[1] Min fɔra Moab ko la. Kɛlɛbolow Matigi, Israɛl ka Ala ko: «Bɔnɛ bɛ Nebɔ ye, sabu a halakira. Kirijataim maloyara, sabu a minɛna. Misgab maloyara, sabu a cira ka yɛrɛkɛ.
[2] Nɔɔrɔ si tɛ Moab la, ko jugu latigɛra a ye Hesibɔn, u ko: ‹A' ye na, an ka nin mɔgɔw halaki, walisa u kana kɛ siya ye tun.› E Madimen, i fana na halaki, npan na i nɔgɛn.
[3] Kulokan bɛ bɔ Hɔrɔnaim, tiɲɛnni kow ni halakili kow kosɔn.
[4] Moab halakira. Mɔgɔw bɛ a ka denmisɛnw kulokan mɛn.
[5] U kasitɔ na yɛlɛn Luhit tintin kan, u na u madon ka kasi. Tɔɔrɔ kulokanw na mɛn Hɔrɔnaim jiginjigin sira fɛ.
[6] A' ye boli ka aw ni kisi, i ko kungokolon fali bɛ boli cogo min na.
[7] I ye i jigi da boliw ni i ka nafolo kan, o de kosɔn, i na minɛ. Kemos ni a ka sarakalasebaaw ni a ka kuntigiw na taa jɔnya la.
[8] Halakilikɛla na don duguw bɛɛ kɔnɔ, hali dugu kelen tɛna to. Kulu furancɛw na ci, jɛkɛnɛw na tiɲɛn i ko Matigi y'a fɔ cogo min na.
[9] Aw ka kamanfuraw di Moab ma walisa a ka pan ka taa, katuguni a duguw bɛɛ na kɛ tomon ye. Mɔgɔ si tɛna sigi u kɔnɔ tun.
[10] Mɔgɔ min bɛ Matigi ka baara kɛ ni salaya ye, o dangalen bɛ. Mɔgɔ min bɛ ban ka fagali kɛ ni npan ye, o dangalen bɛ.
[11] Moab lafiyalen tun don kabini a denmisɛnma. A ma taa jɔnya la. A tun bɛ i ko diwɛn min ɲɛ majɔlen don a minan kɔnɔ. A ma sɛɛnɛ daga wɛrɛ kɔnɔ. A timiya fɔlɔ b'a la, a kasa duman ma yɛlɛma.»
[12] O de kosɔn Matigi ko: «Donw bɛ na, ne na mɔgɔ dɔw ci ka a sɛɛnɛ ka a daga lankolonya ka a baraw ci.
[13] Moab na maloya bato fɛn Kemos ɲɛ kɔrɔ i ko Israɛl bɔnsɔn maloyara Bɛtɛl bato fɛnɲɛ kɔrɔ cogo min na, a jigi dalen tun bɛ o min kan.
[14] «Aw bɛ se k'a fɔ cogo di ko aw ye kɛlɛkɛ cɛ ja gɛlɛnw ye?
[15] Moab halakira, a duguw sisi bɛ wuli san fɛ. A ka kamalenw bɛɛ laɲumanw bɛ taa fagali yɔrɔ la.» Masaba min tɔgɔ ko Kɛlɛbolow Matigi, o ko ten.
[16] «Moab halakili surunyara, a ka bɔnɛ don bɛ tɛliya ka se.
[17] A lamini mɔgɔw, aw bɛɛ ka kasi a kosɔn. Aw minw bɛ a tɔgɔ dɔn, aw bɛɛ k'a fɔ ko: ‹Nin masaya bere barikama nɔɔrɔma karila cogo di?›
[18] Dibon dugu, i ka jigin ka bɔ i nɔɔrɔ la ka i sigi duguma buguri la, k'a masɔrɔ Moab tiɲɛnbaa nana i kama, a ye i ka kɛlɛ kunbɛn kogow ci.
[19] Aroɛr dugu, i jɔ sira da la ka kɔlɔsili kɛ. I ka cɛ bolibaatɔ ni muso dankɛtɔ ɲininka, ko: ‹Mun kɛra?›
[20] Moab maloyara, a cira. A' ye nwunankan ni kulokan bɔ. Aw k'a fɔ Arnon kɔ da la ko Moab halakira.
[21] «Matigi ka kiri bira jɛkɛnɛ la jamanaw ni Holon ni Jaza ni Mefat
[22] ani Dibon ni Nebɔ ni Bɛt-Dibilataim
[23] ani Kirijataim ni Bɛt-Gamul ni Bɛt-Meon
[24] ani Kerijot ni Bozra kan. A bira Moab jamana kɔnɔ duguw yɔrɔ janw ni yɔrɔ surunw bɛɛ fana kan.
[25] Moab barika banna, a bolo karila.» Matigi ko ten.
[26] Matigi ko: «Aw ka a lamin fo ka a ɲɛnamini k'a masɔrɔ a wulila Matigi kama. Moab ka fɔɔnɔ ka kolonkolon a fɔɔnɔ la ka kɛ yɛlɛbɔ fɛn ye.
