu fông-thet.
[12] Ngài — Song-chú oi chiông ngìn-mìn sái-to yén-fông hi, thai phu-fun ke thú-thi voi mò-ngìn yung.
[13] Na-he koet-nui hàn-yû sṳ̍p-fûn chṳ̂-yit ke ngìn, ya voi pûn-ngìn sêu-me̍t; kì-têu voi chhiong siong-su pûn-ngìn chám-thet, chhûn-tó su-thèu thin-thin. Liá su-thèu thoi-péu Ngài ke chṳ́-mìn sîn ke khôi-sṳ́.”