<Salmos 119

[1] Jan juchañchkay sarnaqir jaqix kusisiñaniwa, Tatitun yatichäwiparjam sarnaqirix kusisiñaniwa.

[2] Tatitun arunakapar jaysirinakax kusisiñaniwa, taqpach chuymamp jupar thaqhirinakax kusisiñaniwa,

[3] jan kuna ñanqha luririnakasa, Tatitun thakhipan sarnaqirinakas kusisiñaniwa.

[4] Jumaw arsutanakam yatiytaxa, arunakamax sum phuqhatäñapataki.

[5] ¡Sarnaqäwixax thuruñchatakïspa, arunakam phuqhañaxataki!

[6] Janiw kunat p'inqa tukuñaxas utjkaniti, taqpach arsutanakam phuqkä ukapachaxa.

[7] Chiqa chuymampiw jumar jach'añchäma, chiqap arsutanakam yatiqkä ukapachaxa.

[8] ¡Kamachinakam phuqhañ munta! ¡Janipun armanukusistati!

[9] ¿Kunjämatarak mä waynasti q'uma jakañanïspasti? Arunakamarjam sarnaqasaki.

[10] Taqpach chuymaxampiw thaqsma, janikiy arunakamat saraqtañax munamti.

[11] Chuymaxaruw arunakam imta, juma nayraqatan juch jan lurañataki;

[12] ¡Tatay, jumax qullanätawa! ¡Kamachinakamay yatichita!

[13] Lakaxampiw yatiyä, juman taqpach arsut kamachi arunaka.

[14] Arunakamarjam sarnaqañ thakhin kusisï, qamir yänakampi kusisiñat sipana.

[15] Arsutanakamat lup'isï, thakhiman sarnaqañ amuyt'arakï.

[16] Kamachi arunakamampiw kusisï, janipuniw arunakamat armaskäti.

[17] ¡Aka uywatamarux jakayakimaya! ¡Nayasti arunakamarux phuqhapunïwa!

[18] Nayranakaxay jist'arita, muspharkañ yatichäwinakam uñxatañataki.

[19] Aka uraqin sart'ir jaqikïtwa; janikiy kamachi arunakam nayatak imantamti.

[20] Ajayuxax wali llakt'ataw uñjasi, arsutanakam yatiñ munasa.

[21] Jumaw jach'a jach'a tukurinakarux tuqinuqtaxa, arsutanakamat saraqapxatap layku.

[22] Llakinakampi, jisk'achañanakampi nayat jithiqtayita, kamachi arunakam phuqhatax layku.

[23] Jilïr jaqinakas nayatak arusipkanixa, uywatamax arunakamat lup'iskakiniwa.

[24] Arunakamax nayan kusisiñaxawa, arsutanakamax nayan amuyt'ayirixawa.

[25] Niy jiwirjamätwa, ¡arsutamarjamay jakañ churita!

[26] Sarnaqäwix uñacht'aysma, jumasti ist'istawa. ¡Kamachi arunakamay yatichita!

[27] Arsutanakamarjam arkañatak amuyt'ayita, muspharkañ luräwinakamat lup'iñ munta.

[28] Jach'a jachañan uñjasta; ¡arsutanakamampiy chuymacht'ita!

[29] K'arisiñat jithiqtayita, arunakamay yatichita.

[30] Chiqa thakhin sarnaqañ ajllista, arunakamaruw munasta.

[31] Tatay, arsutanakamaruw iyawsta; ¡janikiy p'inq tukuyistati!

[32] Arsutanakam phuqhañatakix jank'akïtwa, chuymaxarux kusisiñampiw phuqt'ista.

[33] Tatay, kamachiman thakhipay uñacht'ayita, nayasti tukuykamaw arkä.

[34] Yatichäwinakam phuqhañatak suma amuyuy churita; ¡taqpach chuymampiw arunakam imä!

[35] Arsutanakaman thakhipanay irpita, ukankiw nayan kusisiñaxaxa.

[36] Arsutanakamaruy chuymax alkatayita, janikiy inampst'añar puriyistati.

