[1] Nayax Tatituruw munasta, mayisitaxar ist'atap layku,
[2] naya tuqiruw jinchup alkatanitu. ¡Wiñayapuniw jupar art'asï!
[3] Jiwañ chinuñanakaw simpantitäna, mik'ayan sipitanakapaw katuntitäna, llakisiñan, ayquñan katuntataw uñjasïyäta.
[4] Nayasti Tatitun sutip art'asta: “Tatay, jakañax qhispiyita” sasa.
[5] Tatitux llamp'u chuymaniwa, askirakiwa; Diosasax munasiriwa.
[6] Tatitux jan yäqat jaqinakaruw imaski. Jan ch'amanïkiriruw qhispiyitu.
[7] Jichhakuchapï samart'at jikxatasxäxa, Tatitun nayat khuyapayasitap layku,
[8] jiwañat nayarux qhispiyitu, nayranakaxar jachañat apaqi, kayunakaxarusti tinkuñat sayt'ayi.
[9] Aka uraqin jakkasax Tatitur jaysasapun sarnaqä.
[10] Wali llakisiñan uñjaskasasa, iyawsañaxax utjaskakïnwa.
[11] Llakisiñankasax säyätwa: “Jaqinakax k'arikamakiwa” sasa.
[12] ¿Kunampirak Tatitur phuqhirista, nayatak askinak luratapatsti?
[13] ¡Qhispiyasiñapat yuspagarasa, Tatitun sutip aytasa!
[14] Jaqinakan nayraqatapan Tatitur arsutanakax phuqhä.
[15] Tatitutakix wali llakisiñawa, iyawsirinakapar jiwir uñjañaxa.
[16] ¡Tatay, nayax uywatamätwa! ¡Uywataman wawapätwa! Jumaw ñach'antatanakax t'aqanuktaxa.
[17] Tatay, yuspagarañ luqtäwi katuyäma, sutimaruw jach'añcharakï.
[18] Jaqinakan nayraqatapan Tatitur arsutanakax phuqhä,
[19] Tatitun qullan utap punkun phuqhä, ¡Jerusalén, juma taypin phuqhä! ¡Tatitux jach'añchatäpan!