[1] Tatay, mayisitaxarux ist'akimaya; achikt'asitaxarux jaysakimaya. ¡Jumax chiqapästaxaya, ist'akitaya!
[2] Janikiy uywatamarux juchañchamti, nayraqataman janiw khitis askïkiti.
[3] Timasirinakaxax jiwayañatakiw arknaqitu, uraqiruw taksupxitu; ch'amak taypin jakayañ munapxitu, jiwatarjamaw uñjañ munapxitu.
[4] Ajayuxax q'ala aynacht'atawa; chuymaxax llakimp tukusitawa.
[5] Nayra pachanakat amtasta, taqpach luräwinakamat lup'ta.
[6] Juma tuqiruw amparanakax luqtansma, waña uraqir uñtataw jumatjam pharjayasta.
[7] Tatay, ¡mayisitaxarux jank'akiy ist'am, samanaxax tukstañampïskiwa! Janikiy nayatak maysa uñtamti, jan ukax jiwatar uñtatïristwa.
[8] Willjtanakax munasiñamat ist'ayita, taqi chuymamp jumar iyawsatax layku. Sarañaxäki uka thakhi uñachayita, kuntix nayax munkta uk mayisinsma.
[9] Tatay, nayamp timasirixat qhispiyita, jumaruw imantasiñatak thaqsma.
[10] Munañam lurañ yatichita, nayan Diosaxätam layku. Munasir ajayumax chiqa thakhinjamay irpitpan.
[11] Tatay, sutim laykuy jakayasita, khuyapayasirïtam laykuy llakisiñat wayst'ita.
[12] Chiqätam laykuy timasirinakaxar t'unjam, ¡taqpach uñisirinakaxar tukusiyam, nayax juman arkirimästxaya!