[1] Ñanqha lurir jaqinakar uñjasax jan q'apisimti, janirak ñanqha luririnakarus yäqamti,
[2] jupanakax jank'akiw alinakjam pharsupxi; ¡ch'uxña qurjamaw wañsupxi!
[3] Tatitur taqi chuymamp alkatasax ask luram, aka uraqin utjasim, chiqaparak sayt'am.
[4] Tatiturux suma chuymamp munasim, jupasti mayisitamarjamaw churätam.
[5] Tatitun amparapar sarnaqäwim katuyasim; jupar taqi chuymamp alkatam, jupasti jank'akiw yanapt'ätam.
[6] Aski kankañam taqinin uñjkay qhantayani, kunjämtix chika urun intix qhantki ukhama.
[7] Tatitun nayraqatapan amukt'am; jupan yanapap llamp'u chuymamp suyam. Ñanqha lurir jaqin nayrar sartatapat jan q'apisimti, ñanqhanak amtir jaqitsa janirak mayjt'asimti.
[8] Q'apisiñ apanukum, chuym ch'amakt'ayasiñ jaytanukum, ukham lurasax jan walirupuniw purisma.
[9] Ñanqha luririnakax markat jaqunukutäpxaniwa, Tatitur katuyasirinakasti suma uraqi katuqapxani.
[10] Mä juk'a urunakatsti ñanqha lurir jaqinakax janiw utjkxaniti; jupanakar thaqkätasa, janiw jikxatkätati.
[11] Llamp'u chuymaninakax suma uraqi katuqapxani, sumankañan jakasipxani.
[12] Ñanqha lurir jaqix, aski jaqirux jan wal lurañ amti, phiñasit nayrampiw uñkati.
[13] Tatitusti uka ñanqha jaqit larusiwa, tukusiñ urus jupatakix purinxarakiwa.
[14] Ñanqha jaqinakax espadanakap apsusipxi, mich'inak antutt'añ sum jiyantapxi, jan kunan jaqinakar aynacht'ayañataki, ¡chiqap sarnaqir jaqinakar jiwayañataki!
[15] Ukampis pachpa espadapaw chuymapar chhuqhuntani, mich'inak antutt'añapas p'akinuqatäniwa.
[16] Aski jaqin mä juk'ak utjatapaxa, ñanqha jaqin yänakapat sipansa wali askiwa.
[17] Tatitux ñanqha jaqinakarux tukjaniwa, aski jaqinakarusti uywasirakiniwa.
[18] Tatitux aski jaqinakarux imasipuniwa, suma uraqi katuqapki ukax wiñayatakïniwa.
[19] Jan wali urunakan manq'añax jan utjkani ukkhaxa, janiw p'inqachatäpkaniti, manq'añapasti jilarkiripunïniwa.
[20] Ñanqha jaqinakax waña alinakar uñtataw nakhapxani, Tatitur uñisirinakax jiwq'ir uñtataw chhaqtapxani.
[21] Ñanqha jaqix mayt'asisin janiw kutt'aykxiti, aski jaqisti khuyapt'ayasiri, suma chuymaniwa.
[22] Tatitun qullanaptayat jaqinakax suma uraqi katuqasipxani, jupan ñanqhachatanakasti jaqunukutäpxaniwa.
[23] Tatitux jaqirux suma thakhinjam irpi, jupar kusisiykir thakhiruw irpxati;
[24] liwisin ukasa, jank'akiw sarthapini, Tatituw juparux amparapat wayxäsiski.
[25] Nayax waynäyätwa, jichhasti ch'ama tukutäxtwa, ukampis janipuniw aski jaqir apanukut uñjkti, janirakiw wawanakapar mayjasir uñjkti.
[26] Aski jaqix sapüruw khuyapayasi, mayt'araki; wawanakapasti aski katuqäwïkaspas ukhamawa.
[27] Ñanqha lurañat jithiqtasim, kunatix askïki ukarak luram, jakañamatakisti utax utjapunïtamwa.
[28] Tatitux aski kankañar muniriwa, arkirinakaparusti janiw jaytanukkiti; jucharar jaqinakarux tukjiwa, jan wawanakanirak jayti.
[29] Aski jaqinakax suma uraqi katuqapxani, wiñayatakiw ukan jakapxarakini.
[30] Aski jaqix yatiñ kankañampiw parli; chiqa jaqisti chiqap parli.
[31] Tatit Diosapan kamachinakap chuymapar katxäsi; ¡kayunakapasti janipuniw llust'kaniti!
[32] Ñanqha jaqix aski jaqiruw uñch'uki, jupar jiwayañataki amtaraki;
[33] Tatitusti janiw amparapar jalt'aykaniti, janirakiw juchañchat uñjasiñap munkaniti.
[34] Tatitur taqpach chuymamp katuyasim, juparurak jaysam, jupaw uraqi katuqañamatakix ch'amañchätam. ¡Pachpa nayranakamampiw ñanqha jaqinakan t'unjatätap uñjäta!
[35] Ñanqha jaqiruw jach'achasir uñjta, mä jach'a quqjam jilantaskir uñjta;
[36] jupasti jiwxataynawa, thaqhiriw sarta, janiw jupar jikxatkti.
[37] Aski jaqir sumpach uñtam: jutir jakañapax sumankañ jakañawa.
[38] Tatitur kutkatasirinakax tukjatäpxaniwa; akat qhiparusti taqpach t'unjatäpxaniwa.
[39] Aski jaqinakax Tatitut yanap katuqapxi, juparakiw jan walt'añ urunakan arxatiripaxa.
[40] Tatituw jupanakar qhispiñ yanapi, qhuru jaqinakan amparapat jaltayi, qhispiyaraki, jupar taqpach chuymamp thaqhapxatap layku.