[1] Alaxpachax Diosan qhapaq kankañap yatiyi, alaxpachax amparapan luratap qhanañchi.
[2] Urunakax jupanakkamaw yatiyasipxi, arumanakas jupanakkamaw yatiyapxaraki.
[3] Janis arsupkchixa, janis arunakapax ist'askchixa,
[4] uraqpacharuw yatiyatapax ist'asi, uraq tukuskamaw arupax puri. Tatitux alaxpachan mä chiq intitakix uskt'arapi,
[5] intisti jaqichasir waynjamaw utapat misttani, jalir jaqjamaw thakhip jalañatakix kusisi.
[6] Intix maysa thiyat uñstani, maysa thiyar puriñkamaw muyti, janiw kunas lupi junt'upat imantaskaspati.
[7] Tatitun kamachinakapax chiqapawa, jaqin chuymap machaqaptayiriwa. Tatitun arunakapax askiwa, llamp'u chuyman jaqir yatiñan tukuyiriwa.
[8] Tatitun kamachi arunakapax chiqapawa, chuymar kusisiyiriwa; Tatitun arsutanakapax q'umawa, yatiñ kankañ chuririwa.
[9] Tatitun arunakapax q'umawa, wiñayatak utt'atawa; Tatitun arsutanakapax chiqapawa, taqpachax askirakiwa,
[10] ¡suma qurit sipan juk'amp sumawa!, ¡chhuyu misk'it sipan juk'amp muxsawa!
[11] Arkirimatakis iwxt'a arunakawa, uka arunakam imañax askinak jikxatañawa.
[12] Janiw khitis pantjasitap amuyaskasamachiti. ¡Tatay, jan amuyaskasin juchanak lurataxat q'umacht'asita!
[13] Jach'a jach'a tukuñ chuym apaqt'asita; janikiy jach'a jach'a tukuñampix atipjayistati. Ukhamat jan juchan jaqirux tukü; jach'a juchat qhispirakï.
[14] Tatay, arsutaxasa, chuymaxan lup'itapas jumar kusisiykirïpan, Tatay, nayan qhispiyirixa, imantasiñaxa.