[1] Sedesiasi sigira masaya la a si san mugan ni kelennan la. A ye san tan ni kelen kɛ masaya la Jerusalɛm. A ba tɔgɔ ko Hamutal, Jeremi min bɔra Libna, o denmuso tun don.
[2] Sedesiasi ye ko jugu kɛ Matigi ɲɛ kɔrɔ ka Jojakim ka siraw taama.
[3] Bɔnɛ sera Jerusalɛm ni Juda bɔnsɔn ma, sabu Matigi diminnen ye u gɛn ka bɔ a ɲɛ kɔrɔ. Ayiwa masakɛ Sedesiasi murutira Babilonɛ masakɛ ma.
[4] Sedesiasi ka masaya san kɔnɔntɔnnan kalo tannan tile tannan don, Babilonɛ masakɛ Nebukadnezar ni a ka kɛlɛbolow bɛɛ taara Jerusalɛm kama. Kaldekaw nana daga sigi dugu da fɛ ka kɛlɛkɛ kogo jɔ k'a kooli.
[5] U dagara Jerusalɛm da la fo ka taa se Sedesiasi ka masaya san tan ni kelennan ma.
[6] O san kalo naaninan tile kɔnɔntɔnnan don, kɔngɔ juguyara dugu kɔnɔ. Dumuni fɛn si tun tɛ mɔgɔw bolo tun.
[7] Kaldekaw ye dugu lamini kogow sɔgɔ. O tuma la kɛlɛkɛ cɛw bɛɛ bolila su fɛ ka bɔ dugu kɔnɔ ka bɔ kogo fila furancɛ da fɛ masakɛ ka nakɔ kɛrɛ fɛ. Ka dugu koolilen to Kaldekaw fɛ, mɔgɔw bolitɔ ye jɛkɛnɛ sira minɛ ka taa.
[8] Nka Kaldekaw ka kɛlɛbolow ye masakɛ nɔgɛn. U kura Sedesiasi la Jeriko jɛkɛnɛ la, a ka kɛlɛbolow bɛɛ bolila ka jɛnsɛn k'a to yen.
[9] Kaldekaw ye masakɛ Sedesiasi minɛ ka taa n'a ye Babilonɛ masakɛ yɔrɔ Ribla, Hamat jamana la. Masakɛ Nebukadnezar ye kiri tigɛ a kan yen.
[10] Babilonɛ masakɛ ye masakɛ Sedesiasi denkɛw faga a ɲɛ kɔrɔ yen ka Juda bɔnsɔn ka kuntigiw fana faga Ribla yen.
[11] O kɔ, a ye Sedesiasiɲɛ fila ci k'a don nsiranɛgɛ jɔlɔkɔw la. Babilonɛ masakɛ taara n'a ye Babilonɛ k'a mara kaso la yen fo ka taa se a sa don ma.
[12] Babilonɛ masakɛ Nebukadnezar ka masaya san tan ni kɔnɔntɔnnan kalo duurunan tile tannan don, masakɛ ka kɛlɛbolow kuntigi Nebuzar-Adan donna Jerusalɛm.
[13] A ye Matigi batosoba ni masaya sow ani Jerusalɛm sow bɛɛ jeni ni tasuma ye. A ye tasuma tugu mɔgɔbaw ka sow bɛɛ la.
[14] O kɔ, Kaldekaw ka kɛlɛbolo minw tun bɛ kuntigi Nebuzar-Adan kɔrɔ, olu ye Jerusalɛm lamini kogow bɛɛ ci.
[15] Faantanw ni mɔgɔ tɔ minw tora dugu kɔnɔ, ani minw taara kolo Babilonɛ masakɛ ye, ani jamana kɔnɔ mɔgɔ tɔ tolenw, Nebuzar-Adan ye olu cɛ ka taa.
[16] Nka Nebuzar-Adan ye faantan dɔw to Juda jamana kɔnɔ ka kɛ rezɛn nakɔ sɛnɛbaaw ni foro sɛnɛkɛlaw ye.
[17] Nsiranɛgɛ samasen minw tun bɛ Matigi batosoba kɔnɔ ani wotoro misɛnw ni nsiranɛgɛ koli faa, Kaldekaw ye olu bɛɛ karikari ka taa ni o nsiranɛgɛ bɛɛ ye Babilonɛ.
