[1] Juda bɔnsɔn ka masakɛ Josiasi denkɛ Jojakim ka masaya san naaninan la, Matigi ka kuma sera Jeremi ma, ko:
[2] «I ka sɛbɛn melekelen ta. Ne ye kuma minw fɔ i ye Israɛl bɔnsɔn ni Juda bɔnsɔn ani siyaw bɛɛ ko la, kabini ne ye kuma daminɛ i fɛ don min na masakɛ Josiasi tile la fo ka na se bi ma, i ka olu bɛɛ sɛbɛn a kɔnɔ.
[3] Ne ye ko minw latigɛ Juda bɔnsɔn kama, ni u ye u mɛn tuma min na, a dɔrɔ u bɛɛ kelen-kelen na u ka sira juguw bila. O tuma la ne na u ka tilenbaliya ni u ka jurumuw yafa u ma.»
[4] O tuma la Jeremi ye Nerija denkɛ Baruk wele. Matigi tun ye kuma minw fɔ Jeremi ye, Jeremi ye olu bɛɛ fɔ Baruk ye. A ye olu sɛbɛn o sɛbɛn melekelen kan.
[5] O kɔ, Jeremi y'a fɔ Baruk ye ko: «U ye ne bali ka don Matigi batosoba kɔnɔ.
[6] O de kosɔn i yɛrɛ ka taa Matigi batosoba kɔnɔ sun don don na. Matigi ye kuma minw fɔ ne ye, i ye olu minw sɛbɛn sɛbɛn melekelen kɔnɔ, i ka olu kalan mɔgɔw bɛɛ ɲɛ na. Juda bɔnsɔn minw bɛ bɔ u ka duguw la, i ka a kalan olu fanaɲɛ na.
[7] «A dɔrɔ u na Matigi deli, a dɔrɔ u bɛɛ kelen-kelen na u ka sira juguw bila, k'a masɔrɔ Matigi ka dimiya ni a dusu bɔ ko min fɔra nin mɔgɔw ta fan fɛ, o ko ka bon kosɛbɛ.»
[8] Nerija denkɛ Baruk ye kira Jeremi kan minɛ. Matigi ka kuma minw sɛbɛnna sɛbɛn melekelen kɔnɔ, a ye olu kalan Matigi batosoba kɔnɔ.
[9] O kɛra Juda ka masakɛ Josiasi denkɛ Jojakim ka masaya san duurunan kalo kɔnɔntɔnnan la. U ye sun don ko welewele da ko Jerusalɛmkaw ani Juda bɔnsɔn ka duguw kɔnɔ mɔgɔ minw bɛɛ nana Jerusalɛm dugu kɔnɔ, olu bɛɛ ka sun don Matigi ɲɛ kɔrɔ.
[10] Mɔgɔw bɛɛ ye Jeremi ka kitabu kalankan mɛn Baruk fɛ, sɛbɛnnikɛla Safan denkɛ Gemariya ka bon kɔnɔ. O bon tun bɛ san fɛ dukɛnɛ la, Alabatosoba donda kura da la.
[11] Kabini Safan denkɛ Gemariya denkɛ Mise ye Matigi ka kuma kalankan mɛn ka bɔ sɛbɛn kɔnɔ,
[12] a jiginna ka taa masakɛ ka so kɔnɔ ka don sɛbɛnnikɛla ka bon kɔnɔ. O y'a sɔrɔ nin kuntigiw bɛɛ lajɛlen tun bɛ yen, sɛbɛnnikɛla Elisama ani Semaɛja denkɛ Delaja ani Akbor denkɛ Elnatan ni Safan denkɛ Gemariya ni Hananiya denkɛ Sedesiasi ani faama tɔw bɛɛ.
[13] Ka Baruk to o sɛbɛn kuma kalanni la jamaɲɛ na, Mise ye o kuma minw mɛn, a ye olu bɛɛ fɔ u ye.
[14] O tuma la kuntigiw ye Kusi denkɛ Selemiya denkɛ Netaniya denkɛ Jehudi ci ka taa k'a fɔ Baruk ye ko: «I ye sɛbɛn melekelen min kalan mɔgɔw ɲɛ na, i ka o ta ka na n'a ye yan.» O tuma la Nerija denkɛ Baruk ye o sɛbɛn melekelen ta ka taa u yɔrɔ.
[15] U y'a fɔ a ye ko: «I sigi k'a kalan anɲɛ na.»
