[1] Tatitur yuspagarapxam, munasiñanïtap layku, khuyapayasiñapax wiñayawa.
[2] Tatitun qhispiyatanakax arsupxpan, timasirin amparapat antutayatanaka,
[3] markanak taypit tantachthapitanaka, amsta tuqita, aynach tuqita, inti jalsu tuqita, inti jalanta tuqita.
[4] Jupanakax ch'usa wasaran muyupxäna, janiw markar irpir thakhi jikxatapkänti;
[5] manq'at awtjayasipxäna, umat pharjayasipxäna, ¡jupanakax jiwarirjamäpxänwa!
[6] Ukampis t'aqhisiñankasin Tatitur art'asipxäna, jupasti uka llakisiñat waysüna.
[7] Chiqa thakhiruw jupanakarux irpxatäna, jakañ markaruw irpäna.
[8] Tatiturux khuyapayasiñapat yuspagarapxam, jaqinakatak muspharkañanak luratapata.
[9] Umat pharjatanakaruw um churi, manq'at awtjatanakarusti jilarkir manq'a churaraki.
[10] Jupanakax axsarkay ch'amakan jakapxäna, cadenanakampi, llakisiñampi ñach'antataw jakapxäna,
[11] Tatitun arsutanakapar qallasipxatap laykuw t'aqhisipxäna, Alaxpachankirin amtäwipar jisk'achapxatap laykuw mutupxäna.
[12] Diosax ch'ama tukuñ lurañanakampiw aynacht'ayäna; lanqtasisaw liwisipxäna, janiw khiti waytiris utjkänti.
[13] T'aqhisiñankasinsti Tatitut art'asipxäna, jupasti t'aqhisïwit waysüna;
[14] ch'amak laxa taypit irpsüna, cadenanakampi chinuntatat jaranuküna.
[15] Tatiturux munasiñapat yuspagarapxam, jaqinakatak muspharkañanak luratapata.
[16] ¡Jupaw broncet lurat punkunak t'unjäna! ¡Jupaw hierrot lurat jist'añanak p'akiräna!
[17] Ñanqha luratanakap laykuw usuntapxäna, juchanakap laykuw t'aqhisipxäna,
[18] manq'atakix axtasxapxänwa; ¡jiwan punkupan jikxatasipxäna!
[19] T'aqhisiñankasinsti Tatitut art'asipxäna, jupasti t'aqhisïwit waysüna;
[20] may arsusakiw jupanakarux k'umaraptayäna; ¡manqhapachat qhispiyäna!
[21] Tatiturux munasiñapat yuspagarapxam, jaqinakatak muspharkañanak luratapata.
[22] Jach'añchañ luqtäwinak jupar katuyapxam, luräwinakapatsti kusisiñamp yatiyapxam.
[23] Aljasirinakax lamar qutaruw barconakat mantantapxäna. Lamar qutanjam aljañanak apapxäna,
[24] lamar qutan Diosan luräwinakap uñjapxäna, muspharkañ luratanakap uñatatapxäna.
[25] Tatitun arsutaparjamaw jach'a thayax sartäna, thayasti jach'a mathapinak sartayäna;
[26] alayaru, manqhäxar jaqnaqataw uñjasipxäna, liwnaqkäwix aynacht'atäxapxänwa.
[27] Machatanakjamaw aytilipxäna, ¡yatitanakapax janiw kunatakïkänsa!
[28] T'aqhisiñankasinsti Tatitut art'asipxäna, jupasti t'aqhisïwit waysüna;
[29] jach'a thayarux llamp'u thayaruw tukuyäna, lamar quta mathapinakasti llamp'uchataw uñjasïna.
[30] Uxinak t'akurir uñjasax kusisipxänwa, Diosasti kawkharutix mistuñ munapkäna, ukaruw puriyäna.
[31] Tatiturux munasiñapat yuspagarapxam, jaqinakatak muspharkañanak luratapata.
[32] ¡Markan tantachasïwipan jach'añchapxam! ¡Jilïr jaqinakan tantachasïwipan yupaychapxam!
[33] Diosaw jawiranakarux wasarar tukuyi, uma jalsunaksti waña uraqiruw kipstayi;
[34] purum uraqinak qullpa uraqir tukuyi, jaqinakapan ñanqha lurirïpxatap layku;
[35] wasar uraqirux uma sayt'anakaruw tukuyi, waña uraqirux uma jalsunakaruw kipstayi;
[36] ukaruw manq'at awtjatanakarux uchi, jupanakasti markanakap sayt'ayapxi.
[37] Yapunak yapuchapxi, uva alinak ayruntapxi, achunak jilarkir apthapipxaraki.
[38] Tatituw askip churi, juk'ampi jilxatayi, uywanakap mirantayaraki.
[39] T'aqhisiyat uñjasipxatap layku jiwarapkchi ukasa, chijinak layku, llakinak layku juk'aniptapkchi ukasa,
[40] Diosax t'aqhisiyir jilïr jaqinakarux jisk'achiwa, jan thakhin wasaranakaruw irpanti.
[41] Jan kunan jaqinakarusti Tatituw llakipat waysu; ¡uywa tamar uñtat wila masinakaparux mirantayi!
[42] Aski jaqinakax uk uñjasax kusisipxiwa, ñanqha lurir jaqinakasti lakap llupantasipxi.
[43] Ch'ikhi jaqix ukanak amuypan, Tatitun munasiñap amuyt'arakpan.