[1] Tatituxay, Qhispiyir Diosaxay, uruy arumaw yanapam maysma,
[2] ¡mayisitaxar jaysakitaya!, ¡arnaqasitaxar ist'akimaya!
[3] Ajayuxax llakinakampi aynacht'atawa, jakañaxasti jiwañar jalantañampiwa;
[4] ¡jiwatanakampi chik jakhutäxtwa, jan ch'aman jaqiw uñjasta!
[5] Jiwatanak taypin jaytanukutätwa; nuwasïwin jiwirinakar uñtatätwa, amay imäwin p'amp'antatanakar uñtatätwa; juman jan tumpatäki jupanakjama, juman armatäki jupanakjama.
[6] Wali mik'ay manqharuw jaquntista, ch'amak manqhanakaruw liwintista.
[7] Nayaruw q'apisiñam samarasista, ¡kunayman jan walinakampiw aynacht'ayista!
[8] Uñt'at masinakaxat jayarst'ayista; jupanakan uñiskay nayarux tukuyista. ¡Jan jaltkir katuntat jaqjamätwa!
[9] Nayranakaxasti jachkäwix juykhuptatawa. ¡Tatay, sapüruw arnaqasinsma, amparanakax juma tuqir luqtansma!
[10] ¿Jiwatanakatakisti muspharkañanak lurasmati? ¿Jiwatanakasti jumar yuspagarapxiristamti?
[11] ¿Chiqa kankañamatsti amay imäwin yatiyasispati? ¿Munasiñamatsti jiwatanak taypin parlasispati?
[12] Taqi kun armt'añ jiwañ ch'amak chiqansti, ¿khitirak chiqa kankañamampita, muspharkañ luräwinakamampit aytanisti?
[13] Nayasti, Tatay, jumaruw art'asinsma, wali willjtat jumar mayisinsma.
[14] Tatay, ¿kunatarak jisk'achistasti? ¿Kunatarak nayatak maysa tuq uñttasti?
[15] Wayna kankañaxatpach llakit uñjasta, niya jiwirpachaw uñjasirakta; axsarkay jan walinak jumat katuqsma, janiw juk'ampi katuqirjamäkxti.
[16] Axsarkañ q'apisiñamax nayxaruw puriwayi, atipjataw uñjasirakta;
[17] uruy arumaw q'añu umar uñtat muyuntitu.
[18] Uñt'at masinakaxa, nayampi chik sarnaqirinak apaqista, jichhasti, ch'amakanakakiw nayampi chik sarnaqirïxi.