<Salmos 110

[1] Tatitux reyixarux sänwa: “Kupïxaxar qunt'asim, timanakamar atipjañaxkama” sasa.

[2] Tatitux Sión qullutpach ch'aman kankañ thujru ayxaruyätam. ¡Jumamp timasirinakarux atipjamaya!

[3] Markamax atipt'añam urunxa, jumaruw katuyasxätam. Qullan qullunak patxanxa, willjta sullar uñtataw wayna kankañamax sapür machaqaptani.

[4] Tatitux mayak arsu, arsutapatsti janiw yaqha amtkiti: “Jumaw wiñay sacerdotëtaxa, Melquisedec sacerdotjama” sasa.

[5] Tatitux kupïxamankaskiwa; q'apisiñap urunxa, reyinakaruw t'unjani;

[6] markanakatakiw juchañchäwinak mistuyani; jaqi jiwatanak arkthapini; ¡uraqpachan p'iqi ch'akhanak p'akirani!

[7] Thakhinsti, jalaskir umat umt'ani, umasti machaq ch'am churani.