[1] Markaxay, yatichäwinakaxar ist'am; kuntix siskäma uk sum ist'am.
[2] Säwinak tuqiw arsü; nayra pachatpach imantatanakat parlä.
[3] Kuntix nanakax ist'apkta, yatipkarakta, kuntix awkinakax yatiyapkitu ukanakxa,
[4] janiw wawanakaxarux imt'apkäti. Jutir wawanakampiw Tatitur jach'añchapxä, ch'amapampita, muspharkañ luräwinakapampit yatiyapxä.
[5] Diosaw Jacobutakix mä kamachi uñstayäna; Israel markaruw kamachi arunak churäna: jupaw nayra awkinakasarux mayïna, wawanakapar yatichañataki,
[6] jutir wawanakan uka kamachinak yatipxañapataki, uka qhipat yurir wawanakas uñt'apxañapataki, jupanakasti wawanakapar yatiyapxañapatakiraki;
[7] Diosar taqpach chuymapampi iyawsapxañapataki, luräwinakap jan armapxañapataki; arsutanakap waqaychapxañapataki,
[8] nayra pachan jakir awkinakapjam jan sarnaqapxañapataki, qallasir t'axmar jaqir jan tukupxañapataki, pächasir chuyman jaqir jan tukupxañapataki, Diosat saraqtir jaqir jan tukupxañapataki.
[9] Efraín ayllunkir mich'inak apnaqir jaqinakax, nuwasïwi urun qhiparuw uñtxapxäna,
[10] janiw Diosamp arust'äwi luratanakap yäqapkänti, janirakiw yatichäwinakaparus jaysañ munapkänti.
[11] Diosan luräwinakapat armasipxäna, muspharkañ luräwinak uñjayatapat armt'asipxäna.
[12] Diosax Egiptonkir Soan uraqinxa, awkinakapan uñjkañaw muspharkañanak luräna:
[13] lamar qutarux payaruw jaljtayäna, uka chiq jupanakarux makhatayäna, pirqanakar uñtat umanak sayt'ayäna.
[14] Mä qinayaw urux irpäna, nina qhanaw arumax irparakïna.
[15] Wasaran payaruw qarqa jaljtayäna, jupanakarusti jilarkir uma umapxañapatak churäna.
[16] Diosax jach'a qarqat uma jalsuyäna, walja umanakan jawira jaltayäna.
[17] Jupanakasti juch lurasipkakïnwa; Alaxpachankirirux wasaran qallasisipkakïnwa.
[18] Diosaruw yant'añ munapxäna, munañaparjam manq'a mayisa;
[19] Diosatakix arusipxänwa: “¿Diosasti wasaran manq'añ wakichaspati?
[20] Chiqansa jupax qarqaruw sak'antäna, umasti waljapuniw uka qarqat jalsüna, ukampis, ¿t'ant'a churarakistaspati?, ¿markapatak aycha utjayarakispati?” sasa.
[21] Tatitux uk ist'asinxa, phiñasïnwa; q'apisiñapasti ninjamaw Jacobutak aqtäna.
[22] Janiw jupanakax Diosar taqi chuymamp alkatapkänti, janirakiw yanapaparus iyawsapkänti.
[23] Diosasti qinayanakaruw mayïna, alaxpach punkunak jist'aräna;
[24] ¡maná sat t'ant'a jupanakxarux jalluyäna, alaxpach t'ant'a manq'añapatak churäna!
[25] Jaqisti angelanakan t'ant'ap manq'äna, Diosax jilarkir manq'añ apayanïna.
[26] Inti jalsu thayampi, aynach thayampiw alaxpachan thayt'äna; ¡Diosaw ch'amapampi thayt'ayäna!
[27] Laq'a tutukar uñtat aycha jalluyäna; ¡quta ch'allar uñtataw jamach'inakax purintanïna!
[28] Diosax chhujllanak taypiruw ukanak puriyäna, chhujllanakap anqäxaruw puriyarakïna.
[29] Jupanakasti sist'asiñkamaw manq'apxäna, ukhamat Diosax jupanakan munataparjam phuqhäna.
[30] Ukampis, janïraw manq'at awtjatap apartayasipkänti, lakapas manq'ampi phuqhantatäskän ukapachaw
[31] Diosan q'apisiñapax jupanakatak purinïna; wali ch'aman jaqinakaruw jiwarayäna. ¡Israelankir aski chachanakaruw tukusiyäna!
[32] Ukanak uñjkasasa, juch lurasipkakïnwa; janiw Diosan muspharkañ luratanakaparux iyawsapkänti.
[33] Ukat Diosax jupanakar jiwarayäna, mä samsukïkaspas ukhama, wali t'aqhisiñ taypin tukusiyäna.
[34] Diosax jupanakar mutuykäna ukapachakiw juparux thaqhapxäna, jank'akiw Diosar makhatxañatakix thaqhapxäna;
[35] ukapachakiw alaxpachankir Diosat amtasipxäna, ukapachakiw jupanakar imaskatapa, qhispiyatap amuyasipxäna.
