[1] Tatitur yuspagarapxam, jupax khuyapayasiñaniwa, munasiñapax wiñayawa.
[2] Israelitanakax sispan: “Tatitun munasiñapax wiñayawa.”
[3] Sacerdotenakax sispan: “Tatitun munasiñapax wiñayawa.”
[4] Tatitur iyawsirinakax sispan: “Tatitun munasiñapax wiñayawa.”
[5] Llakisiñaxan Tatitur art'asta; jupasti ist'ituwa, qhispiyarakituwa.
[6] Tatitux nayampïskiwa; janiw axsarayasktti. ¿Kamacharakitan jaqisti?
[7] Tatitux nayampïskiwa; jupaw yanapaskitu. ¡Nayar uñisirinakan aynacht'añap uñjä!
[8] Jaqir alkatañat sipanxa, Tatitur alkatañaw juk'amp sumaxa.
[9] Jilïr jaqinakar alkatañat sipanxa, Tatitur alkatañaw juk'amp sumaxa.
[10] Taqi markanakaw muyuntapxitäna, ukanakarusti Tatitun ch'amapampiw atipjta.
[11] Taqi tuqit muyuntapxitäna, Tatitun ch'amapampisti atipjtwa.
[12] Tamurayanakar uñtataw muyuntapxitäna, jupanakasti ch'aphinak taypin nakhir ninjamaw tukusipxäna; ¡Tatitun sutiparuw jupanakarux atipjta!
[13] Wali ch'amampiw tinkuñaxatak nukt'apxitäna, Tatitusti yanapt'iriw jutitu.
[14] Tatituruw nayax jach'añchta, jupaw ch'am churirixaxa. ¡Jupaw qhispiyirixaxa!
[15] Aski jaqinakan utanakapanxa, atipjäwi q'uchunakaw ist'asi: “¡Tatitun ch'aman amparapaw atipjayi!
[16] ¡Tatitun amparapax jan atipjkayawa! ¡Tatitun ch'aman amparapaw atipjayi!” sasa.
[17] ¡Janiw jiwkäti, Tatitun luratanakap yatiyañatakix jakaskakïwa!
[18] Tatitux t'aqhisiyituwa, mutuyarakituwa, ukampis janiw jiwañar katxaruykituti.
[19] ¡Qullan utan punkunakap jist'ararapipxita, Tatitur yuspagaririw mantañ munta!
[20] Akapï Tatitun punkupaxa, uka chiqaw aski jaqinakax mantapxani.
[21] Tatay, nayar ist'atamat yuspagarsma, nayar qhispiyatamat yupaycharaksma.
[22] Utachirinakan jaqunukut qalaxa, wakiskir qalaruw tukxi.
[23] Tatituw ukham luri, ukax jiwasanakatak muspharkayawa.
[24] Tatitux lurkän uka urux jichhüruwa: ¡kusisipxañäni, k'uchirasipxarakiñäni!
[25] Tatay, ¡qhispiyäwim churapxakitaya! ¡Taqi kunar atipt'ayapxakitaya!
[26] ¡Tatitun sutipar jutirix qullanäpan! Tatitun utapatpach jach'añchanipxsma.
[27] Tatituw Diosaxa; jupaw qhant'anistu. Kusisiñ qalltapxam, altar thiyakam layminakamp k'achachapxam.
[28] Tatay, yuspagarsmawa, jumaruw jach'ar aptsma, jumaw nayan Diosaxätaxa.
[29] Tatitur yuspagarapxam, munasirïtap layku, khuyapayasiñapax wiñayawa.