[1] Alaxpachankir Tatay, ¡jumar yupaychañax sumapuniwa, sutimar q'uchuñas kusisiñawa!
[2] Willjtanakan khuyapayasiñamat yatiyañax askiwa, arumanakan arsutam phuqhirïtamat parlañax askirakiwa,
[3] arpanakampi chika, salteriompi chika q'uchuñax kusisiñawa.
[4] Tatay, ¡luräwinakamax nayatak kusisiñawa! ¡Luratanakamax kusisiñampiw phuqt'itu!
[5] Tatay, ¡luratanakamax sinti muspharkayawa!, ¡amtatanakamax jan amuyt'kayawa!
[6] ¡Jan amuyt'an jaqikiw ukanak jan amuyt'kaspati!
[7] Jucharar jaqinakax qurar uñtatas alintasipkpan, ñanqha luririnakax panqarasipkpansa, jupanakax wiñayatak tukjatäpxaniwa.
[8] Jumasti, Tatay, wiñayatakiw alaxpachan apnaqtaxa.
[9] Tatay, timasirinakamax tukusipxaniwa, ñanqha luririnakasti ananukutäpxaniwa.
[10] Jumaw ch'am yapxatista, urqu vacan ch'amapar uñtata, p'iqixarusti q'apkir qullampiw warxatista.
[11] Nayax timanakaxar aynacht'ir uñjä, ñanqha jaqinakan ayqutap ist'arakï.
[12] Aski jaqinakax palma quqanakjamaw jilapxi, Líbano qullunkir cedro quqanakjamaw jiltapxi.
[13] Tatitun utapan ayruntatäpxiwa, Diosasan uyupan panqarapxi.
[14] ch'ama qarita tuqirus achu churasipkakiniwa, wali ch'amani, k'umarakïsipkaniwa,
[15] Arxatir Tatituxan askïtap yatiyapxani, imasirixan ñanqha jan lurirïtap arsupxani.