[1] Diosay, ¿kunatarak apanukt'asipxistasti? ¿Kunatarak q'apisiñamasti tamamankir ovejanakatak nakhisti?
[2] Nayra pachatpach jikxatasit markamat amtasim, jumankañapatak qhispiyat markamat khuyapayasim; kawkhantix utjaskäyäta uka Sión qullut amtasirakim.
[3] Aka t'unjat markamar uñjir jutakimaya; ¡uñisirix qullan utamarux taqpach t'unjawayi!
[4] Timanakamax atipjasin qullan utaman waruripxi; ¡yaqha markankir wiphalanak sayt'ayasipxi,
[5] mantañawja punkuruw uchapxi! Ch'umi taypinkir lawa ch'iyirinakjamaw,
[6] hachampi, martillomp jawq'antasax lawat lurat k'achachatanak t'unthapipxi.
[7] Qullan utamarux ninampiw irkatapxi; uraqitpach allinukusaw sutiman utjäwip ñanqhachapxi.
[8] Nanakar taqpach tukjañatakiw amtapxi; jumar yupaychañ chiqawjanak ninampiw phichhantapxi.
[9] Janiw qullan chimpunakax uñjatäkxiti; janirakiw profetas utjkxiti, janiw khitis kunapachkam ukhamäñapsa yatkiti.
[10] Diosaxay, ¿kunapachkamarak nanakar uñisirinakasti t'aqhisiyapxitanisti? ¿Kunapachkamarak sutim jisk'achapxanisti?
[11] ¿Kunatarak ch'iqa amparam aythapistasti? ¿Kunatarak kupi ampar qhumthapit qhipartasti?
[12] Diosaxay, jumaw nayratpach reyixätaxa, jumaw aka uraqin walja kuti atipjtaxa.
[13] Jumaw lamar qutarux ch'amamampi payar jaljtaytaxa, lamar qutankir axsarkañ animalan p'iqip phallaytaxa,
[14] jumaw Leviatán axsarkañ animalan p'iqip pallalljtaxa, wasarankir animalanakan manq'añapatakiw jaqunuktaxa.
[15] Jumaw uma jalsunaksa, jawiranaksa jalsuytaxa, jumaw jan wañsur jawiranak wañt'aytaxa.
[16] Jumankiw urusa, arumasa; jumaw phaxsimpiru, intimpirux uchtaxa;
[17] jumaw akapach qurpanak ayrunttaxa; jumarakiw jallupacha, awtipacha uchtaxa.
[18] Tatay, janikiy armasimti, timasirix jisk'achtamwa, jan amuyt'asir jaqisti jumat jan wal parli.
[19] ¡Janikiy nanakat armasipxistati! Qhurukutur uñtat pisi ch'amäpxtwa; ¡janikiy axsarkañ animalanakar katuyapxistati!
[20] ¡Nanakampi arust'äwi luratamat amtasim, akapachax jan wali lurañanakamp phuqhantatawa!
[21] T'aqhisiyat jaqirux janikiy p'inqachayamti; jan kunan jaqinakarusa, llakitanakarusa, sutim jach'añchir tukuyam.
[22] ¡Diosay, sartasikimaya! ¡Amtatamax amtatapunïpan! Jan amuyt'an jaqinakan jumar ñanqhachatapat amtasim.
[23] Janikiy timanakaman uxutanakap armasimti, janirak jumar qallantañatak wararitapatsa armasimti.