[37] Janikiy k'ari diosanakar uñtayistati; ¡thakhiman sarañatak jakañ churita!

[38] Uywatamarux arsutam phuqhakimaya, iyawsirinakamar arsut arunaka.

[39] Axsarayir llakisiñ nayat apaqt'ita, arsutanakamax munasiñ arunakawa.

[40] Nayaw arsutanakamarux munasta; ¡aski kankañamampiy jakañ churita!

[41] Tatay, khuyapayasiñamay uñacht'ayita, qhispiyäwimax arsutamarjamay purinitpan.

[42] Ukhamat nayar tuqirirux kutkatasï, arunakamar taqi chuymamp iyawsatax layku.

[43] Janikiy lakaxat chiqa arunak apaqistati, nayax arunakamaruw chuymax uchta.

[44] ¡Jan inakt'asaw yatichäwim phuqhä, wiñayapuniw munañamar jaysä!

[45] Ukhamat jan khitin kamsat jakä, arsutanakamar arkatax layku.

[46] Reyinakan nayraqatapan arunakamat parlä, janipuniw arsuñ p'inqaskäti.

[47] Arunakamarux munastwa, arunakamampix kusisitaw uñjasta.

[48] Arunakamarux munastwa, arsutanakamatsti walpun lup'ista.

[49] Uywatamar arsutamat amtasikimaya: arunakamaruw suyt'äwi uchayista.

[50] Llakisiñaxan chuymachasiñax akawa: arunakamaw jakañ churitu.

[51] Jach'a jach'a tukurinakax jan inakt'asaw tuqipxitu, nayasti janiw yatichäwimat saraqaskti.

[52] Tatay, nayra pacha arsutanakamat amtasta, uka arunakaman chuymachasiñ jikxatta.

[53] Arunakam jaytanukur ñanqha luririnakatakix chuymaxax walpun q'apisi.

[54] Jaqin markapan jakasax arunakamax nayan q'uchuxänwa.

[55] Tatay, arumanakaw jumat amtasta; ¡yatichäwimarjam phuqhañ munarakta!

[56] May lurañaxaw wakt'itu: ukasti arsutanakam phuqhañawa.

[57] Tatay, jumakiw nayatakix utjarapistaxa, arunakam phuqhañatakiw arsta.

[58] Taqpach chuymampiw jumarux ist'añ thaqta; arsutamarjamay khuyapt'ayasita.

[59] Sarnaqäwixaruw uñakipasta, arunakamarusti wasitat jaysta.

[60] Jank'akiw sartasta, jan suyasarakiw arsutanakam phuqta.

[61] Ñanqha lurir jaqinakax sipitanakampiw muyuntayapxitu, nayasti janiw yatichäwimat armaskti.

[62] Chika arumaw jumar yuspagarañatak sarthapta, chiqa arunakamat jumar yuspagarañataki.

[63] Jumar iyawsir jaqinakampiw chikachasta, arsutanakam phuqhirinakampiw mayachasirakta.

[64] Tatay, akapachax munasiñamampi phuqhantatawa; ¡kamachinakamay yatichita!

[65] Tatay, aka uywatamarux askinakpun churtaxa, arsutanakamarjamaw uñjtaxa.

[66] Suma amuyt'a chuymay churita, yatiñ kankañ churarakita, arsutamarux taqpach chuymampiw iyawsta.

[67] Janïr t'aqhiskasax pantjataw sarnaqäyäta, jichhasti arunakamarjamaw sarnaqta.

[68] Jumax askïtawa, aski luraraktaxa; kamachinakamay yatichita.

[69] Qhuru jaqinakax ina ch'usat k'arintapxitu, nayasti taqpach chuymampiw arsutanakam phuqta.

[70] Jupanakan amuyt'anakapax ch'amakt'atawa, nayasti yatichäwimampiw kusista.

[71] T'aqhisitaxax aski apanirapitu, ukhamat kamachinakam yatiqta.

[72] Yatichäwinakamaw nayatakix taqi kunatsa askixa, waranq waranqa qurit sipansa, qullqit sipansa.

