[1] Benjamɛn bɔnsɔn, aw ka boli ka bɔ Jerusalɛm. Aw ka buru fyɛ Tekoa ka taamashyɛn kɔrɔta Bɛt-Hakerɛm san fɛ, k'a masɔrɔ bɔnɛ ni tiɲɛnni koba bɛ na ka bɔ saheli yanfan fɛ.
[2] Ne na Sion cɛɲiɲɛ sumalen halaki.
[3] Saga gɛnnaw ni u ka sagaw na taa a kama ka u ka finisow sigi k'a lamini. U bɛɛ ka sagaw na bin dun u ka yɔrɔw la.
[4] Aw ka aw labɛn ka Sion kɛlɛ. Aw ka wuli, an ka taa a kama tile gwan fɛ. E, tile bɛ jigin, ja bɛ janya.
[5] A' ye wuli, an ka yɛlɛn ka taa su fɛ k'a ka masaya sow ci.
[6] K'a masɔrɔ Kɛlɛbolow Matigi ko: «Aw ka jiriw tigɛ ka yɛlɛnyɛlɛnnanw jɔ Jerusalɛm la. Nin dugu ka kan ka tɔɔrɔ, katuguni foyi tɛ a kɔnɔ binkanni kɔ.
[7] Ji boyi bɛ ji seri ka bɔ cogo min na, a ka tilenbaliya bɛ bɔ o cogo la. Mɔgɔ tɛ foyi mɛn a kɔnɔ ni fariya kow ni tiɲɛnni kow tɛ. Bana ni jogindaw bɛ ne ɲɛ kɔrɔ tuma bɛɛ.
[8] Jerusalɛm, i ka ne ka lasɔmili kuma lamɛn, walisa ne dusukun kana jɛngɛ ka mabɔ i la ani ne kana na i kɛ yɔrɔ lankolon ye, mɔgɔ si tɛ sigi yɔrɔ min na tun.»
[9] Kɛlɛbolow Matigi ko: «U na Israɛl mɔgɔw tɔ tolenw ɲini, i n'a fɔ mɔgɔ bɛ rezɛnden nɔɔrɔ ɲini cogo min na. I ka i bolo kɛ k'a mɔmɔ ko kura i n'a fɔ mɔgɔ min bɛ rezɛn fɔri.»
[10] Ne na kuma jɔn fɛ? Jɔn na ne ka lasɔmili kuma lamɛn? U tulo gerennen don, u tɛ se ka lamɛnni kɛ. Matigi, i ka kuma kɛra dɔgɔyali ko ye u ɲɛ na. A man di u si ye.
[11] Matigi, fara i ka dimiya la, ne tɛ se ka o mara ne kɔnɔ tun. O tuma la Matigi y'a fɔ ne ye ko: «Denmisɛn minw bɛ dugu bɔlɔnw na ani kamalen minw lajɛlen don, i ka o dimiya bi olu kan. K'a masɔrɔ cɛ ni a muso na minɛ, cɛkɔrɔba ni mɔgɔ kɔrɔba bɛɛ na minɛ.
[12] U ka sow ni u ka forow ani u musow na kɛ mɔgɔ wɛrɛw ta ye.» Matigi ko: «Tiɲɛ la, ne bolo na se jamana kɔnɔ mɔgɔw bɛɛ ma.
[13] K'a daminɛ u ka denmisɛnw na ka taa bila mɔgɔ kɔrɔw la, u bɛɛ bɛ tɔnɔ jugu ɲini. U ka kiraw ni u ka sarakalasebaaw bɛɛ bɛ nkalon tigɛ.
[14] U ma fura bɛrɛ kɛ ne ka mɔgɔw, ne denmuso jogindaw la. U b'a fɔ ko: ‹Hɛrɛ, hɛrɛ,› k'a sɔrɔ hɛrɛ si tɛ u fɛ.
[15] U maloyara nin ko haramulenw kɛli kosɔn wa? Ayi, u ma maloya fewu. U kunkolo ma funun maloya fɛ. O de kosɔn, minw bɛ bi, u ni olu na biɲɔgɔn fɛ. Ni ne ye tɔɔrɔ lase u ma tuma min na, u bɛɛ na bi.» Matigi ko ten.
[16] Matigi ko: «A' ye aw jɔ sira la ka filɛli kɛ ka ɲininkali kɛ sira kɔrɔw ko la. Sira min ka ɲi, aw ka o ɲini ka tugu o la. Aw na lafiya sɔrɔ o kan.» Nka u y'a jaabi ko: «An tɛna taa o sira fɛ.»
[17] Ayiwa Matigi ye kɔlɔsilikɛlaw sigi u kun na, walisa u ka u tulo majɔ ka buru fyɛkan lamɛn. Nka u y'a jaabi ko: «An tɛna foyi lamɛn.»
[18] O de kosɔn Matigi ko: «Siyaw, aw ka lamɛnni kɛ. Seerew, ko min na aw sɔrɔ, aw ka o faamu.
[19] Dugukolo, i tulo majɔ. Ne na bɔnɛ lase nin mɔgɔw ma, u ka ko jugu sara kɔni. K'a masɔrɔ u ma sɔn ka ne ka kuma lamɛn, u ye ne ka sariya bila.
[20] Ne bɛ mun kɛ Seba suma diyalanw ni jamana jan suma diyalan na? Aw ka saraka jenitaw ko man di ne ye. Aw ka saraka tɛ ne diyaɲe fɛn ye.
[21] Ne na sen talon kabakurun da nin mɔgɔw ɲɛ. U bɛɛ senw na talon, u na saɲɔgɔn fɛ, faw ni u denkɛw, u sigiɲɔgɔnw ni u teriw bɛɛ.»
[22] Matigi ko: «A filɛ, siya dɔ natɔ don, ka bɔ saheli yanfan jamana la. Siya natɔ don ka bɔ dugukolo dan na.
[23] U bɛɛ ye kala bonnaw ni tama kerunnaw de ye. U ka farin, u tɛ hinɛ. U kan ka bon i ko kɔgɔji kuruw mankan. U yɛlɛnnen bɛ sow kan. U bɛɛ labɛnnen don kɛlɛkɛ labɛn cogo la Sion kɛlɛli kama.»
[24] An ye o kibaru mɛn, an bolow barika banna. An ja tigɛra, an kɛra i ko muso tintɔ.
[25] Aw kana bɔ ka taa forow kɔnɔ, aw kana taa siraw fɛ, sabu npan ni juguw bɛ yen. Bɔnɛ bɛ fan bɛɛ la.
[26] Ne ka mɔgɔw, ne denmuso, i ka i cɛ siri ni cafu fini ye ka i kolonkolon bugurijɛ la. I ka kasi i ko mɔgɔ min bɛ a denkɛ kelenpe su kasi. I ka kasi ka maɲumatɔkan bɔ, k'a masɔrɔ tiɲɛnnikɛla na cun an kan.
[27] Ne ye i sigi ne ka mɔgɔw cɛma ka kɛ kɔrɔbɔlikɛla ye i ko sanu faga numu, walisa u taama cogo ka kɔrɔbɔ.
[28] U bɛɛ murutilen bɛ ka dama tɛmɛn. Nkalontigɛlaw don, u ka gɛlɛn i ko nsiranɛgɛ ni nɛgɛfin. U bɛɛ ka jugu.
[29] Fan ye tasuma bonya, ntilɛku yeelela tasuma fɛ. Nafa tɛ ne ka mɔgɔw saniyali la, k'a masɔrɔ ko jugu tɛ bɔ u la.
[30] U bɛ wele ko, «warijɛbo» sabu Matigi banna u la.