[1] Cɛkɔrɔba tɔ minw ɲɛnama bɛ jɔnya la ani sarakalasebaaw ni kiraw ani mɔgɔ tɔ minw cɛra masakɛ Nebukadnezar fɛ ka taa jɔnya la Babilonɛ, kira Jeremi ye sɛbɛn ci olu ma k'a to Jerusalɛm.
[2] O sɛbɛn cira k'a sɔrɔ masakɛ Jekoniya ni a ba ni kuntigiw ani Juda bɔnsɔn kuntigiw ni Jerusalɛm kuntigiw ni jiri dɛsɛlaw ni maɲɛrɛ dɔnnaw cɛra ka bɔ Jerusalɛm ka taa jɔnya la.
[3] O sɛbɛn donna Safan denkɛ Eleasa ani Hilkija denkɛ Gemariya bolo. Juda bɔnsɔn ka masakɛ Sedesiasi ye olu ci Babilonɛ masakɛ Nebukadnezar yɔrɔ. O sɛbɛn kɔnɔ kuma filɛ nin ye.
[4] Kɛlɛbolow Matigi, Israɛl ka Ala ko: «Ne ye mɔgɔ minw cɛ ka bɔ Jerusalɛm ka taa jɔnya la Babilonɛ, ne b'a fɔ aw bɛɛ ye, ko
[5] aw ka sow jɔ ka sigi olu kɔnɔ ka nakɔw turu ka o nakɔ fɛnw mɔ dun.
[6] Aw ka musow furu ka denkɛw ni denmusow sɔrɔ. Aw ka musow furu aw denkɛw ye ka aw denmusow di cɛw ma, walisa olu ka denkɛw ni denmusow sɔrɔ, walisa aw ka to ka caya jamana kɔnɔ, aw kana dɔgɔya.
[7] Ne ye aw sigi dugu minw kɔnɔ, aw ka ko ɲuman kɛ olu kɔnɔ ka Matigi deli o dugu ka hɛrɛ ko la, sabu o dugu ka hɛrɛ ye aw ka hɛrɛ ye.»
[8] Kɛlɛbolow Matigi, Israɛl ka Ala ko: «Kiraw ni filɛlikɛla minw bɛ aw cɛma, aw kana sɔn olu ka aw lafili. Aw kana u ka sugow lamɛn.
[9] K'a masɔrɔ o mɔgɔw bɛ nkalon kiraya kɛ ne tɔgɔ la k'a sɔrɔ ne ma u ci.» Matigi ko ten.
[10] Ayiwa Matigi ko: «Ni san biwolonwula dafara ka aw to Babilonɛ tuma min na, ne ye kuma min fɔ aw ko la, ne na o dafa ka aw lasegin nin jamana kɔnɔ ko kura.
[11] Katuguni ne ye ko minw latigɛ aw ye, ne bɛ o dɔn.» Matigi ko: «Ne na hɛrɛ kɛ aw ye, bɔnɛ tɛna aw sɔrɔ, ne na jigiɲuman ni laban ko ɲuman di aw ma.
[12] O tuma la aw na ne tɔgɔ wele, aw na segin ka na yan. Aw na ne deli, ne na aw jaabi.
[13] Aw na ne ɲini, aw na ne ye, k'a masɔrɔ aw na ne ɲini ni aw dusukun bɛɛ ye.»
[14] Matigi ko: «Ne na kɛ aw cɛma ka aw ka mɔgɔ minɛlenw labɔ jɔnya la, ne ye aw jɛnsɛn ka taa siya minw cɛma ani yɔrɔ minw bɛɛ la, ne na aw lasegin ka bɔ yen.
[15] «Aw b'a fɔ ko Matigi ye kira dɔw lawuli aw ye Babilonɛ.
[16] Nka masakɛ min sigilen bɛ Dawuda ka masasigilan kan ani mɔgɔ minw sigilen bɛ nin dugu kɔnɔ ani aw balima minw ma minɛ ka taa jɔnya la,
[17] Kɛlɛbolow Matigi b'a fɔ olu ko la ko: ‹A filɛ, ne na npan ni kɔngɔba ani fiɲɛbana ci olu kama ka olu kɛ i ko toro mɔ tolilen minw tɛ se ka dun u juguya kosɔn.