[73] Jumaw nayarux irnuqista, sayt'ayarakista; ¡arsutanakam yatiqañaxatak ch'ikhi chuymay churita!

[74] Iyawsirinakamax nayar uñjasax kusisipxaniwa, arunakamar taqi chuymamp suyatax layku.

[75] Tatay, arsutanakamax chiqapawa, ukarjamaw nayarux t'aqhisiyista.

[76] ¡Munasiñamax chuymachitpan, nayatak arskäyätax ukarjam phuqhasiñapataki!

[77] Khuyapayasiñam uñacht'ayita, jakañ churarakita, yatichäwimampix wali kusisitätwa.

[78] Qhuru jaqinakax p'inqachatäpxpan, nayar ina ch'usat t'aqhisiyapxatapata, nayasti kamachi arunakamat lup'ï.

[79] Iyawsirinakamax nayamp tantachasipxpan, arsutanakam uñt'irinakax nayamp chikachasipxpan.

[80] Chuymaxax kamachinakamarjam phuqhirïpan, ukhamat p'inqa jan tukuskañaxataki.

[81] Qhispiyäwim suykasaw tukusiskta; ¡arunakamaruw taqi chuymamp iyawsta!

[82] Nayranakaxax juykhuptaskiwa arsutam phuqhasiñap suykäwixa, ukchañkamasti sismawa: “¿Kunapacharak chuymachir jutitätasti?” sasa.

[83] Nayax armanukut jan yäqkañ ch'ama qaritäktsa, janiw kamachi arunakamat armaskti.

[84] ¿Kunapachkamarak suyästi? ¿Kunapacharak arknaqirinakaxar taripätasti?

[85] Qhuru jaqinakax yatichäwim jan yatkasaw sipit p'iyanak allirapipxitu.

[86] Ina ch'usat arknaqapxitu, arxatakitaya, ¡Taqpach arsutanakamax chiqapawa!

[87] Niyapuniw aka uraqit chhaqtayat uñjasta, nayasti janiw arunakamat armaskti.

[88] Munasiñam laykuy jakañ churita, nayasti arsutanakam phuqhä.

[89] Tatay, arunakamax wiñayawa; ¡alaxpachat juk'amp suma thurt'atawa!

[90] Chiqa kankañamax wiñayan wiñayapatakiwa; juman lurat uraqix jan unxtkiriwa.

[91] Arunakam laykuw taqi kunas jichhürkam utjaski, taqi luratanakax jumar luqtiriwa.

[92] Janitix yatichäwinakamax nayar kusisiykitasapänxa, niyaw llakisiñaxampi tukusiriskäyäta.

[93] Janipuniw arunakamat armaskäti, arunakamampiw nayarux jakayista.

[94] ¡Nayax jumankirïtwa, qhispiyasikitaya, arunakamarjamaw sarnaqta!

[95] Ñanqha lurir jaqinakax tukjañatakiw suyxatapxitu, ukampis nayax arunakamat lup'iskta.

[96] Taqi kunan tukusirïtap uñjta, kamachi arunakamasti jan tukuskiriwa.

[97] ¡Yatichäwimarux walpun munasta! ¡Sapüruw ukxat lup'iskta!

[98] Kamachi arunakamax nayamp chikt'atapuniwa; timanakaxat sipansa juk'amp yatiñan tukuyitu.

[99] Taqpach yatichirinakaxat sipan juk'amp amuyta, arunakamat wal lup'itax layku.

[100] Chuyman jaqinakat sipan juk'amp amuyta, arunakamarjam sarnaqatax layku.

[101] Arunakamarjam sarnaqañatakix taqi jan walinakat jithiqtasta.

[102] Janiw kamachi arunakamat saraqkti, jumaw nayarux yatichasista.

[103] Arunakamax nayatak wali muxsawa: misk'it sipan juk'amp muxsawa.

[104] Arunakaman yatiñ kankañ jikxatta, ukat k'ari sarnaqañarux uñista.

[105] Arunakamax sarnaqäwixatak mä qhanawa, thakhixan qhantirirakiwa.

[106] Juramento lurta, uksti phuqhapunïwa: ¡chiqa arunakamarjamaw sarnaqä!

