<Salmos 61

[1] Diosaxay, ayquskir arnaqasitaxar ist'akimaya, ¡mayisitaxarux jaysakimaya!

[2] Chuymaxan aynacht'atap laykux uraq tukuyatpach jumar art'asinsma. Jach'a qarqa patxaruy sayt'ayita,

[3] jumaw nayan imantasiñaxätaxa. ¡Jumaw timasirixat jark'aqir ch'aman pukarätaxa!

[4] Wiñayatakiw utaman jakañ munta, amparamampi jark'aqataw utjasiñ munta.

[5] Diosaxay, jumaw arsutanakax ist'ista, sutim waqaychirinakan katuqäwip churxarakista.

[6] Reyirux jaya maranak jakañay churam; jupax walja maranakay jakpan,

[7] askinakam katuqasay markarux apnaqpan. Munasiñamampi aski kankañamampi imam;

[8] nayasti sutim jach'aruw aptä, arsutanakaxsti sapüruw phuqharakï.