[1] E, ni a tun kɛra ko ne kunkolo tun ye ji boyi ye, ni neɲɛw tun kɛra ji boyi furufuruta ye. O tuma la ne ka mɔgɔ minw fagara, ne tun na olu su kasi su fara tile kan.
[2] Ni ne tun bɛ se ka mɔgɔ foninenw ka dogo yɔrɔ sɔrɔ kungokolon kɔnɔ, ne tun na ne ka mɔgɔw bila ka mabɔ u la, k'a masɔrɔ u bɛɛ ye jatɔyakɛlaw ye, janfanciw don.
[3] Matigi ko: «U nɛnkun labɛnnen don ka nkalon tigɛ tuma bɛɛ. U jiidira jamana kɔnɔ, nka o ma kɛ tiɲɛ kan. Ne ka mɔgɔw bɛ ko jugu kɛ ka ta'a fɛ, u ma ne dɔn.
[4] U bɛɛ kelen-kelen ka u yɛrɛw kɔlɔsi u teriw la, u si kana u jigi da u balimaw kan, k'a masɔrɔ balima bɛ a balima lafili, teriw bɛɛ bɛɲɔgɔn tɔgɔ tiɲɛn.
[5] U bɛɛ bɛ u sigiɲɔgɔn lafili, u tɛ tiɲɛ fɔ. U bɛɛ bɛ lafilili kɛ ni u da ye, u bɛɛ bɛ u yɛrɛw jija kojugukɛli la.
[6] I sigilen bɛ nanbaratɔw cɛma. U ka nkalon kosɔn, u ma sɔn ka ne dɔn.» Matigi ko ten.
[7] O de y'a to Kɛlɛbolow Matigi ko: «A filɛ, ne na u yeele i n'a fɔ warijɛ ka u kɔrɔbɔ. Ne bɛ se ka mun fɛn wɛrɛ kɛ ne ka mɔgɔw ka juguya kosɔn?
[8] U nɛnkun ye mɔgɔ faga biɲɛkisɛ ye min bɛ nkalon tigɛ. U da bɛ hɛrɛ kuma fɔ u mɔgɔɲɔgɔn ye, k'a sɔrɔ jan dogolen bɛ u dusukun na.»
[9] Matigi ko: «Ne tɛna u tɔɔrɔ ka kɛɲɛ ni u ka ko jugu ye wa? Ne tɛna ne hakɛ bɔ o siya sifa la wa?
[10] «Ne na kulokan ni nwunankan bɔ kuluw kosɔn, ne na maɲumatɔkan fɔ kungokolon la baganw gɛn yɔrɔw kosɔn, sabu tasuma ye u bɛɛ jeni ka u ban. Mɔgɔ si tɛna tɛmɛn yen tun. Bagankulu mankan tɛna mɛn yen tun, sanfɛ kɔnɔw ni kungo sogow bɛɛ bolila ka taa.»
[11] Matigi ko: «Ne na Jerusalɛm kɛ tomon ye, a na kɛ kungo wuluw dogo yɔrɔ ye. Ne na Juda bɔnsɔn ka duguw kɛ kungokolon ye, mɔgɔ si tɛna sigi u kɔnɔ tun.»
[12] Mɔgɔ hakilitigi dɔ bɛ yen min bɛ se ka o kow ɲɛ fɔ wa? Matigi kumana mɔgɔ min fɛ, o tigi ka o kow lakali sa. Mun de y'a to jamana halakira ka jeni i ko kungokolon, fo mɔgɔ si tɛ a cɛ tigɛ tun?
[13] Matigi ko: «O kow kɛra, sabu ne tun ye ne ka sariya min di u ma, u banna o la. U ma sɔn ka ne kan lamɛn, u ma sɔn ka tugu ne la.
[14] Nka u tugura u yɛrɛw dusukun gɛlɛnw nɔ fɛ ka bato fɛn fufafuw bato, u bɛnbaw tun ye u kalan olu minw na.»
[15] O de kosɔn Kɛlɛbolow Matigi, Israɛl ka Ala ko: «Ne na nin mɔgɔw balo tale dili la ka ji bagama di u ma.
[16] U ni u bɛnbaw ma siya minw dɔn, ne na u jɛnsɛn olu cɛma. Ne na tugu u nɔ fɛ ni npan ye ka u bɛɛ halaki ka u ban.»
[17] Ayiwa Kɛlɛbolow Matigi ko: «Aw ka taa su kasi musow ɲini ka u wele, minw bɛ su kasi la, aw ka olu wele ka na.
[18] Olu ka u tɛliya ka na, an ka u kasikan lamɛn. Ɲɛji ka jigin ka bɔ anɲɛw la, ji ka woyo ka bɔ anɲɛwolow jukɔrɔ.»
[19] Tiɲɛ la, an bɛ kasikan mɛn ka bɔ Sion. An tiɲɛnna tan cogo di? An maloyara ka an kun suuli tan cogo di? An bɛ jamana bila, sabu an sigi yɔrɔw cira.
[20] Musow, a' ye aw tulo majɔ Matigi ka kuma la, a da bɛ min fɔ, aw tulo ka o mɛn. A' ye aw denmusow kalan su kasi cogo la. Aw bɛɛ kelen-kelen kaɲɔgɔn kalan maɲumatɔkan fɔ cogo la.
[21] Saya yɛlɛnna fo ka don an ka finɛtiriw fɛ. A donna an ka masa sow kɔnɔ. A bɛ an ka denmisɛnw bɛɛ halaki dugu bɔlɔnw na ka kamalenw faga fɛrɛkɛnɛw la.
[22] I k'a fɔ u ye ko, Matigi ko: «Mɔgɔw suw na bi duguma i ko foro la nɔgɔ. U na kɛ i ko suman nɔɔrɔ min bɔnna sumantigɛlaw kɔ, mɔgɔ si tɛna u tɔmɔ.»
[23] Matigi ko: «Hakilitigi kana a yɛrɛ bonya a ka hakilitigiya kosɔn, barikatigi kana a yɛrɛ bonya a ka barika kosɔn, nafolotigi kana a yɛrɛ bonya a ka nafolo kosɔn.
[24] Nka mɔgɔ min bɛ a yɛrɛ bonya, o k'a yɛrɛ bonya ne dɔnniya faamuli kosɔn. Ne ye Matigi ye min bɛ makari ni tiɲɛ ni tilennenya kow kɛ dugukolo kan. Oɲɔgɔn dɔnniya kow ka di ne ye.» Matigi ko ten.
[25] Matigi ko: «A filɛ, don bɛ na, minw bolokora k'a sɔrɔ u dusukun ma boloko, ne na olu bɛɛ tɔɔrɔ,
[26] Misirakaw ni Juda bɔnsɔn ni Edɔmkaw ni Amɔn bɔnsɔn ni Moab bɔnsɔn ani mɔgɔ minw sigilen bɛ kungokolon kɔnɔ, ni olu bɛ u kun kɔrɔbɔ, o siyaw si ma boloko Matigi ye. Israɛl bɔnsɔn ka so mɔgɔw dusukun fana ma boloko.»