[1] Song-chú kóng: Pâ-pí-lùn â, hâ-lòi! Tui ngì ke pó-chho táng hâ-lòi! Chhô chhai thi-mien ke chhṳ̀n-fôi táng. Thèu-pái ngì chhiong màng chhut-ka ke se-moi-é, he mò-ngìn cham-liâng ko ke sàng. Chúng-he, ngìn m̀-voi chai kóng ngì he vûn-yù yu-siu ke; ngì yí-kîn sàng-cho ngìn ke nù-chhòi!
[2] Ngì oi súng mo-sa̍k, mo mien-fún! Nâ-thet mien-sâ! Lâi-hí chhòng-khiùn, lu-chhut kiok-pí lòi-ko hò-pa!
[3] Ngìn voi khon-tó ngì chhak-sṳ̂n lu-thí, khon-tó ngì ke kien-seu. Ngài oi po-fu̍k; mò-ngìn nèn chú-tóng Ngài.
[4] Yî-set-lie̍t sṳ̀n-sṳn ke Song-ti kiu-su̍k ngài-têu; Kì ke miàng he Song-chú — Van-kiûn ke Ngièn-soi!
[5] Song-chú tui Pâ-pí-lùn kóng: Put-chún ngì chhut-sâng, hi chhô chhai vû-am chûng! M̀-voi chai yû-ngìn chhṳ̂n ngì cho “Van-koet ke vòng-heu”.
[6] Ngài sṳt tui Ngài ke chṳ́-mìn fat-khién, sṳ́ Ngài ke sán-ngia̍p su vú-yu̍k. Ngài sṳt chiông kì-têu kâu chhai ngì ke sú-chûng; ngì tui kì-têu chhiòn mò lìn-mén, lièn ló-ngìn-kâ ngì ya chiông chhin-chhûng ke tâm-thèu piong chhai kì-têu sṳ̂n-hong.
[7] Ngì láu-tó cho-tet yún-yén cho vòng-heu, mò chiông liá-têu sṳ piong chhai sîm-song, ya mò sióng liá-têu sṳ ke kiet-khiu̍k.
[8] Ngì liá hau hióng-lo̍k ke ngìn â, liá-ha oi thâng Ngài kóng! Ngì láu-tó ngì ke thi-vi kiên-ku; ngì ngin-vì chhṳ-kâ lâu Song-ti khiung-yong ví-thai, ngì láu-tó mò-ngìn nai-tet ngì hò. Ngì kóng chhṳ-kâ m̀-voi sàng-cho koá-fu, ya m̀-voi sóng-thet chṳ́-ńg.
[9] Mò sióng-tó, yû yit-ngit fut-yèn kiên, liá lióng-yong sṳ chhiòn-phu voi fat-sên. Mò-lun ngì yung má-ke sià-su̍t, ngióng-pân va̍k-fù ngiam-chu, ngì hàn-he voi sí chṳ́-ńg, cho koá-fu!
[10] Ngì tông yû chhṳ-sin, lon-lòi lon-cho, láu-tó mò-ngìn khon-tó ngì cho fái-sṳ. Ngì pûn chhṳ-kâ ke chhûng-mìn lâu chṳ-sṳt hoi-tó. Ngì ngin-vì chhṳ-kâ lâu Song-ti khiung-yong ví-thai, ngì láu-tó mò-ngìn nai-tet ngì hò.
[11] Chúng-he, châi-fo voi kong-to ngì sṳ̂n-song lé, sià-su̍t kiu ngì m̀-tó; châi-nan voi lìm-to ngì thèu-nà táng lé, ngì ngiam-chu ya mò fap-thu sêu-châi. Ngì mò sióng-tó ke sṳ̀, fí-me̍t fut-yèn-kiên voi lìm-to!
[12] Cho ngì ki-siu̍k yung sià-su̍t â! Cho ngì ki-siu̍k va̍k-fù ngiam-chu â! Ngì tui heu-sâng ke sṳ̀ chhiu yung-koan lé, khó-nèn liá-têu tui ngì hàn yû-yung, cho-tet nâ-lòi hak ngì ke sù-thi̍t.
[13] Ngì cho án-tô ke kie-va̍k he kâ-thiám thin-thin; pûn ke-têu khon thiên-siong lâu sên-siuk ke lòi kiu ngì kha-yàng nâ! Kì-têu kám m̀-he chhai tak-chak ngie̍t-thèu hiong ngì po-ko, lâu ngì kóng voi fat-sên ke sṳ?
[14] Khon â, kì-têu voi chhiong vò-kón án-ngiòng, yit-chhṳn fó chhiu sêu chhiang-chhiang. Kì-têu lièn chhṳ-kâ ya kiu m̀-tó; liá fó chhie̍t-tui m̀-he chhiong phoi-sêu ke fó-than-fó, ya m̀-he ngìn cho-tet chhô chhai sùn-thèu ke se fó.
[15] Ngì yit-sên-ngìn vá-kho sên-siong-kâ ke kie-mèu; kì-têu fán-chón hoi ngì hàng sí-lu. Kì-têu sùi-ngìn chhìm-chhut lu chéu lé, yit-ke ya mò liù hâ-lòi kiu ngì.