[1] Diosaxay, aski kankañam reyir churam, chiqapar uñjañam reyin yuqapar churam,
[2] chiqapar uñjañamp markamar irpañapataki, jan yäqat wawanakamar chiqap uñjañapataki.
[3] Jach'a qullunakax sumankañ apanpan, jisk'a qullunakas aski kankañ puriyanpan.
[4] ¡Reyix jan yäqat jaqinakar arxatpan! ¡Jan kunan jaqin wawanakapar qhispiypan, t'aqhisiyir jaqinakarusti takxatpan!
[5] ¡Reyix jumar wiñay axsartirïpan, intin phaxsin utjañapkama!
[6] ¡Ch'ijinakar purxatir jalljamäpan, uraqir jasaptayir jallur uñtatäpan!
[7] ¡Aski kankañax marka apnaqäwipan panqarpan, sumankañasti phaxsin tukusiñapkam utjpan!
[8] ¡Maysa lamar qutat maysa lamar qutkam apnaqpan, Éufrates jawirat qalltasa, aka uraq tukuskama!
[9] ¡Wasaran jakir timanakapax ch'amamp apnaqirïtap yatipxpan, jisk'achjat uñjasipxpan!
[10] ¡Tarsis markankir reyinakasa, quta wat'ankir reyinakasa, jupar qullqi churapxpan, Arabiankir reyinakasa, Etiopiankir reyinakasa churäwinak luqtapxpan!
[11] ¡Taqpach reyinakax jupa nayraqatar killt'asipxpan! ¡Taqpach markanakarak juparux luqtapxpan!
[12] Jupaw art'asir jan kunan jaqirux antutayani, yanap jan jikxatir llakit jaqirus yanapani.
[13] Jupaw jan aytat jaqinakat khuyapt'ayasini, jan kunan jaqinakarus qhispiyarakini.
[14] Jupaw t'aqhisiñ taypit waysuni, jakañanakapan jila alanïtap layku.
[15] ¡Reyix jallallatäpan! ¡Sabá uraqit apanit quri churapxpan! ¡Jupatakix Diosat mayipxapunpan! ¡Jupax wiñayapun jach'añchatäpan!
[16] ¡Trigox yapunakan jilarkir utjpan, qullu patanakansti jilantarakpan! ¡Líbano uraqinjam granox achuntpan, pampa alinakjam trigo puyanakax puqurpan!
[17] ¡Reyin sutipax wiñayatakïpan; aytat kankañapasti intir uñtat utjapunpan! ¡Taqpach markanakax jupa tuq askinak katuqapxpan! ¡Taqpach markanakasti “kusisiñanïtawa” sapxpan!
[18] Israelan Tatit Diosapax jach'añchatäpan, jupakiw muspharkañanak luririxa;
[19] qullan sutipax wiñayatak jach'añchatäpan. ¡Qhapaq kankañapasti uraqir phuqhantpan! ¡Ukhamäpan!
[20] Akawjaruw Jesé chachan David yuqapan mayisitanakapax tukuyi.