[1] Dios Tatay, mayisitaxatakix janikiy amukïmti,
[2] ñanqhar jichuntat k'ari jaqinakaw nayxat jan walinak parli, k'arinak nayxat parlapxi.
[3] Uñisisiñ arunakampiw muyuntayapxitu, ¡ina ch'usat nayatak sayt'apxi!
[4] Munasiñanïtax laykuw k'arintapxitu; ukchañkamasti Diosat mayista.
[5] Aski lurataxatxa, ñanqhampiw kutt'ayapxitu, munasiñatsti uñisisiñampiw phuqhapxitu.
[6] Ñanqha lurir jaqiruy taripiripatak ucham, pachpa arxatiripax juchañchpan;
[7] taripäwin juchañchat uñjaspan, pachpa arxatiripak juchañchpan.
[8] Jakañ urunakapax juk'akïpan, yänakapsti yaqha jaqi katuntaspan.
[9] Wawanakapax wajcha qhiparapxpan, warmipasti ijmarakïpan.
[10] Wawanakapax mayjasis muyupxpan, manq'añ mayjasipxpan, t'unjat utapat jaqunukutäpxpan.
[11] Qullqi mayt'irix yänakap katuntasxpan, jan uñt'at jaqinakax yänakap aparxapxpan.
[12] Jan khitis jupat khuyapayaspati, wajcha wawanakapat janirak khuyapayaspati.
[13] Wawapan wawapax jiwarayatäpan, sutipax wiñayatak chhaqtpan.
[14] Awkipan ñanqha luratanakap Tatitux amtaspan, taykapan juchapsti janirak pampachpati;
[15] Tatitux ukanak amxäsiskakpan, sutipasti uraqit chhaqtayatäpan.
[16] Janipuniw jupax khuyapayasiñat amtaskänti; jan kunan jaqiru, mayjasir jaqiru, llakit jaqirux jiwayañatakiw arknaqäna.
[17] Ñanqhachañ munirïtap laykux ñanqhachatäpan; askinak jan munirïtap laykux uka askinakax jupat jayankpan.
[18] Ñanqhachäwix isimpjam imxatpan; purakaparux umjam ch'ach'antpan, ch'akhaparus aceiter uñtat mantpan;
[19] ¡mä isimpjam imxatpan, wak'ampi jiyintatjam t'aqhisiypan!
[20] ¡Ukhamay Tatitux nayamp timasirinakarux phuqpan, nayar k'arintirinakarus lurarakpan!
[21] Jumasti, Tatay, sutim laykuy sum uñjita. ¡Qullan munasiñamampiy qhispiyita!
[22] Nayax aynacht'at mayjasir jaqïtwa, chuymaxas chhuxriñchjatawa;
[23] ch'iwir uñtataw chhaqtaskta; ¡thayax pilpinturjamaw jalayitu!
[24] Manq'atjamaw qunqurinakaxax khathati; manq'atjamasti t'ukharnukstaraktwa.
[25] Jaqin larusiñakiw sarnaqta, nayar uñjasax p'iqi khiwisipxi.
[26] Tatit Diosaxay, yanapt'itaya; ¡munasiñam laykuy qhispiyita!
[27] Tatay, jupanakax yatipxpan, amparamampi taqi akanak luratama.
[28] Jupanakax ñanqhachapxitpasa, jumax askimay churita. Timanakaxax aynacht'apxpan, uywatamasti ukchañkamax kusispan.
[29] ¡Nayampi timasirinakax p'inqampi aynacht'apxpan! ¡P'inqax isimpjam jupanakar llawuntpan!
[30] Nayasti lakaxampiw Tatitur wiñay yuspagarä; ¡jaqinak taypin jupar yupaychä!
[31] Jupaw jan kunan jaqirux arxati, juchañchirinakat jakañap qhispiyaraki.