[1] Tatay, jumaruw alkatasinsma; janikiy mä p'inqa tukuyistati.
[2] Aski kankañam laykuy qhispiyita, ist'akitaya, qhispiyarakitaya.
[3] Jumay nayan arxatir qarqaxäma, jumarak imantasiñ jach'a utaxäma, ¡jumaw qarqaxätaxa, jach'a utaxätasa!
[4] Diosaxay, ñanqha lurir jaqin amparapat qhispiyita, jaqi jiwayirin amparapata, qhuru jaqit jark'aqita,
[5] Tatay, jumaw nayan suyt'añaxätaxa, wayna kankañaxatpach alkatañaxätasa.
[6] Taykaxan purakapankkäyät ukkhatpach jumarux alkatäyäsma. ¡Jumaw nayarux qhan uñjayista! ¡Nayasti jumarux yupaychapunïmawa!
[7] Waljaniw sarnaqäwixampix muspharapxäna, jumakiw nayan arxatirixätaxa.
[8] Lakaxax sapüruw qhapaq kankañamatxa, jach'añchäwi q'uchunakampi phuqt'atäski;
[9] janikiy ch'ama qarit tuqir jisk'achistati; ch'amaxax tukusxani ukkhax janikiy jaytanukustati.
[10] Timasirinakaxax nayxat jan wal parlapxi, aliqapuniw uñch'ukipxitu, jupanakax jiwayañ munapxitu.
[11] Ukatsti sapxiwa: “Arktapxam, katuntapxam, Diosax jupar apanukxiwa, janiw khitis arxatkaniti” sasa.
[12] Diosaxay, janikiy nayat jayarst'amti; ¡jank'akiy nayar yanapt'ir jutam!
[13] ¡Nayar jiwayañ munirinakax p'inqachjatäpxpan, tukjatäpxarakpan! ¡Nayar ñanqha luririnakax axtañar tukuyatäpxpan!
[14] Nayasti jumarukiw suyt'askäma, juk'ampi juk'ampirak yupaychäma;
[15] lakaxax arxatatamat yatiyani, qhispiyäwimat sapüruw arsuni. Ukax janiw nayatak amuyañjamäkiti.
[16] Tatay, jach'a luräwinakamat yatiyä; juma sapak chiqätamat arsurakï.
[17] Diosaxay, wayna kankañaxatpach yatichasista, nayasti jichhakamas muspharkañ luratanakamat yatiyaskaktwa.
[18] Diosaxay, ch'ama qaritäxä ukapachaxa, janq'u ñik'utanïxä ukkhasa, janikiy jaytanukt'asistati, jichhür jakirinakaru, janïra yuripki jupanakar jach'a ch'amamat yatiyañaxaw wakt'askitu.
[19] Diosay, muspharkañ aski kankañamax alaxpachkamaw puri; jumax jach'a luräwinak uñachaytaxa; ¡janiw khitis jumjamax utjkiti!
[20] Chijinak tuqi irpakipasista, jach'a llakinak uñt'ayista, ukampis machaqat jakayxitäta; uraq manqhatpach wayst'asxitäta,
[21] aytat kankañaxaruw jiltayxitäta, wasitat chuymachxitäta.
[22] Israel markan Qullan Diosapay, nayasti yuspagar churäma, arsutam phuqhirïtamatsti, arpampi, salteriompiw q'uchüma.
[23] Tatay, lakaxax jumar q'uchusax kusisiniwa, juman qhispiyat ajayuxas kusisirakiniwa.
[24] Laxraxax taqi pachan askïtamat arsuni, nayan aynacht'añax munirinakasti mä p'inqaw atipjat uñjasipxani.