[1] Къорах огъулларынынъ зебуры. Йыр.
[2] РАББИ улудыр! Алламызнынъ шеэринде, Онынъ азиз дагъында Онъа чокъ макътавлар олсун!
[3] Сион дагъы – гузель тёпеликтир, бутюн ер юзюнинъ къуванчыдыр! Онынъ шималь тарафында улу падишанынъ шеэри бар.
[4] Алла онынъ сарайларында къорчалайыджы къале киби белли.
[5] Шунынъ ичюн падишалар топланып, онынъ янына эписи якъынлашты.
[6] Шеэрни корьгенде исе, шаштылар, пек къоркътылар да, къачтылар.
[7] Догъаяткъан къадыннынъ агърысы киби, о ерде оларны къоркъу ве азап къаплады.
[8] Сен, куньдогъуш елини кетирип, Таршиш гемилерини парчалап ташладынъ.
[9] Биз эшиткен шейлерни Алламызнынъ шеэринде, Ордуларнынъ РАББИсининъ шеэринде корьдик. Алла шеэрни эбедиен къавийлештиреджек. Сэла
[10] Эй, Алла, Сенинъ Сарайынънынъ ортасында биз буюк севгинъ акъкъында тюшюнджеге далдыкъ.
[11] Эй, Алла, Сенинъ Адынъ киби, шуретинъ де бутюн ер юзюнде даркъалгъан; Сенинъ онъ къолунъ адалетке толгъан!
[12] Сенинъ адалетли къарарларынъ ичюн, Сион дагъы севинсин, Ехуда къызлары къуванчнен къычырсын!
[13] Сион этрафында кезип, оны айланып чыкъынъыз, къуллелерни сайынъыз.
[14] Онынъ пекитильген ерлерине юрегинъизни чевиринъиз, къуветлештирильген сарайларына бакъынъыз, келеджек несильге шуны айтып беринъиз.
[15] Мына бу Алла эбедиен бизим Алламыздыр, ольгенимиздже О, бизим Ёлбашчымыздыр!