[1] Matigi ka kuma sera Jeremi ma tuma min na ni masakɛ Sedesiasi ye Malkija denkɛ Pashur ni Maseja denkɛ sarakalasebaa Sofoni ci ka taa fɔ Jeremi ye, ko:
[2] «I ka Matigi ɲininka an ye, k'a masɔrɔ Babilonɛ masakɛ Nebukadnezar bɛ an kɛlɛ. A dɔrɔ Matigi na kabako dɔ kɛ, walisa Nebukadnezar ka mabɔ an na.»
[3] Jeremi y'a fɔ u ye ko u ka Sedesiasi jaabi ko:
[4] «Matigi Israɛl ka Ala ko: ‹Aw tun ye Babilonɛ masakɛ ani Kaldekaw gɛn ni kɛlɛkɛ minan minw ye, ne na o kɛlɛkɛ minanw lajɛ dugu cɛmancɛ la.
[5] Ne yɛrɛ na aw kɛlɛ ka ne barika ni ne ka kɛta jira aw la. Ne diminnenba ni ne dusu bɔlenba na o kɛ.
[6] Ne na nin dugu kɔnɔ fɛnw gosi, baganw fara mɔgɔw kan, u bɛɛ na faga fiɲɛbana jugu fɛ.›
[7] Matigi ko: ‹O kɔ, Juda ka masakɛ Sedesiasi ni a ka kuntigiw ani dugu kɔnɔ mɔgɔ minw kisira fiɲɛbana ni npan ani kɔngɔba ma, olu na don Babilonɛ masakɛ bolo. Ɔwɔ, ne na u don u juguw bolo, olu minw b'a fɛ ka u faga. Nebukadnezar na u bɛɛ faga ni npan ye. A tɛna hinɛ u la, a tɛna makari mɔgɔ si la. U si tɛna kisi.›»
[8] Ayiwa i k'a fɔ nin mɔgɔw ye ko Matigi ko: «A filɛ, ne bɛɲɛnamaya sira ni saya sira bila aw ɲɛ kɔrɔ bi.
[9] Ni mɔgɔ o mɔgɔ tora nin dugu kɔnɔ, npan ni kɔngɔba ani fiɲɛbana na o faga, nka ni mɔgɔ min bɔra ka taa a yɛrɛ di Kaldekaw ma, o na kisi. A yɛrɛ ni na kɛ a ka tɔnɔ sɔrɔlen ye.
[10] K'a masɔrɔ ne ye neɲɛ cɛ ka bɔ nin dugu la ka ko jugu kɛ a la. Hinɛ tɛna kɛ a la. Babilonɛ masakɛ na se sɔrɔ nin dugu kan k'a jeni ni tasuma ye.» Matigi ko ten.
[11] I k'a fɔ Juda bɔnsɔn ka masakɛ ka so ye ko a ka Matigi ka kuma lamɛn.
[12] Matigi ko: «Dawuda ka so, i ka tilennenya sira taama kabini sɔgɔma da fɛ. Binkanni kɛra mɔgɔ min na, aw ka o tila ka bɔ binkannikɛla bolo, walisa ne ka dimiya kana mana i ko tasumaba min bɛ jenili kɛ, ni mɔgɔ tɛ se ka a dufa aw ka kɛwale juguw kosɔn.»
[13] Matigi ko: «Dugu min sigilen bɛ farakurun kan jɛkɛnɛ la, ne bɛ i kama. Aw minw b'a fɔ ko: ‹Jɔn bɛ se ka an kɛlɛ? Jɔn bɛ se ka don an sigi yɔrɔw la?› Ne diminna aw kɔrɔ.»
[14] Matigi ko: «Ne na aw sara ka kɛɲɛ ni aw ka kɛwalew ye. Ne na tasuma tugu nin dugu la k'a yɔrɔ bɛɛ jeni i ko tasuma bɛ kungokolon jeni cogo min na.»