[107] Tatay, wali llakt'ataw jikxatasta; ¡arsutamarjamay jakañ churita!

[108] Tatay, arsutanakaxax jumatak askïpanaya, kamachi arunakamay yatichita.

[109] Jakañaxax jiwañ chijir jalantañampiwa; nayasti janiw yatichäwinakamat armaskti.

[110] Ñanqha lurir jaqinakax sipitanak ucharapipxitu, nayasti janiw arsutanakamat saraqaskti.

[111] Arunakamax nayatak wiñay katuqäwiwa, arsutanakamax chuymaxaruw kusisiyi.

[112] Taqpach chuymampiw kamachinakamarjam sarnaqañatak arsta, wiñayataki, tukuykam phuqhañatakiw arsurakta.

[113] Qhipäxat uñisisir jaqinakar uñistwa, yatichäwinakamarusti munastwa.

[114] Jumaw imantasiñaxätaxa, jark'aqasiñaxätasa; arunakamaruw taqpach chuymax katuyta.

[115] ¡Ñanqha lurir jaqinaka, nayat saraqapxita, Diosaxan arsutanakap phuqhañ munta.

[116] Arsutamarjamay ch'am churita, ukhamat nayax jakä; ¡janikiy inamay suyayistati!

[117] Yanapt'itaya, nayasti qhispiyataw uñjasï, jan qarjasisaw kamachi arunakam phuqhä.

[118] Jumax kamachi arunakamar jisk'achirinakarux apanuktawa, amtäwinakapax jan amuyt'an amuyunakawa.

[119] Ñanqha luririnakax jumatakix q'añu t'unar uñtatawa, ukat nayax kamachi arsutanakamar munasta.

[120] Janchixax nayraqataman axsarañat khathati; ¡kamachi arunakam laykuw chuymax alt'ayta!

[121] Janipuniw chiqapäk uk lurañ jaytanukkäti; janikiy t'aqhisiyirinakaxan amparaparux antutistati.

[122] Jumakiy kusisit jakayita; janikiy qhuru jaqinakax t'aqhisiyitpati.

[123] Nayranakaxax qhispiyäwim suykäwiw juykhupti, arunakamarjam qhispiyañam suyaskta.

[124] Aka uywatamarux khuyapayasiñampiy uñjam; ¡kamachi arunakamay yatichita!

[125] Nayax juman luqtirimätwa. Amuyt'a kankañay churita, arsutanakam yatiñ munta.

[126] Tatay, urux purinxiwa, wakisxiw kun lurañamasa, arunakamarux janiw ist'añ munapkiti;

[127] nayasti arunakamarux munastwa, jila alan qurit sipana.

[128] Ukat arsutanakamarjamax sarnaqta, k'ari sarnaqañarusti uñistwa.

[129] Arsutanakamax muspharkañawa, ukat arunakamar jaysta.

[130] Arunakaman qhanañchäwipax amuyt'ayituwa, pisi amuyt'aninakarux amuyt'ayiwa.

[131] Jank'akiw lakax jist'arta, kamachi arunakam yatiñ layku.

[132] Nayarux uñtanxakitaya, khuyapayasirakita, jumar munasirinakar uñjktas ukhamay uñjita.

[133] Arunakamarjam sarnaqayita; janikiy kuna ñanqhas nayar atipitpati.

[134] Jaqinakan t'aqhisiyañapat qhispiyita, nayasti arunakamarjam phuqhañ munta.

[135] Uywatamarux khuyapayasiñampiy uñtanim, kamachi arunakamay yatichita.

[136] Umjamaw jachax nayranakaxat warasi, yatichäwiman jan yäqatätap layku.

[137] Tatay, jumax askïtawa; kamachi arunakamax chiqapawa.

[138] Taqpach arsutanakamax chiqapa, askirakiwa.

[139] Arunakamar munañaw taqi kun armayitu, uñisirinakaxax arunakamat armt'asipxi.

[140] Arsutamax wali yant'ataw uñjasi; uywatamasti arsutamaruw munasi.

