[1] Aw Israɛl ka so, aw ka Matigi ka kuma lamɛn.
[2] Matigi ko: «Aw kana siyaw ka ko kɛtaw kɛ, aw kana siran sankolola taamashyɛnw ɲɛ, hali ni siyaw bɛ siran u ɲɛ.
[3] O mɔgɔw ka laadaw ye laada fuuw ye. U bɛ kungo kɔnɔ jiri tigɛ, bolo la baarakɛla bɛ a dɛsɛ ni dɛsɛlan ye.
[4] U bɛ a masiri ni warijɛ ni sanu ye, ka a gengen ni pɔntiw ni marito ye walisa a kana lamaga.
[5] O bato fɛnw bɛ i ko kɔnɔ gɛnna dilalen foro la, u tɛ se ka kuma. Mɔgɔw bɛ u ta ka taa, sabu u tɛ se ka taama. Aw kana siran u ɲɛ, sabu se tɛ u ye ka ko jugu wala ko ɲuman kɛ.»
[6] Matigi, e bɔɲɔngɔnko tɛ. I ka bon, i tɔgɔ ka bon i barika kosɔn.
[7] Jɔni tɛna siran i ɲɛ, siyaw ka Masaba? Siran ka kan ka kɛ i ɲɛ. I bɔɲɔngɔnko si tɛ siyaw ka hakilitigiw bɛɛ ni u ka masayaw si cɛma.
[8] Hakili tɛ u si fɛ, u tɛ ko dɔn. U ka jiri bato fɛnw ka kalan bɛɛ ye fuu de ye.
[9] U ka warijɛ fagalen bɔra Tarsisi, sanu fagalen bɔra Ufaz. Jiri dɛsɛla ni sanu fagala bolo baara nɔw don. U bɛ lomaasa fini ni finiɲumanw don o bato fɛnw na, u bɛɛ ye maɲɛrɛ baarakɛla ka baara nɔw ye.
[10] Nka Matigi ye Ala sɛbɛ ye, Ala ɲɛnama ni badaa Masaba don. Dugukolo bɛ yɛrɛyɛrɛ a ka dimiyaɲɛ, siyaw tɛ se ka a ka dimiya muɲu.
[11] Aw k'a fɔ u ye ko, bato fɛn minw ma sankolo ni dugukolo da, olu na halaki ka bɔ dugukolo kan sankolo jukɔrɔ.
[12] Matigi ye dugukolo da a ka sebaaya barika la, ka diɲɛ sabati a ka hakilitigiya barika la, ka sankolow fɛnsɛ a ka dɔnniya barika la.
[13] Sanji bɛɲɔgɔn lajɛ san fɛ a kan barika la. A bɛ sankaba lawuli ka bɔ dugukolo dan na. A bɛ san yɛgɛyɛgɛ kɛ sanji cɛma, ka fiɲɛ labɔ a mara yɔrɔw la.
[14] O tuma la Hadamadenw bɛɛ bɛ kɛ hakilintanw ye. Boli dilabaaw bɛɛ bɛ maloya u ka boliw kosɔn, k'a masɔrɔ nɛgɛ yeelelen jaw bɛɛ ye nkalontigɛlaw ye, u tɛ ninakili.
[15] U bɛɛ ye fɛn fufafuw de ye, lafili fɛnw don. U bɛɛ na ban u ka hakɛw sara don na.
[16] Nka Yakuba ka Ala tɛ olu bɔɲɔgɔnko ye, sabu ale de ye fɛn bɛɛ da. Israɛl bɔnsɔn ye ale de ta ye. A tɔgɔ ko Kɛlɛbolow Matigi.
[17] Jerusalɛm, kɛlɛ daga sigilen bɛ e min da la, i ka o bato fɛnw bɛɛ lajɛɲɔgɔn kan ka bɔ jamana kɔnɔ.
[18] K'a masɔrɔ Matigi ko: «Ne na i kɔnɔ mɔgɔw fili yɔrɔ jan nin sen in na. Ne na u degun walisa u juguw ka u minɛ.»
[19] Bɔnɛ bɛ ne ye ne jogindaw kosɔn. Ne jogindaw dimi ka bon. Nka ne ko: «O ye ne ka tɔɔrɔ de ye, ne na o muɲu.
[20] Ne ka finiso farala, a jurukisɛw bɛɛ tigɛra. Ne denw bɛɛ taara ka bɔ ne kɔrɔ. Mɔgɔ si tɛ ne fɛ ka ne ka finiso jɔ ko kura, ka ne ka finiw dulon.»
[21] Saga gɛnnaw kɛra hakilintanw ye, u ma Matigi ɲininka. O de kosɔn u ka kɛtaw maɲɛ, u ka baganw jɛnsɛnna.
[22] Kibaru dɔ nalen filɛ. Mankanba dɔ bɔra saheli yanfan fɛ. O na Juda ka duguw ci ka kɛ kungokolon ye, kungo wuluw na sigi yen.
[23] Matigi, ne y'a dɔn ko mɔgɔ ka koɲɛ si tɛ a yɛrɛ bolo. Mɔgɔ ka sebaaya tɛ se ka a senda yɔrɔ koɲɛnabɔ.
[24] Matigi, i ka ne kolo ko ɲuman, i kana a tɛmɛn a dan kan. I kana a kɛ ni dimiya ye, walisa ne kana na halaki.
[25] Siya minw ma i dɔn, ani mɔgɔ minw tɛ i tɔgɔ wele, i ka i ka dimiya bi olu kan, k'a masɔrɔ u ye Yakuba halaki, k'a halaki tun fo k'a ban, ka a sigi yɔrɔ kɛ kungokolon ye.