<Salmos 67

[1] Diosaxay, nanakat khuyapayasipxita, askinakay churapxita nayramampiy uñtanipxita,

[2] aka uraqin utjki uka markanakax, munañamampi, qhispiyäwimampi uñt'apxpan.

[3] Diosay, markanakax jumar yupaychapxpan; ¡taqpach markanak jumarux jach'añchapxpan!

[4] Markanakax kusisiñat q'uchupxpan, aski kankañampi akapachar apnaqatam layku; ¡jumaw taqpach markanak irpxartaxa!

[5] Diosay, markanakax jumar yupaychapxpan, ¡taqpach markanak jumarux jach'añchapxpan!

[6] Uraqix achunakap churi; ¡Tatit Diosasaw askinak churistu!

[7] ¡Diosax askinakap churistpan! ¡Akapachankirinakax jupar jach'añchapxpan!