[1] Dios Tatay, munasiñam laykuy khuyapt'ayasita; khuyapayasirïtam laykuy juchanakaxat pampachita.
[2] ¡Ñanqha luratanakaxat jariqt'ita! ¡Jucha luratanakaxat q'umacht'ita!
[3] Jucha luratax uñt'astwa; juchaxax janiw amuyuxat chhaqtkiti.
[4] Jumataki, jumatakiw juchachasta, jumax juchañchkta uka juch lurta. Ukat juchañchatamax chiqapa; taripäwimas jan kamskayaraki.
[5] Nayax yuritaxatpach juchanïtwa; taykaxan purakapatpach juchanïtwa.
[6] Jumax q'uma chuymaniruw munastaxa, chuymaxarusti yatiñ kankañ uchtaxa.
[7] Hisopo alimp ch'axch'ukipita: nayasti q'umachataw uñjasï; jariqt'itaya, nayasti khunut juk'ampi janq'uw tukxä.
[8] K'uchirt'asiñampi phuqhantita, usuchjkchista ukas wasitat kusisiyxita.
[9] Janikiy juchanakaxarux uñtanimti, taqi ñanqha luratanakaxat q'umachita.
[10] Dios Tatay, ¡q'uma chuymay churita!, ¡machaq aski ajayuy churita!
[11] Nayraqatamat jan apanukusistati, janirak qullan ajayumsa irpaqasistati;
[12] qhispiyäwi kusisiñam wasitat churxita; ch'aman ajayumampi thurt'ayita,
[13] jucharar jaqinakar thakhimat yatichañataki, juchaninakasti jumaruw makhatxapxätam.
[14] ¡Dios Tatay! Nayan qhispiyirixa, jiwañat qhispiyita, q'ucht'asisaw juman chiqätam qhanañchä.
[15] Tatay, lakaxay jist'arita, lakaxampisti jumar jach'añchasaw q'uchü.
[16] Jumax janiw luqtanak munktati; wilañchanaksa luqtirismawa, ukampis janiw ukanakax kusisiyktamti.
[17] Diosatak chiqpach luqtäwix llamp'u chuyma luqtañawa; ¡Diosay, llamp'uptat chuymarux janiw jumax jisk'achktati!
[18] Tatay, munasiñam laykuy Jerusalén markarux ask luram; pirqanakapsa wasitat sayt'ayam.
[19] Ukapachaw luqtäwinak katuqasxäta, churäwinakampi, wilañchanakampi; ukapachaw altaramxarux vaca qallunak luqtasxani.