[1] ¡Tatitux jach'a ch'amaniwa! ¡Diosasax jach'añchatäñatakix askiwa, qullan markapansa, qullan qullupansa!
[2] ¡Qullan jach'a qullux munkayawa, alay tuqin jikxataski uka qulluxa! ¡Taqi akapachan kusisiñapawa! ¡Jach'a ch'aman reyin markapawa!
[3] Tatit Diosax Jerusalén utjäwip taypinkiwa; jupax suma arxatirit uñt'ayasi.
[4] Akapachankir reyinakax mayakiw jupatakix sayt'apxi;
[5] Diosan markap uñjasasti wal mulljasipxi, axsarañatsti jaltxapxakiwa.
[6] Ukan axsarañax jupanakar katunti, wawachasiñatak ayquskir warmir uñtata;
[7] wasar thayax Tarsis markankir barconakar tukjki ukhama.
[8] Kuntix ist'apkäyät uk uñjapxta, taqi ch'aman Tatitun markapana, Diosasan markapana: ¡Jupaw wiñayatak Jerusalén markar utt'ayi!
[9] Tatit Diosay, qullan utam taypin khuyapayasiñamat amtasipxta.
[10] Tatit Diosay, taqi uraqpachan sutimax jach'añchatawa, kunjäm jach'añchatäñapäkitix sutimax ukhama. Ch'amamampix kunatix askïki uk lurtaxa.
[11] ¡Sión qullux kusispan! Chiqap arsutanakamampix Judá uraqinkir markanakax kusisipxpan.
[12] Sión qullu muytapxpan, torrenakap jakht'apxpan;
[13] pirqanakap amuyapxpan, suma utanakap uñakipapxpan, jutir mita jaqinakar yatiyañataki:
[14] “Akapï Tatit Diosasaxa” sasa. ¡Jupaw wiñay irpirisaxa!