[18] Ne na npan ni kɔngɔba ani fiɲɛbana ci u ma ka u kɛ siranfɛnba ye dugukolo kan masayaw bɛɛ cɛma. Ne ye u gɛn ka taa siya minw bɛɛ cɛma, u na kɛ dangali fɛn ni kabako fɛn ni dala file fyɛ fɛn ni mafiɲɛyali fɛn ye o yɔrɔw la.›
[19] Matigi ko: ‹Ne tun bɛ ne ka baaraden kiraw ci u ma tuma bɛɛ ka ne ka ci fɔ u ye, nka u ma ne ka kuma lamɛn. U ma sɔn ka u tulo majɔ ne ka kuma la.› Matigi ko ten.
[20] «Nka Matigi ko: ‹Ne ye aw minw gɛn ka bɔ Jerusalɛm ka taa jɔnya la Babilonɛ, aw ka ne ka kuma lamɛn.›
[21] Kolaja denkɛ Akab ni Maseaja denkɛ Sedesiasi minw bɛ nkalon kiraya kɛ aw ɲɛ na ne tɔgɔ la, Kɛlɛbolow Matigi, Israɛl ka Ala b'a fɔ olu ko la, ko: ‹Ne na u don Babilonɛ masakɛ Nebukadnezar bolo. O na u faga aw ɲɛ kɔrɔ.
[22] Juda bɔnsɔn minw taara jɔnya la Babilonɛ, u na kɛ dangali fɛn ye olu cɛma.› U n'a fɔ ko: ‹Babilonɛ masakɛ ye Sedesiasi ni Akab ɲɛnama jeni cogo min na, Matigi ka i kɛ ten,
[23] sabu u ye hakilintanya kow kɛ Israɛl bɔnsɔn cɛma ka jatɔya kɛ u sigiɲɔgɔn musow fɛ ka kiraya kɛ ne tɔgɔ la ni nkalon ye, k'a sɔrɔ ne ma kuma u fɛ, ne ma u ci.› Matigi ko: ‹Ne bɛ o dɔn, ne ye o seere ye.›»
[24] Semaɛja min bɔra Nekelam, i k'a fɔ o ye ko:
[25] «Kɛlɛbolow Matigi, Israɛl ka Ala ko: ‹I ye sɛbɛnw ci Jerusalɛmkaw ni Maseaja denkɛ sarakalasebaa tɔw ma i yɛrɛ tɔgɔ la. I y'a fɔ Sofoni ye ko:
[26] «Matigi ye e, Sofoni sigi ka i kɛ sarakalasebaa ye Jehojada nɔ na, ka i kɛ Matigi ka batosoba kɔlɔsibaa ye, walisa fatɔ o fatɔ b'a yɛrɛ kɛ kira ye, i ka o siri nɛgɛ jɔlɔkɔ la k'a bila kaso la.
[27] Ayiwa Jeremi min bɔra Anatɔt, o ye kiraya kɛ aw ɲɛ na, mun kosɔn i ma o siri?
[28] Sabu o de ye sɛbɛn ci an ma Babilonɛ, ko an na mɛn jɔnya la kosɛbɛ, ko an ka sow jɔ k'an sigi yen ka jiriw turu ka o jiri mɔw dun.» ›»
[29] Ayiwa sarakalasebaa Sofoni ye o sɛbɛn kalan kira Jeremiɲɛ na.
[30] O tuma la Matigi ka kuma sera Jeremi ma, ko:
[31] «I ka ci bila k'a fɔ jɔnyadenw bɛɛ ye ko: ‹Semaɛja min bɔra Nekelam,› Matigi b'a fɔ o ka la, ko: ‹Semaɛja ye kiraya kɛ aw ye, k'a sɔrɔ ne m'a ci. A y'a to aw ka aw jigi da nkalon kan.›
[32] O de kosɔn, Matigi ko: ‹Semaɛja min bɔra Nekelam, ne na o ni a bɔnsɔn sara. A bɔnsɔn la mɔgɔ si tɛna sɔrɔ nin mɔgɔw cɛma tun.› Matigi ko: ‹Ne bɛ na ko ɲuman min kɛ ne ka mɔgɔw ye, a yɛrɛ tɛna o ye, sabu a ye nkalon tigɛ ka muruti Matigi ma.›»