[27] Moab, i hakili to a la ko i ye Israɛl bɔnsɔn kɛ i ka yɛlɛbɔ fɛn ye. I y'a jate ko a minɛna sonyali la k'a masɔrɔ i tun bɛ kuma a ko la tuma o tuma, i tun bɛ i kun kɔmikɔmi a kama.
[28] «Moab bɔnsɔn, aw ka bɔ duguw kɔnɔ ka taa aw sigi faraw cɛma. Aw ka kɛ i ko ntubanni min bɛ a ɲaa da kuluwo la.
[29] An ye Moab ka kuncɛbaya dɔn, a ka bon dɛ, ani a yɛrɛ bonyali ni a ka jamaleɲa, ni a ka kabaleɲa ani a dusukun kɔrɔtalen.»
[30] Matigi ko: «Ne bɛ a ka hakilintanya ni a ka wasobaanciya kumaw ni a ka kɛwale fufafuw dɔn.
[31] O de kosɔn, ni ne bɛ miiri Moab ko la, ne bɛ kasikanba bɔ. Ne bɛ dɛmɛni ɲini o mɔgɔw bɛɛ kosɔn. Mɔgɔ bɛ nwunan Kir-Herɛskaw kosɔn.
[32] Sibma ka rezɛn nakɔtu, ne na kasi i kosɔn, ka tɛmɛn Jaezɛr kasili ko cogo kan. I jiribolow taara fo kɔgɔji kɔ fɛ, u sera fo Jaezɛr kɔgɔji ma. Halakilikɛla bira i ka jiridenw ni i ka rezɛndenw kan.
[33] Ɲagalikan ni sewakan banna ka bɔ nakɔtu ni sɛnɛkɛ yɔrɔɲumanw na Moab jamana kɔnɔ. Ne ye diwɛn ban ka bɔ rezɛn ji bɔ yɔrɔ la. Mɔgɔ si tɛ yen ka rezɛn foroki ka ɲagalikan bɔ tun. Kɛlɛ kulokan bɛ mɛn, nka ɲagalikan tɛ mɛn tun.
[34] «Hesibɔn nwunankan bɛ mɛn fo Eleal fo ka taa se Jahaz. A bɛ mɛn Zoar fo ka taa se Hɔrɔnaim ka taa se Eglat-Selisija, k'a masɔrɔ Nimrim ji yɛrɛ jara.»
[35] Matigi ko: «Minw bɛ taa batoli kɛ yɔrɔw la ka wusulan suma duman wusu bato fɛnw ye, ne na olu ban ka bɔ Moab jamana kɔnɔ.
[36] «O de kosɔn ne dusukun bɛ nwunankan bɔ Moab bɔnsɔn ni Kir-Herɛskaw kosɔn i ko file fyɛkan, sabu u ka nafolow bɛɛ banna.
[37] U kunw bɛɛ dira, u bonbonsiw bɛɛ dira. U bɛɛ ye u bolow cici ka cafu fini don u kan na.
[38] Kasikan bɛ kɛ Moab bɔnsɔn ka sow sanfɛlaw ni fɛrɛkɛnɛ yɔrɔw bɛɛ la, k'a masɔrɔ ne ye Moab ci i ko dagakolon fililen.» Matigi ko ten.
[39] «A cilen filɛ. Aw ka nwunankan bɔ. Moab maloyalen ye a kɔ sin. A kɛra yɛlɛbɔ fɛn niɲiginna fɛn ye u sigiɲɔgɔnw cɛma.»
[40] Ayiwa Matigi ko: «Jugu bɛ na i ko bɔn ka a kamanfuraw sɛɛnɛ Moab bɔnsɔn kun na.
[41] Kerijot minɛna, a ka kɛlɛ kunbɛn kogow minɛna. O don na Moab bɔnsɔn kɛlɛkɛ cɛ farinw dusukunw na kɛ i ko muso tintɔ.
[42] Moab na halaki ka ban, a tɛna kɛ siya ye tun, sabu a wulila Matigi kama.
[43] Moabkaw ja na tigɛ siran kow ni dingɛ dunba ani minɛli jan kosɔn.» Matigi ko ten.
[44] «Ni mɔgɔ min bolila siran kow ɲɛ, a na bi dingɛ dunba kɔnɔ. Ni min kisira dingɛ dunba ma, o na minɛ jan na, k'a masɔrɔ Moab ka hakɛw na sara san min na, ne na o lase a ma.» Matigi ko ten.
[45] «Mɔgɔ bolitɔ barika dɛsɛlenw jɔra Hesibɔn suma kɔrɔ, nka tasuma dɔ bɔra Hesibɔn, tasuma mana bɔra Sihon cɛmancɛ la. A bɛ Moab kɛrɛfɛlaw ni golobogalabadenw kuncɛ jeni.
[46] Bɔnɛ bɛ i ye, Moab. Kemos batobaaw halakira. I denkɛw ni i denmusow minɛna ka taa jɔnya la.
[47] Nka don bɛ na, Moab bɔnsɔn minw bɛ jɔnya la, ne na olu hɔrɔnya.» Matigi ko ten. Kiri ko min fɔra Moab ko la, o don.