[16] Baruk ye o sɛbɛn kalan u ɲɛ na tuma min na, u sirannen ye ɲɔgɔn filɛ k'a fɔ Baruk ye ko: «An ka nin kumaw bɛɛ fɔ masakɛ ye k'a jɛya.»
[17] O kɔ, u y'a daminɛ ka Baruk ɲininka ko: «I ye kuma minw kalan, i ye olu sɔrɔ cogo di? Jeremi ye u fɔ i ye wa?»
[18] Baruk ye u jaabi ko: «Jeremi yɛrɛ da ye o kumaw bɛɛ kelen-kelen fɔ ne ye. Ne ye u sɛbɛn ni lankiri ye nin sɛbɛn melekelen kɔnɔ.»
[19] O tuma la kuntigiw y'a fɔ Baruk ye ko: «I ni Jeremi ka taa ka aw dogo. Mɔgɔ si kana aw yɔrɔ dɔn.»
[20] O kɔ, u taara o sɛbɛn melekelen bila sɛbɛnnikɛla Elisama ka bon kɔnɔ ka taa masakɛ ka so dukɛnɛ la ka o kuma bɛɛ lakali masakɛ ye.
[21] Masakɛ ye Jehudi ci ka taa sɛbɛn melekelen nɔ fɛ. Jehudi taara sɛbɛnnikɛla Elisama ka bon kɔnɔ ka o sɛbɛn ta. Kuntigi minw jɔlen tun bɛ masakɛ fɛ yen, a ye o sɛbɛn kalan olu bɛɛ ɲɛ na.
[22] O kɛra san kalo kɔnɔntɔnnan la. Masakɛ sigilen tun bɛ a ka masaya so fonɛnɛ tuma bon kɔnɔ. Furunɔ tasumama tun bɛ a ɲɛ fɛ.
[23] Jehudi ye o sɛbɛn melekelenɲɛ saba wala naani kalan tuma min na, masakɛ ye o sɛbɛn kalannen bɛɛ farafara ni sɛbɛnnikɛla ka muru ye ka u fili tasuma la furunɔ kɔnɔ. A ye o bɛɛ jeni o cogo la.
[24] Masakɛ ni a ka baaraden minw ye o kumaw mɛn, u ja ma tigɛ, u ma u ka finiw fara.
[25] Nka Elnatan ni Delaja ani Gemariya y'a fɔ masakɛ ye ko a kana o sɛbɛn jeni, nka a ma sɔn ka u kan minɛ.
[26] Masakɛ ye ci di masakɛ denkɛ Jerakmeɛl ni Azriɛl denkɛ Seraja ani Abdeɛl denkɛ Selemiya ma ko olu ka sɛbɛnnikɛla Baruk ni kira Jeremi minɛ, nka Matigi ye u mara.
[27] Baruk tun ye Jeremi dala kuma minw sɛbɛn, masakɛ ye o sɛbɛn jeni tuma min na, Matigi ka kuma sera Jeremi ma ko kura ko:
[28] «I ka sɛbɛn melekelen wɛrɛ ta, Juda bɔnsɔn ka masakɛ ye sɛbɛn fɔlɔ min jeni, i ka o kɔnɔ kumaw bɛɛ sɛbɛn a kɔnɔ.»
[29] I k'a fɔ Juda bɔnsɔn ka masakɛ Jojakim ko la, ko Matigi ka kuma filɛ nin ye: «Jeremi y'a sɛbɛn ko a jɛlen don ko Babilonɛ masakɛ bɛ na ka nin jamana halaki ka a kɔnɔ mɔgɔw ni baganw bɛɛ faga ka u ban. Nka Jojakim ye o kuma kɛlɛ ka o kitabu jeni.
[30] O de kosɔn Matigi bɛ kuma nin fɔ Juda bɔnsɔn ka masakɛ Jojakim ko la, ko a bɔnsɔn si tɛna sigi Dawuda ka masasigilan kan, ko a yɛrɛ su na to kɛnɛma. Su fɛ, nɛnɛ n'a sɔrɔ, tile fɛ, funteni n'a sɔrɔ.
[31] Ne na a ni a bɔnsɔnw ni a ka kuntigiw sara u ka tilenbaliya kosɔn. Ne ye tɔɔrɔ ko minw fɔ Jerusalɛmkaw ni Juda bɔnsɔn ye, ne na olu bi u kan, sabu u ma ne kan minɛ.»
[32] Ayiwa Jeremi ye sɛbɛn melekelen wɛrɛ ta ka a don sɛbɛnnikɛla Nerija denkɛ Baruk bolo. Juda bɔnsