[1] Matan denkɛ Sefatiya ni Pashur denkɛ Gedaliya ni Selemiya denkɛ Jukal ani Malikija denkɛ Pashur, olu y'a mɛn ko Jeremi b'a fɔ mɔgɔw bɛɛ ye, ko:
[2] «Matigi ko: ‹Ni mɔgɔ min tora dugu kɔnɔ, o tigi na faga npan ni kɔngɔba ni fiɲɛbana fɛ, nka ni min bɔra ka taa a yɛrɛ di Kaldekaw ma, o tigi na kisi. O niyɔrɔ na kɛ a yɛrɛ ni kisili ye.›
[3] Matigi y'a fɔ fana ko: ‹Siga t'a la, nin dugu na don Babilonɛ masakɛ ka kɛlɛbolo bolo. U na a minɛ.›»
[4] O tuma la kuntigiw y'a fɔ masakɛ ye ko: «An ka nin cɛ faga, sabu kɛlɛkɛ cɛ minw bɛ dugu kɔnɔ, a bɛ olu ni mɔgɔ tɔw bɛɛ hakili tiɲɛn ni a ka kuma ye. Nin cɛ t'a fɛ nin mɔgɔw ko ka nɔgɔya, nka a b'a fɛ ka a juguya.»
[5] Masakɛ Sedesiasi y'u jaabi ko: «A filɛ aw bolo, min ka di aw ye, aw ka o kɛ a la, sabu masakɛ tɛ se ka aw sɔsɔ foyi la.»
[6] O tuma la u ye Jeremi minɛ k'a fili masakɛ denkɛ Malikija ka dingɛ kɔnɔ. O bɛ kasobon dukɛnɛ la. U ye Jeremi lajigin ni jurukisɛ ye. Ji tun tɛ o dingɛ kɔnɔ, nka bɔgɔ tun b'a la. Jeremi coronna o bɔgɔ la.
[7] Masakɛ ka so kɔnɔ jalatigiba Ebɛd-Melɛk min bɔra Etiopi, o y'a mɛn ko u ye Jeremi fili dingɛ kɔnɔ, k'a sɔrɔ masakɛ sigilen bɛ Benjamɛn bɔnsɔn ka donda la.
[8] Ebɛd-Melɛk bɔra masaya so kɔnɔ ka kuma masakɛ fɛ, ko:
[9] «Ne kuntigi masakɛ. Nin mɔgɔw ye ko jugu kɛ ka kira Jeremi minɛ k'a fili dingɛ kɔnɔ. Kɔngɔ na a faga yen, sabu dumuni fɛn tɛ dugu kɔnɔ.»
[10] O tuma la masakɛ ye ci di Etiopi Ebɛd-Melɛk ma ko a ka cɛ bisaba ta ka taa Jeremi labɔ dingɛ kɔnɔ sani a ka sa.
[11] Ebɛd-Melɛk taara ni o cɛw ye masaya so kɔnɔ nafolo mara yɔrɔw la. U ye finikolonw ni dulɔki kɔrɔ dɔw ta yen ka olu lajigin dingɛ kɔnɔ ni jurukisɛ ye ka u di Jeremi ma.
[12] Etiopi Ebɛd-Melɛk y'a fɔ Jeremi ye ko: «I ka nin finikolonw ani nin dulɔki kɔrɔw siri i kaman kɔrɔ.» Jeremi ye o kɛ.
[13] O kɔ, u ye Jeremi sama ka bɔ dingɛ kɔnɔ. Jeremi tora kasobon dukɛnɛ la yen.
[14] Masakɛ Sedesiasi ye ci bila ka taa kira Jeremi wele ka taa n'a ye Matigi batosoba donda sabanan la. Masakɛ y'a fɔ Jeremi ye ko: «Ne b'a fɛ ka i ɲininka ko dɔ la. I kana foyi dogo ne la.»
[15] Jeremi ye masakɛ Sedesiasi jaabi, ko: «Ni ne ye o fɔ i ye, i tɛna ne faga wa? Ni ne bɛ i laadi, i tɛna sɔn ka ne lamɛn.»
[16] Masakɛ Sedesiasi y'i kali Jeremi ye dogo la, ko: «Matigi ɲɛnama tɔgɔ kosɔn, o min ye ni don an na, ne tɛna i faga. Minw b'a fɛ ka i faga, ne tɛna i don olu bolo fana.»
[17] O tuma la Jeremi y'a fɔ Sedesiasi ye, ko: «Kɛlɛbolow Matigi, Israɛl ka Ala ko: ‹Ni i taara i yɛrɛ di Babilonɛ masakɛ ka faamaw ma, i ɲɛnama na to, nin dugu fana tɛna jeni ni tasuma ye. I ni i ka gwaɲɛnama na to.
[18] Nka ni i ma taa i yɛrɛ di Babilonɛ masakɛ ka faamaw ma, dugu na don Kaldekaw bolo, u na a jeni. E fana tɛna kisi u ma.›»
[19] Masakɛ Sedesiasi y'a fɔ Jeremi ye ko: «Yahutu minw taara u yɛrɛw di Kaldekaw ma ka ban, ne bɛ siran olu ɲɛ. Ne bɛ siran ko u na ne don olu bolo ka ne tɔɔrɔ.»
[20] Jeremi y'a jaabi ko: «I tɛna don olu bolo. Ayiwa, i ka Matigi ka kuma lamɛn sa. Ne b'a fɔ i ye ko i na hɛrɛ sɔrɔ, i ni na kisi.
[21] Nka ni i ma sɔn ka bɔ dugu kɔnɔ, Matigi ye min jira ne la, o filɛ nin ye.
[22] Ko muso minw bɛ Juda bɔnsɔn ka masaya so kɔnɔ, u bɛ taa ni olu ye Babilonɛ masakɛ ka kuntigiw yɔrɔ. O musow taatɔ bɛ nin dɔnkili da, ko: ‹Minw ye hɛrɛ ko fɔ i ye, olu ye i janfa ka se sɔrɔ i kan, kabini i sen coronna bɔgɔ la, u ye u kɔ sin i ma.›»
[23] Jeremi y'a fɔ fana ko: «I musow ni i denw bɛɛ na minɛ ka taa Kalde jamana la. I yɛrɛ tɛna tila u la nka i na minɛ Babilonɛ masakɛ fɛ. I ka ko n'a to nin dugu ka jeni ni tasuma ye.»
[24] O tuma la Sedesiasi ye Jeremi jaabi ko: «I kana a to mɔgɔ si k'a dɔn ko e ni ne kumanaɲɔgɔn fɛ. I tɛna faga.
[25] Nka ni kuntigiw y'a dɔn ko ne kumana i fɛ, ni u nana i sɛgɛrɛ ka i ɲininka ko i ye min fɔ masakɛ ye ani masakɛ ye min fɔ i ye, i ka o fɔ an ye. I kana o si dogo an na, i tɛna faga.
[26] Ayiwa, i ka u jaabi ko, i ye masakɛ deli ko a kana i bila ka taa Jonatan ka so kɔnɔ tun, i kana na sa yen.»
[27] Kuntigiw nana Jeremi sɛgɛrɛ k'a ɲininka. A ye u jaabi ka kɛɲɛ ni masakɛ ka kuma fɔlen ye. O tuma la u y'a to yen sabu u tun ma o ko dɔn.
[28] Ayiwa Jeremi tora kasobon dukɛnɛ la fo ka taa se Jerusalɛm minɛ don ma. A tun bɛ yen dugu minɛ tuma la.