[1] ¡Tatitux Reyiwa! ¡Reyi qunuñapax querubines sat chhiqhaninakxar utt'atawa! Markanakax khathatipxpan, taqpach uraqis unxtarakpan.
[2] Tatitux Jerusalén markan ch'amaniwa, taqpach markanakxar qunt'atawa.
[3] Axsarkañ sutipax jach'añchatäpan; ¡Tatitux qullanawa!
[4] Jumax ch'aman reyïtawa; aski kankañar munasirïtawa; jumaw chiqap sarnaqañ uñstaytaxa. Jumaw Jacobun wawanakaparux sum uñjtaxa, chiqaparuw taqi kuns tariptaxa.
[5] ¡Tatit Diosasar jach'añchapxam, kayunakap nayraqatar killt'asipxam! ¡Tatitux Qullanawa!
[6] Moisesampi Aaronampix jupan sacerdotenakapänwa; Samuel profetax jupan luqtiripänwa. Jupanakax Tatituruw yanap mayipxäna, Tatitusti mayitanakaparux ist'änwa.
[7] Diosax qinay taypitpach jupanakarux parläna, kamachi arunakap churäna jupanakasti uka arunakap phuqhapxäna.
[8] Tatay, Diosaxay, jupanakarux ist'äyätawa, ñanqha luratanakapat t'aqhisiykchïyät ukasa, jupanakatakix juchat pampachir Diosäyätawa.
[9] Tatit Diosasar yupaychapxam, ¡qullan qullup nayraqatar killt'asipxam! ¡Tatit Diosasax Qullanawa!