[18] U taara ni nsiranɛgɛ minanw bɛɛ fana ye, bugurijɛ cɛlanw ni peluw ni muruw ni jifilenw ni tasaw.
[19] Garadiw kuntigi taara ni sanu minanw ni warijɛ minanw caman ye, tasaw ni wusulan dagaw ni koli minanw ni bugurijɛ cɛlanw ni lanpaw ni jifilenw ani bɛɛlɛw.
[20] Masakɛ Solomani tun ye nsiranɛgɛ samasen fila ani koli faaba ani nsiranɛgɛ ntura bisigi tan ni fila minw kɛ koli faaba jusigilanw ye Matigi batosoba ye, mɔgɔ si tun tɛ se ka o nsiranɛgɛ pese ka o kilo dama dɔn.
[21] O samasen bɛɛ kelen-kelen jɔ kundama tun ye nɔnkɔnɲɛ tan ni segin ye. U bɛɛ kelen-kelen lamini jurukisɛ tun ye nɔnkɔnɲɛ tan ni fila ye. Wo tun bɛ samasen bɛɛ kelen-kelen kɔnɔ. U kolo giriya tun ye bolonkɔni den naani da yɔrɔ ye.
[22] Nsiranɛgɛ kunna birilan tun bɛ u bɛɛ kelen-kelen kun na. Olu jɔ kundama tun ye nɔnkɔnɲɛ duuru ye. Nsiranɛgɛ jɔ bisigi ni gerenatiden bisigi tun kɛra ka o kunna birilanw lamini. Samasen fila bɛɛ tun ka kan ani u masiri fɛnw fana.
[23] Gerenatiden bisigi kɛmɛ tun bɛ jɔw bisigi la k'u lamini.
[24] Garadiw kuntigi ye sarakalasebaaw kuntigi Seraja ani sarakalasebaa Sofoni ani yɔrɔ senuma dakɔlɔsibaa saba minɛ.
[25] A ye dugu kɔnɔ kɛlɛdenw kuntigi dɔ ani masakɛ ka seere mɔgɔ wolonwula minɛ ani kɛlɛbolow kuntigi ka sɛbɛnnikɛla min tun bɛ jamana kɔnɔ mɔgɔw tɔgɔw sɛbɛn ani jamana kɔnɔ cɛ biwɔɔrɔ minw tun bɛ dugu kɔnɔ, a ye olu bɛɛ minɛ.
[26] Garadiw kuntigi Nebuzar-Adan taara ni o mɔgɔ minɛlenw bɛɛ ye Babilonɛ masakɛ yɔrɔ Ribla.
[27] Babilonɛ masakɛ ye u bɛɛ gosi ka u faga Hamat jamana la Ribla. Ayiwa Juda bɔnsɔn cɛra ka mabɔ u ka jamana la ka taa jɔnya la yɔrɔ jan.
[28] Babilonɛ masakɛ ye mɔgɔ minw minɛ ka taa jɔnya la, olu dama filɛ ninw ye. A ka masaya san wolonwulanan la, a ye Yahutuw mɔgɔ waa saba ni mugan ni saba minɛ.
[29] A ka masaya san tan ni seginnan la, a ye mɔgɔ kɛmɛ segin ani bisaba ni fila cɛ ka bɔ Jerusalɛm ka taa.
[30] A ka masaya san mugan ni sabanan la, garadiw kuntigi Nebuzar-Adan taara ni Yahutu mɔgɔ kɛmɛ wolonwula ni binaani ni duuru ye. O bɛɛ lajɛlen ye mɔgɔ waa naani ani kɛmɛ wɔɔrɔ ye.
[31] Juda bɔnsɔn ka masakɛ Jojaken ka jɔnya san bisaba ni wolonwulanan la san kalo tan ni filanan tile mugan ni duurunan don, Babilonɛ masakɛ Evil-Merodak ka masaya san fɔlɔ la, ale ye Jojaken lahinɛ k'a labɔ kaso la.
[32] A ye kuma duman fɔ a ye. Masakɛ tɔ minw tun bɛ a fɛ Babilonɛ, a ye Jojaken bonya ka tɛmɛn olu bɛɛ kan.
[33] A ye kasola dulɔki bɔ Jojaken kan na. Jojaken ye dumuni kɛ masakɛ fɛ a si tilew bɛɛ la.
[34] Babilonɛ masakɛ ye Jojaken magoɲɛ don o don fo ka taa a sa.