[1] Diosay, q'apisiñaman jaytanukupxista, q'alpun tukjapxista; ¡jichhasti wasitatay ch'am churapxita!
[2] Uraqirux khathatiytawa, q'awanak jist'artaytaxa; ¡jichhax uka q'awanak jist'antxam, niya alliranttañampïskiwa!
[3] Markamarux jach'a yant'anakampiw t'aqhisiytaxa, luqhiptayir vino umantayapxistaxa.
[4] Arkirinakamarux mä chimpu churtaxa, mich'inakat jaltxapxañapatakiw churtaxa.
[5] ¡Ist'apxakitaya, ch'amamampiy qhispiyapxita! ¡Munatanakamarux qhispiyakimaya!
[6] Diosax qullan utapan sänwa: “¡Kusisisaw Siquem uraq jalanuqä, Sucot qhirwa uraq lakinuqarakï!
[7] Galaad uraqix nayankiwa, Manasés uraqis nayankiwa; Efraín uraqix p'iqixar asxatasiñawa, Judá uraqisti, jilïr kankañ thujruxawa;
[8] Moab uraqix jarisiñ llataxawa; Edom uraq patxaruw wiskhunakax uchasï; ¡Filisteo jaqinakar atipjataxat arnaqasï!” sasa.
[9] ¿Khitirak uyunakampi muyuntat markar irpitanisti? ¿Khitirak Edom uraqkam puriyitanisti?
[10] Diosay, jumax apanukupxistawa, nuwasir tamaxampi chikax janiw mistkxtati.
[11] Uñisirinakaxat arxatapxita, jaqin yanapapax inamayakiwa.
[12] Diosan yanapapampix muspharkañanak lurañäni; ¡jupaw uñisirinakasarux takxatani!