[1] ¡Diosax Israel markatakix munasiñaniwa, q'uma chuyman jaqinakatakis munasiñanirakiwa!
[2] Nayasti, mä juk'ampïsapänxa, tinkuriskäyätwa; kayunakaxax niyapuniw llust'äna,
[3] jach'achasir jaqinakar uñisitax layku, ñanqha jaqinakar qamirkipstir uñjatax layku.
[4] Jupanakarux janiw jiwañax llakisiykiti, k'umarakiw sarnaqasisipki;
[5] janiw jaqin llakip uñt'apkiti, janirakiw mayninakjamas t'aqhisipkiti.
[6] Jach'achasiñampiw k'achachasipxi, nuwasiñampiw isthapisipxi;
[7] ñanqha lurañampi puquntatäpxiwa, nayranakapas thuqhurirjamawa, ñanqha amtäwinakapax walipuniwa.
[8] Jaqinakat jan wal parlapxi; ¡taqinit phiskasipxi! Jach'a jach'a tukuñapax jach'apuniwa, ñanqha lurañatak parlt'asipki.
[9] Arunakapampix Diosaruw ñanqhachapxi, parlatapampisti jaqinakaruw jan walt'ayapkiti.
[10] Ukat jaqinakax jupanakar jach'añchi, janirakiw kuna juchsa jupanakan jikxatkiti.
[11] Jupanakax akham jiskt'asipxi: “¿Diosasti uk yatispati? ¿Alaxpachankiristi uk amuyaspati?” sasa.
[12] Ukhamäpxiw ñanqha lurir jaqinakaxa, jan khitir yäqasaw qamirkipstapxi.
[13] ¡Inamayakiw chuyma q'umachasitaxaxa! ¡Inamayakiw amparanakax ñanqhat jariqasitaxasa!
[14] Jan inakt'asaw nuwat uñjasta, sapa willjtaw mutuyat uñjasirakta.
[15] Nayatix jupanakjam amtiriskäyätxa, wawanakamarux aljantiriskäyätwa.
[16] Nayax ukxat amuyt'añ munäyäta, nayatakisti ukax wali ch'amänwa:
[17] Diosan qullan utapar mantasinak amuyta, kunarutix puripkan uka.
[18] Jupanakarux llust'a chiqaruw uchtaxa, aynacht'añaruw nukt'araktaxa.
[19] ¡Akatjamat t'unjatax uñjasipxani! ¡Axsarañampi tukjataw tukusipxani!
[20] Tatay, ikit p'arxtasir jaqjam sartaskät ukapachasti, k'ari uñnaqaparux jisk'achätawa.
[21] Nayax wali llakitäskayätwa, chuymaxas walpun usutänxa,
[22] nayax jan amuyt'asir jalta chuyma jaqïyätwa; ¡nayraqatamansti uywar uñtatäyätwa!
[23] Kunäkipansa, jumampi chikapuniw utjasïyäta, jumaw kupi amparaxat wayxarustaxa,
[24] amtatamarjamaw irpistaxa, tukuyarusti jach'achasaw katuqitätaxa.
[25] ¿Khitis alaxpachan utjitu? ¡Juma sapakïtawa! Jumampi chik utjasax janiw kuns aka uraqin munkti.
[26] Chuymaxasa, janchixas tukusiskiwa, ukampis Diosaw wiñay katuqäwixaxa, jupaw chuymaxarux katxäsiski.
[27] Jumat jayarst'irinakax jiwapxaniwa; arsutam jan phuqhirinakarusti t'unjätawa.
[28] Nayasti Diosaruw jak'achasï, ukaw nayatakix askixa. Dios Tatay, jumaw arxatirixätaxa, taqpach luräwinakamat yatiyä.