[1] ¡Taqpach chuymaxampiw Tatitur jach'añchä! ¡Tatituxay, Diosaxay, jach'a ch'amanipunïtawa! K'ajkir qhapaq kankañampiw isthapistaxa;
[2] qhankir isimpiw llawuntastaxa. ¡Alaxpacharux isir uñtat janatattaxa!
[3] ¡Jumaw utjäwimarux umanakxar utt'aytaxa! Qinayanakax juman sarnaqañ carronakawa; ¡thayan chhiqhanakapxan sarnaqtaxa!
[4] Thayanakax khithanakamawa, nina lawranakasti arsutam phuqhirinakawa.
[5] Uraqirux qalltapxaruw sum thurt'aytaxa, utt'ayatäkän ukawjat janipun unxtañapataki.
[6] Uraqirux lamar qutaw imxatäna, isïkaspas ukhamaw janxatäna. Umanakasti qullunakaruw chhaqtayäna.
[7] Ukampis ch'aman arunakam ist'asax sarxänwa, q'ixu q'ixu arunakam ist'asax jank'akiw jaltxäna:
[8] Qullunakar makhatasa, pampanakar saraqasa, kawkharutix uchktas ukawjar puriñkama,
[9] kawkhakamatix puriñapäkän ukkhakama, ukhamat uraqir jan mayamp chhaqtayañataki.
[10] Jumaw uma jalsunakat jawiranak utjaytaxa, qullu taypinjam jalañapatakiw uchtaxa.
[11] Uka umanakat pampankir animalanakax umapxi; ch'uminkir asnonakas uka uma umt'asaw umat pharjayasitap apaqtayasi.
[12] Jawir jak'anakan jamach'inakax tapachasipxi, layminak taypin chhiwiqipxaraki.
[13] Jumaw alaxpachatpach qullunakarux qarpantaxa, alaxpach umampiw uraqirux sisantaytaxa.
[14] Uywanakatakiw quranak jiltaytaxa, jaqin yapuchat alinak jilaytaxa, uka yaput manq'añ apsusiñapataki,
[15] ch'amanchir t'ant'a jikxatañapataki, chuymapar kusisiyir vino apsusiñapataki, ajanupas aceitjam lliphipiñapataki.
[16] Tatitun ayrut Líbano qullunkir cedro quqanakasti, uka uma umt'asaw umat pharjatap apaqasipxi.
[17] Uka quqanakanxa, jisk'a jamach'inakamppachaw tapachasipxi, cigüeña jamach'inakas ukan jakasipxaraki.
[18] Jach'a qullunakax cabranakatak uchatawa, qarqanakasti añathuyanakan imantasiñapawa.
[19] Phaxsirux pachanak jakhuñapatakiw uchtaxa; intisti kuna pacha jalantañapsa sum yatisi.
[20] Ch'amakanak uchtaxa, ch'amak arum purinipansti, ch'uminkir animalanakax misturanipxiwa.
[21] Leonanakax manq'atjam wararipxi, Diosat manq'a mayisipxi.
[22] Inti jalsunipansti, sarxapxiwa, utjäwinakaparuw ikintxapxi.
[23] Jaqisti luräwiparuw mistu, jayp'ukamaw yapupan irnaqi.
[24] ¡Tatay, luräwinakamax waljapuniwa! Yatiñ kankañampiw taqi kuns lurtaxa; ¡uraqix luratanakaman phuqhantatawa!
[25] Lamar qutax jan tupt'kayawa, jan jakht'kay animalanakaw utji; jach'anaka, jisk'anaka;
[26] lamar quta chiqaw barconakax tuyupxi, Leviatán jach'a laq'us ukankiwa, uka laq'umpi anatasiñamatakiw lurtaxa.
[27] Taqi ukanakax jumaruw suyasipktam, wakisitapar manq'a churañamataki.
[28] Jumaw manq'a churtaxa, jupanakasti katuqasipxiwa; amparam luqatattaxa, jupanakasti sumanak manqapxi;
[29] ajanum imantaskta ukapachax mulljasipxiwa; samanap apaqkta ukkhasti jiwt'apxiwa, laq'aruw tukxapxaraki.
[30] Jakañ samanam khithankta ukapachasti, machaqat utjayataw uñjasipxi. Ukham lurasaw uraqir machaqaptaytaxa.
[31] ¡Tatitun qhapaq kankañapax wiñayawa! ¡Tatitux luratanakapampiw kusisi!
[32] Diosax uñtanki ukapachax uraqix khathatiwa; ¡qullunakar llamkt'ki ukapachasti, jiwq'i mistuyapxi!
[33] Jakañaxkamaw Tatitur yupaychä, jakkasaw Diosaxatak q'uchü.
[34] Lup'itaxax Tatitun chuymapar purkirïpan, nayasti jupanakpun kusisiñ jikxatta.
[35] ¡Jucharar jaqinakax aka uraqin tukusipxpan! ¡Ñanqha lurir jaqinakax jiwarapxpan! ¡Taqpach chuymaxampiw Tatitur jach'añchä! ¡Tatitux jach'añchatäpan!