[1] ¡Tatitux jach'añchatäpan! Tatiturux taqi chuymampiw yupaychä, aski jaqinakan tantachasïwipan jach'añchä.
[2] Tatitun luratanakapax muspharkañawa, luratanakapar munirinakax sum yatxatapxi.
[3] Jupan luräwipax k'ajkiriwa, munkañarakiwa, aski kankañapax wiñayawa.
[4] Amtaskay muspharkañanak jupax luri. Tatitux munasiñaniwa, khuyapayasiriwa;
[5] jupar iyawsirinakarux manq'añ churi; arust'äwipat wiñayapuniw amtasi.
[6] Tatitux luratanakapan ch'amap markapar uñacht'ayi, Diosar jan uñt'ir jaqinakan uraqip churxaraki.
[7] Luratanakapax askiwa, chiqaparakiwa; kamachinakapax taqi chuymamp iyawskayawa,
[8] wiñayatak suma utt'ayatawa, chiqapampi, aski kankañampi luratawa.
[9] Markaparux qhispiyiwa, arust'äwipsti wiñayatakiw utt'ayi. Diosax qullanawa, axsarkayarakiwa.
[10] Yatiñ kankañan qalltapax, Tatitur axsartañawa, jupar waqaychirinakax wali amuyt'anïpxiwa. ¡Tatitux wiñayaw yupaychatäni!