[1] ఇదిగో, వినండి! ఒక రాజు ధర్మసమ్మతంగా రాజ్యపరిపాలన చేస్తాడు. అధికారులు న్యాయంతో అధికారం చేస్తారు.
[2] ఒక మనిషి గాలికి చాటుగా, గాలివానకు ఆశ్రయంగా ఉంటాడు. మెట్ట ప్రాంతంలో నీటి కాలువలాగా ఉంటాడు. ఆరిపోయిన ప్రదేశంలో గొప్ప బండ నీడలాగా ఉంటాడు.
[3] అప్పుడు చూచేవారి కండ్లు మందంగా ఉండవు. వినేవారి చెవులు ఆలకిస్తాయి.
[4] తొందరపడేవారి మనసుకు జ్ఞానం అర్థం అవుతుంది. నత్తివారి నాలుక తేటగా మాట్లాడుతుంది.
[5] మూర్ఖుణ్ణి ఘనుడని పిలవడం జరగదు. వంచకుణ్ణి ఉదారుడు అనరు.
[6] మూర్ఖుడు మూర్ఖంగా మాట్లాడుతాడు. చెడుగును గురించి ఆలోచిస్తాడు. భక్తిహీనంగా ప్రవర్తిస్తాడు. యెహోవా విషయం తప్పుగా మాట్లాడుతాడు. ఆకలిగొన్నవారి ఆకలి తీర్చడు, దప్పిగొన్నవారికి నీళ్ళు ఇయ్యడు.
[7] వంచకుడి విధానాలు చెడ్డవి. దరిద్రుల ఫిర్యాదు న్యాయంగా ఉన్నా, అబద్ధాలతో ఆ దీనులను నాశనం చేయడానికి వాళ్ళు దురాలోచన చేస్తారు.
[8] ఘనబుద్ధి గలవారు ఘన కార్యాలు కల్పిస్తారు. వారు ఘనకార్యాల కారణంగా నిలిచివుంటారు.
[9] సుఖంగా వ్యర్థంగా బ్రతికే స్త్రీలారా! లేచి నేను చెప్పేది వినండి. నిశ్చింతగా ఉన్న కూతుళ్ళారా! నా మాటలు వినండి.
[10] ఒక సంవత్సరం కొన్ని రోజుల తరువాత ద్రాక్ష పంట కోతకు రాదు. ఏరడానికి పండ్లు ఉండవు, గనుక నిశ్చింతగా ఉన్నవారలారా, మీకు కలత కలుగుతుంది.
[11] సుఖంగా వ్యర్థంగా బ్రతికే స్త్రీలారా, వణకండి! నిశ్చింతగా ఉన్న కూతుళ్ళారా, కంగారుపడండి! మీ బట్టలన్నీ తీసివేసి మీ నడుముకు గోనెపట్ట కట్టుకోండి.
[12] రమ్యమైన పొలాల విషయం, ఫలవంతమైన ద్రాక్షచెట్ల విషయం గుండెలు బాదుకోండి.
[13] నా ప్రజల భూమిలో ముండ్లచెట్లు, గచ్చపొదలు పెరుగుతాయి. దాని విషయం, సంతోషమయమైన ఇళ్ళ విషయం, ఉల్లాసంగా ఉన్న ఈ నగరం విషయం దుఃఖించండి.
[14] నగరు వదలివేయబడుతుంది, జనసమూహాలున్న నగరం విడువబడుతుంది. కొండ, కావలి గోపురం ఎప్పటికీ పాడుగా ఉంటాయి. అవి అడవిగాడిదలకు ఇష్టమైన చోట్లుగా, మందలు మేసే స్థలాలుగా ఉంటాయి.
[15] పైనుంచి ఆత్మను మనమీద కుమ్మరించడం జరిగేవరకూ, ఎడారి ఫలవంతమైన భూమి అయ్యేవరకూ, ఫలవంతమైన భూమి వనం అనిపించుకొనేవరకూ అలా ఉంటుంది.
[16] అప్పుడు నిజాయితీ ఎడారిలో నివసిస్తుంది. న్యాయం ఫలవంతమైన భూమిలో నిలిచి ఉంటుంది.
[17] న్యాయం శాంతిని కలిగిస్తుంది. న్యాయం ఫలితం ఎప్పటికీ నిలిచి ఉండే ప్రసన్నత, నిబ్బరం.
[18] అప్పుడు నా ప్రజలు శాంతిమయమైన నివాసాలలో, సురక్షితమైన ఇళ్ళలో, కలత చెందని విశ్రాంతి స్థలాలలో నివసిస్తారు.
[19] వడగండ్లు అడవిని నేలమట్టం చేసినా, పట్టణం పూర్తిగా కూలిపోయినా,
[20] నీళ్ళున్న స్థలాలన్నిటి దగ్గర విత్తనాలు చల్లుతూ, ఎద్దులనూ గాడిదలనూ తిరగనిస్తూ ఉండే మీరు ఎంత ధన్యజీవులై ఉంటారు!