[1] Баш чалгъыджы ичюн. РАББИнинъ къулу акъкъында. РАББИ Давутны эписи душманларындан ве Шаулнынъ къолундан къуртаргъан куню, Давут РАББИге бу йырны йырлады:
[2] Сени севем, я РАББИ! Сен меним къуветимсинъ!
[3] РАББИ – меним къаям, меним къалем ве меним къуртарыджымдыр! Аллам – меним къаям, мен Онъа умют багълайым. О – меним къалкъаным, къуртулышымнынъ къувети, меним юксек, енъильмез керменим!
[4] Макътавгъа ляйыкъ РАББИмни чагъыраджагъым, ве О, мени душманларымдан къуртараджакъ.
[5] Олюм йиплери мени сарып алды, акъсызлыкънынъ дерьялары мени зияде къоркъузды.
[6] Джеэннем зынджыры мени багълады, олюм тузакълары мени якъалады.
[7] Башым беляда къалгъанда, РАББИмни чагъырдым, Алламдан имдат истедим. Сарайындан О, сесимни эшитти, яйгъаргъаным Онынъ къулагъына барып етти.
[8] О, гъазаплангъаны ичюн, ер юзю тепренип титреди, дагъларнынъ темеллери сарсылып, еринден къыбырдады.
[9] Бурнундан тютюн чыкъты, агъзындан эр шейни ёкъ этиджи атеш фышкъырды, алевленген комюр сепильди.
[10] О, коклерни ачып, ашагъы тюшти, аякъларынынъ тюбюнде къаранлыкъ эди.
[11] Керувнынъ устюне минип, учты, ельнинъ къанатларында авеледи.
[12] Озюни къаранлыкънен орьтти, къара, сувдан агъырлашкъан булутларгъа сарылды.
[13] Онынъ къаранлыгъы огюнде йылтырагъан нур джайыла, ондан бурчакъ ве комюр алеви чыкъа.
[14] РАББИ коклерден гудюрдеди, Юдже Алланынъ сеси котерильди, бурчакъ ве атешли комюр ёллады.
[15] О, окълар атып, душманларыны дагъытты, йылдырымнен оларны шашмалатты.
[16] РАББИнинъ къоркъунчлы сесинден, Онынъ ачувлы нефесинден денъизнинъ сув башы ачылды, ер юзюнинъ темеллери корюнди.
[17] Юкъарыдан элини узатып, О, мени алды, терен сувлардан чыкъарды,
[18] кучьлю душмандан сакълады, мени кореджек козю олмагъанлардан, менден кучьлю душманларымдан къорчалады.
[19] Башыма беля тюшкенде, олар манъа уджюм эттилер, лякин РАББИ манъа ярдым этти.
[20] О, мени чаресиз алдан чыкъарды, менден разы олгъаны ичюн, мени къуртарды.
[21] РАББИ инсафлыгъыма коре манъа мукяфат берди, эллеримнинъ темизлигине коре манъа къайтарды.
[22] Мен РАББИнинъ эмирлерини тута эдим, Алламнынъ огюнде яманлыкъ япмадым.
[23] Къарарларынынъ эписи – козюм огюнде, низамнамелеринден чекильмедим мен.
[24] Онынъ огюнде къабаатсыз эдим, гуна япмакътан сакъындым.
[25] РАББИ инсафлыгъыма коре манъа мукяфат берди, Онынъ огюнде эллеримнинъ темизлигине коре манъа къайтарды.
[26] Ишанчлы адамнен Сен ишанчлысынъ, къабаатсыз адамнен – бутюнлей догърусынъ.
[27] Темиз адамнен – темизсинъ, яланджыгъа яланына коре бересинъ.
[28] Алчакъгонъюллини къуртарасынъ, макътангъан адамны исе алчакълатасынъ.
[29] Сен лампадыма нур бересинъ! РАББИ олгъан Аллам къаранлыгъымны айдынлата.
[30] Сенинъ къуветинънен мен ордуларны къырам, Алламнен берабер диварларгъа чыкъам.
[31] Алланынъ ёлу къусурсыздыр! РАББИнинъ сёзю къавийдир! Онъа умют багълагъанларнынъ эписини О, къорчалай!
[32] РАББИден гъайры башкъа Алла бармы? Алламыздан гъайры башкъа сарсылмаз къая бармы?
[33] Алла манъа кучь бере, догъру ёлны косьтере.
[34] Аякъларымны джейран киби тез япа, юксеклерге мени къоя.
[35] Къолларымны дженк этмеге азырлай, эллеримни тунч яйны тартмагъа огрете.
[36] Манъа берильген къуртарувынъ – къалкъан кибидир, онъ къолунъ манъа ярдым эте, мераметинъ мени къуветлештире.
[37] Аякъ тюбюмдеки ёлны кениш япасынъ, аякъларыма таймагъа ёл бермейсинъ.
[38] Душманларымнынъ пешинден къувалайым, артларындан етем. Олар тамамынен гъайып олмагъандже, артыма къайтмайым.
[39] Мен оларны агъыр яралайым. Олар бир даа котерильмейлер, аягъым астына йыкъылалар.
[40] Сен манъа дженк этмек ичюн кучь бересинъ, манъа къаршы исьян котергенлерни огюмде ерге йыкъасынъ.
[41] Душманларымны менден къачмагъа меджбур этесинъ, менден нефретленгенлерни ёкъ этем.
[42] Олар ярдым истейлер, амма оларны къуртаргъан кимсе ёкъ. РАББИни чагъыралар, амма О, оларны эшитмей.
[43] Мен оларны топракъкъа айландырам, ель огюнде тоз киби япам, сокъакъ чамуры киби таптап эзем.
[44] Сен мени халкъымнынъ исьянындан къорчаладынъ. Мени тюрлю миллетлерге башлыкъ этмек ичюн къойдынъ. Мен бильмеген халкъ манъа хызмет эте.
[45] Олар эмирлеримни эшитип, шу ань беджерелер; ябанджылар манъа ялтакъланып бойсуналар.
[46] Ябанджыларнынъ отьлери патлай, къалтырап, сакълангъан ерлеринден чыкъалар.
[47] РАББИ яшай! Онъа, меним Къаяма, шукюрлер олсун! Меним Алламны, Къуртарыджымны, Къаямны шуретленъиз!
[48] Алла, Сен меним ичюн интикъам аласынъ, халкъларны манъа бойсундырасынъ,
[49] мени душманларымдан къуртарасынъ. Манъа къаршы чыкъкъанлардан Сен мени юксельттинъ, мераметсиз адамдан мени къуртардынъ!
[50] Шунынъ ичюн, РАББИ, чешит тюрлю миллетлернинъ огюнде Санъа шукюрлер этеджегим, Адынъа шан йырларыны йырлайджагъым!
[51] Сен Озь падишанъны къуртарасынъ, Озь Месихинъе Давуткъа ве эвлятларына эбедиен Сенинъ севгинъни косьтересинъ!