[141] Jan yäqatakïtwa, jisk'achatarakïtwa, ukampis janiw arunakamat armaskti.

[142] Chiqapar uñjañamax askiwa, yatichäwimasti chiqaparakiwa.

[143] Llakisiñanakampi jan walt'añanakampiw katuntitu, arunakamasti kusisiyituwa.

[144] Arsutanakamax chiqapapuniwa; amuyt'a kankañay nayan jakañaxatak churita.

[145] Tatay, taqpach chuymaxampiw art'asinsma; ¡ist'akitaya, kamachinakam phuqhañ munta!

[146] Jumaruw art'asinsma, yanapt'akitaya, kamachi arunakamarjam phuqhañaxataki.

[147] Janïr qhanjtankipan jumat yanap maysma; arsutamaruw suyt'añax katuyta.

[148] Janïr ch'amakthapkipan arsutamxat lup'iñatak wakichasta.

[149] Tatay, munasiñam laykuy aruxar ist'am; chiqa kankañamarjamay jakañ churita.

[150] Qhuru arknaqirinakaxax jak'ankiwa, jupanakasti yatichäwi arunakamat jayankapxiwa.

[151] Jumasti Tatay, jak'ankasktawa, taqpach kamachi arunakax chiqapapuniwa.

[152] Nayratpach arunakam yatta, wiñay utt'ayat arunakama.

[153] T'aqhisitax uñtanikitaya, qhispiyarakitaya, janiw arunakamat armaskti.

[154] Nayat arxatasikitaya, qhispiyarakitaya; arsutamarjamay jakañ churita.

[155] Yanapt'amax ñanqha lurir jaqinakat jayankiwa, jupanakax janiw arunakamarjam jakapkiti.

[156] Tatay, munasiñamax wali jach'awa; chiqa kankañamarjamay jakañ churita.

[157] Nayar arknaqir timasirinakax waljaniwa, nayasti janiw arunakamat saraqaskti.

[158] Ch'uxña lurir jaqinakar uñjasax axtastwa, arunakamarux janiw jaysapkiti.

[159] Tatay, arunakamar munasitax uñtanita; ¡munasiñam laykuy jakañ churita!

[160] Taqpach arunakamax chiqapapuniwa; taqpach arsutanakamax wiñayawa, askirakiwa.

[161] Ch'aman jaqinakax ina ch'usat arknaqapxitu, chuymaxasti arunakamaruw waqaychi.

[162] Nayax arsutamampix kusisitätwa, imantat yänak jikxatasin kusisir jaqjamätwa.

[163] K'arisiñarux uñistwa, janiw yatiñ munkti, yatichäwimarusti munastwa.

[164] Chiqa arunakamatxa, jan qarjasisaw yupaychsma.

[165] Arunakam munirinakax suman jakasipxi, janiw kunas jupanakarux tinkuykiti.

[166] Tatay, nayar qhispiyañam suyt'askta, kamachi arunakamarjamaw sarnaqta.

[167] Nayax arsutanakamaruw jaysta, taqpach chuymampiw munasirakta.

[168] Kamachi arunakamarux jaystwa, ¡jumaw taqi sarnaqäwix yattaxa!

[169] Tatay, arnaqasitaxax nayraqatamaruy purinpan; ¡arunakamarjamay amuyt'a chuym churita!

[170] Mayisitaxax nayraqatamar purinpan; ¡arsutamarjamay qhispiyita!

[171] Lakaxat jach'añchañ arunakax mistpan, jumaw kamachinakam nayar yatichista.

[172] Laxraxax arsutam phuqhirïtamat q'uchpan, taqpach kamachi arunakaman chiqapätap layku.

[173] Amparamax nayar yanapt'añatak wakichatäpan, arunakamar taqi kunat sipan munasitax layku.

[174] Tatay, ¡nayarux qhispiyakitaya! ¡Yatichäwinakamampix kusisitätwa!

[175] Jumar yupaychañatakiw jakañ munta; aski kankañamax yanapitpanaya.

[176] Chhaqhir ovejar uñtataw payinukta, ¡nayar thaqhirix jutakimaya, janiw kamachi arunakamat armaskti!