[1] Nayax Tatituruw taqpach chuymaxamp suyt'ta: jupasti naya tuqir alt'anisin arnaqasitax ist'itu;
[2] jiwañ p'iyat waysusitu, mik'ayar jalantkiriruw qhispiyitu. Qarqa patxaruw kayunak takt'ayitu; takt'añaxaruw ch'amañchi.
[3] Machaq q'uchu lakaxar uchitu, Diosaxar yupaychañ q'uchu. Uk uñjasax waljaniw chuym ch'allxtayasipxi, Tatiturusti taqi chuymampiw iyawsapxaraki.
[4] ¡Taqpach chuymamp Tatitur alkatir jaqix kusisiñaniwa, jupax janiw qallasirinakar thaqkiti, janirakiw k'ari diosanakar yupaychirinakarus thaqkiti!
[5] Dios Tatay, muspharkañ luratanakamax waljawa, nanakat khuyapayatamas waljarakiwa. ¡Janiw khitis jumjamax utjkiti! Ukanakxat yatiyañ munta, arsuñ munarakta, ukampis nayatakix janiw jakht'añjamäkiti.
[6] Janiw jumax wilañchanakampix kusisktati, janirakiw luqtanakas kusisiyktamti; janiw jucha pampachañatakix wilañchanak mayktati. Ukatsipan nayarux jinchunakax jist'arista.
[7] Ukat nayax sista: “Akankasktwa” sasa, kamisatix qillqatax nayxat parlki ukarjama.
[8] Dios Tatituxay, munañam lurañaw kusisiyitu; ¡yatichäwinakamax chuymaxankiwa!
[9] Markam taypin qhispiyäwimat yatiyta; ¡Tatay, nayan jan amukt'ataxat jumakiw yattaxa!
[10] Aski kankañamat arsuñxa, janiw chuymaxar imantkti; arsutam phuqhirïtamampita, qhispiyäwimampit yatiyta. Jach'a tantachasïwi taypinsti, janipuniw khuyapayasiñamampita, aski kankañamampit amukt'kti.
[11] ¡Tatay, munasiñam churakitaya! ¡Khuyapayasiñamampi aski kankañamampix imapunitpan!
[12] Walja llakinakaw muyuntitu, jan jakht'kay llakinakaw muyuntitu. Pachpa juchanakaxaw katuntitu; ¡juykhur uñtataw jikxatasta! P'iqi ñik'utaxat sipan juk'amp jilawa, ch'amas pist'xarakituwa.
[13] Tatay, ¡nayar waytir jutakimaya! Tatay, ¡jank'akiy nayar yanapt'irix jutam!
[14] ¡Nayar jiwayañatak thaqhirinakax, p'inqachjat jikxatasipxpan! ¡Nayar ñanqha lurañ amtirinakax, mä p'inqa jaltxapxpan!
[15] ¡Nayat larusir jaqinakax, p'inqapat jaltxapxpan!
[16] Jumar thaqhirinakasti kusisiñampi phuqhantasipxpan; qhispiyasiñam munirinakax arsupxapunpan: “¡Tatitux jach'a ch'amanipuniwa!” sasa.
[17] Tatay, nayax jan kunanïtwa, llakitarakïtwa, janikiy nayat armasistati. Jumaw nayan arxatirixätaxa, qhispiyasiñaxätasa: ¡Diosaxay, jank'akiy jutam!