[36] Lakakiw juparux parlapxäna, laxrampisti k'arintapxänwa,
[37] janiw chuymanakapan qhan arsupkänti, janirakiw arust'äwiparjamas phuqhapkänti.
[38] Diosasti jupanakat khuyapayasïnwa, ñanqha luratanakap pampachäna, janiw jupanakarux tukjkänti; walja kutiw q'apisiñap t'akurayasïna, janiw phiñasiñapampi atipjayaskänti.
[39] Diosax jupanakan janchïpxatap amtasïna; jan kuttanir thayar uñtatäpxatap amuyarakïna.
[40] ¡Walja kutiw Diosarux jan jaysapkänti, wasarankasaw chuym usuyapxäna!
[41] Wasitatsa, yant'asipkakïnwa; ¡Israelan Qullanaparuw llakisiyapxäna!
[42] Janiw jupanakax amtasipkänti, Diosax uñisiripan amparapat ch'amapamp qhispiykän uka urutxa;
[43] Egipto uraqin muspharkañanak lurkän ukanakata;
[44] jawir umanakar wilar tukuykän ukata, Egiptonkirinakax uka umanak jan umirjamäpkän ukata.
[45] Mich'isir chhichhillankhanakampi, jamp'atunakampi apayanïna, ukanakasti taqi kun manq'antapxäna, tukjapxarakïna;
[46] ch'amapampi achuyat yapunaksti, t'iju t'ijunakaruw katuyäna.
[47] Higo yapunakarux chhijchhimpiw t'unjäna, uva yapunakarusti juyphimpiw tukjäna.
[48] Vaca tamanakapax chhijchhimpiw jiwarapxäna, ovej tamanakapasti q'ixu q'ixumpiw tukusipxäna.
[49] Diosaw jach'a q'apisiñap jupanakatak apayanïna: q'apisiña, juchañchatäña, llakisiñ apayanïna, ukanakax t'unjir khithanakar uñtatäpxänwa.
[50] ¡Ukanak tuqiw Diosax q'apisiñap samarayasïna! Jupanakarux janiw jiwañat qhispiykänti, jan ukasti jiwañaruw katxaruyäna;
[51] ¡pachpa Egipto markan jiwarayäna, sapaqat utankir tayna yuqall wawanakaru!
[52] Israel markarux mä ovej tamar uñtat irpsunïna; tamar uñtat wasar chiqanjam anakïna.
[53] Wali thuriñchat jupanakarux irpäna, jan axsarasipkañapataki, timanakaparusti lamar qutaw p'amp'antäna.
[54] Diosaw markaparux qullan uraqir irpantäna, jupan kutsuyasit qullunakaruw puriyäna.
[55] Israel markan nayraqatapatxa, Tatitur jan uñt'ir markanakarux ananukünwa; ayllunakaparuw uraqinak lakintäna, chhujllanakapan jakayarakïna.
[56] Jupanakasti Alaxpachankir Diosarux, arsutanakapar jan yäqasaw yant'apxäna, qallasipxarakïna;
[57] awkinakapjamaw Diosarux apanukupxäna, maysa uñtapxarakïna; ¡p'akisir mich'i antutt'añar uñtataw k'umthapipxäna!
[58] Jucha lurañ altaranakapampiw Diosarux q'apisiyapxäna, akapach diosanakar yupaychatapampiw Diosan chuymap mayjt'ayapxäna.
[59] Diosax uk uñjasax q'apisïnwa, Israel markarusti apanukupunïnwa,
[60] ukat Siló chiqan utjäwip jaytanukxäna, jaqinak taypin qullan utjäwip apanukxäna.
[61] Aytat kankañ chimpupsa, ch'aman kankañ chimpupsa, timasirinakapampiw apaqayxäna.
[62] Markapatakix wali q'apisitänwa, uñisirinakapampiw q'al atipjayäna.
[63] Waynanakax ninamp nakhantayataw jiwarapxäna; jaqichasir tawaqunakatakix janiw warurt'añanakax utjkxänti;
[64] sacerdotenakax espadamp jiwayatäpxänwa, warminakapasti janiw jupanakat jachapkänti.
[65] Tatitusti ikïwitjam sartäna, vinomp machjat nuwasir jaqjamaw p'arxtäna,
[66] timanakaparux atipjasin alisnuküna; ¡wiñayatakiw p'inqa tukuyäna!
[67] Josean wawanakaparus jaqunukünwa, janirakiw Efraín ayllurus ajllkänti;
[68] Judá aylluruw ajllïna, munat Jerusalén markaparuw chhijlläna.
[69] Qullan utapxa, alaxpachjam jach'a utachäna, uraqjama wiñayatak thuriñchat sayt'ayarakïna.
[70] David uywataparuw ajllisïna, ovej awatirïkän ukaru;
[71] ovej tamanakan qhipap sarañat irpaqanïna, Jacobun markapar awatiñapataki, Israel markan awatiripäñapataki.
[72] Davidasti taqpach chuymampiw Tatitun markapar awatïna; ch'ikhi kankañampiw uñjäna, irparakïna.