[1] Diosaxay, Diosaxay, ¿kunatarak jaytanukustasti?, ¿kunatarak qhispiyir jan jutistasti?, ¿kunatarak arnaqasitaxar jan ist'istasti?
[2] Diosaxay, uruy arumaw arnaqasinsma, jumasti janiw ist'kistati; ¡janiw nayatakix samart'añax utjkiti!
[3] Jumasti qullanätawa; jumaw Israel markan jach'añchatätaxa.
[4] Nayra awkinakaxax jumaruw alkatasipxäyätam, jupanakarusti qhispiytawa;
[5] yanap mayipxäyätam, jumasti jupanakarux qhispiytawa; jumaruw alkatasipxäyätam, jumasti janiw inamay suyayktati.
[6] Nayasti janiw jaqïkti, laq'ur uñtatakïtwa, ¡jaqin p'inqachatakïtwa!
[7] Nayar uñjasax larusipxiwa; nayatakix jan wal uñanaqapxi, p'iqipsa khiwisipxiwa,
[8] ukat sapxaraki: “Aka jaqix Tatituruxay alkatchïnxa; Tatituy jichhax qhispiypan. Juparuxay munchixa, qhispiypanaya” sasa.
[9] Kunsay parlapxpan, jumaw taykaxan purakapat yuriyista; jarphipar samart'ayasaw uywasista.
[10] Nay janïr yurkipan uñjasista, taykaxan purakapatpach nayan Diosaxätaxa.
[11] Janikiy nayat jayarst'amti, t'aqhisiñar jalantirpachätwa, janiw khiti yanapt'iris utjkituti.
[12] Uñisirinakaxax urqu vacanakjamaw muyuntitu, Basán uraqin waxrasir urqu vacanakjamaw jalxatitu;
[13] leonanakar uñtataw wararipxi, lakanakap jist'arataw chhukt'anipxitu.
[14] Nayasti waranukut umjamätwa, ch'akhanakaxas qhaqhanukutkamakiwa; chuymaxasti lik'ir uñtataw naya manqhan umatati,
[15] mallq'axax q'ala wañkatatawa, laxraxas laka manqhan lip'katatawa, ¡jiwañ laq'ar puriyañkamaw jumax jaquntista!
[16] Jan wali jaqinakax anunakjamaw q'al muyuntitu; amparanakaxsa, kayunakaxsa q'al jurqhiritu.
[17] ¡ch'akhanakaxsa jakht'asiristwa! Uñisirinakaxasti aliqapuniw uñch'ukipxitu,
[18] jupanakkamaw isinakax jalanuqasipxi, suerte jaqtasaw isix katuntasipxi.
[19] Jumasti, Tatay, nayar ch'amañchirïtawa, ¡janikiy nayat jayankamti!, ¡jank'akiy nayar yanapt'irix jutam!
[20] Espadampi jiwañat qhispiyita, anunakan amparapat jakañax qhispiyita;
[21] leonanakan lakapat qhispiyita, ¡urqu vacanakan waxranakapat tuwaqt'ita!
[22] Nayasti jilanakaxaruw jumat yatiyä, tantachasïwinakapan yupaychäma.
[23] Tatitur alkatirinaka, ¡Diosaruy jach'ar aptapxam! ¡Jacobun wawanakapa, juparuy jach'añchapxam! ¡Israelan wawanakapa, juparuy yupaychapxam!
[24] Jupax janiw jan utjirin jaqinakarux jisk'achkiti, janiw jan yäqasas uñjkarakiti, janirakiw jupanakatakix imantaskiti. ¡Yanap mayipki ukapachax, jupax ist'iwa!
[25] Arsutam phuqhirïtamat markam taypin jach'añchäma; arsutanakaxsti iyawsirinakam nayraqatan phuqharakï.
[26] T'aqhisiyat jaqinaka, sist'asiñkam manq'apxam; Tatitur thaqhirinaka, jupar yupaychapxam, walja maranak jakapxarakim.
[27] Taqpach jaqinaka, taqpach markanaka, aka uraqpachan jakir jaqinaka: Tatitut amtasipxam, jupar makhatxapxam; ¡nayraqatapar killt'asipxam!
[28] Tatituw reyixa, jupaw taqi markanakarux apnaqi.
[29] Nayraqatapan alt'apxam, juparuk yupaychapxam, jilarkir utjirin jaqinaka, laq'ar tukur jaqinaka, jumanak pachpax janiw jakañanïpktati.
[30] Wawanakaxax Tatituruw yupaychapxani, jupatsti wiñayaw parlapxani;
[31] jupanak qhipat yuririnakarusti, Tatitun chiqapar uñjirïtapat yatiyapxani, aski luratanakapat yatiyapxarakini.