[1] Ñanqha lurir jaqirux ñanqhaw chuymapar parlxayi. Diosar axsartañasti janipuniw jupan utjkiti.
[2] Jupax aytat jaqïkaspas ukham amuyasi, ñanqha luratapan jan walïtapsa janiw amuykiti.
[3] Q'añu arunak parlir k'ari jaqiwa, aski lurañanakxa, janipuniw amuykiti.
[4] Ikiñapan ikintatax jan wali lurañanak amti; ñanqha lurañ thakhir chinkatatjamawa, ñanqha lurañsa janiw apanukuñ munkiti.
[5] Tatay, munasiñamax alaxpachkamaw puri; aski kankañamasti alaxpachkamaw makhati.
[6] Chiqapar uñjañ kankañamax jach'a qullunakjamawa; arsutanakamasti jach'a lamar umanakjamawa. Tatay, jumaw jaqinakarusa, animalanakarus imasktaxa.
[7] ¡Dios Tatay, munasiñamax muspharkayawa! ¡Chhiqhanakamampi imantayasiñatakiw jaqinakax jumar thaqhapxtam!
[8] Utaman utjir manq'ampix sist'atäpxiwa; muxsa uman jawirat umayaraktaxa,
[9] juman jakkir umax utji, qhanamasti qhan uñjayapxitu.
[10] Jumar uñt'irinakarux khuyapt'ayaskakim, q'uma chuymaninakarusti chiqapar uñjaskakim.
[11] Jach'a jach'a tukurinakax jan takisitpati, ñanqha lurir jaqinakas janirak jaqunukutpati.
[12] ¡Ñanqha luririnakan aynacht'añap uñjapxpan! ¡Jan mayampitak sartkiriw tinkupxi!