[1] Diosaxay, mayisitaxarux ist'akimaya; janikiy jan ist'ir tukumti.
[2] Jaysakitaya, ist'akitaya; llakitäsin mayisinsma. Uñisirixan arupaw axsarayitu, ñanqha lurir jaqinakan wararitanakapaw khathatiyitu. Kunayman llakimpiw apxatapxitu; q'apisiñampiw katjañ munapxitu.
[4] Axsarañat chuymaxax walpun putuqi; jiwayir axsarañaw nayar katuntitu.
[5] Mulljasiñampi axsarañampiw muyuntitu, axsarañat khathatkiriw uñjasta.
[6] Ukat sista: “paloman chhiqhapanikïrista; ukapachax thuqtiristwa, samart'arakiristwa.
[7] Thuqtasax wali jayaruw sarxirista; wasaran jakiriw qhiparxirista.
[8] Kunayman jach'a thayanakatakiw imantasxirista, jach'a tutukanakatakiw jaltxirista” sasa.
[9] Tatay, jupanakarux tukjam, amtäwinakapsa t'unjam, nuwasiñampi uñisisiñampik jupanak taypin uñjta,
[10] uruy arumaw markar muyupayapxi. Markansti jaqi jiwayañampi, ñanqha lurañampikiw utji;
[11] thakhinakapansti, qhuru kankañampi, k'arisiñampikiw phuqhäski.
[12] Uñisirixatix tuqitaspaxa, nayax amukïskiristwa; timaxatix nayatak sayt'aspaxa, jupatakix imantasxiristwa;
[13] ukampis jumaw nayampi chik sarnaqirïtaxa, jumätaw nayan alkatañaxaxa,
[14] jumampiw wali sum parlt'asïyätan; kusisisaw jaqinak taypin Diosan utapar saräyätan.
[15] ¡Jiwax akatjamat uñisirinakaxar katuntpan! ¡Manqhapacharux jakkirpach mantapxpan, ñanqhan chuymapankatap layku!
[16] Nayax Diosarukiw art'asï; Tatitusti qhispiyitaniwa.
[17] Willjtasa, jayp'usa, arumasa, jacht'asisaw jupar yatiyasï. Diosasti mayisitaxarux ist'aniwa.
[18] Nuwasïwinakan imitani; jakañax qhispiyani, uñisirinakaxax waljanïkchi ukasa.
[19] Wiñay jakir Diosaw ist'itu, jupanakarusti aynacht'ayaniwa, sarnaqäwinakapsa janiw chiqachasiñ munapkiti, janirakiw Diosarus axsarapkiti.
[20] Masinakapatakiw amparanakap luqtapxi, arust'äwinakaparus janiw phuqhapkiti.
[21] Arunakapax lik'it sipan juk'ampi quñawa, amuyunakapasti nuwasiñ amuyunakawa. Arsutanakapax aceitet sipan juk'ampi llamp'uwa, ukampis ari espadanakar uñtatawa.
[22] Diosar llakinakam katuyam, jupasti ch'aman tukuyätam; Diosar jaysirin aynacht'añapxa, janipuniw jupax munkaniti.
[23] Diosaxay, k'arinakampi, jaqi jiwayirinakampix janiw jakañapat chikatsa jakapkaniti; jumaw jupanakarux mik'ay manqhar jaquntäta, ukampis nayax jumarukiw katuyassma.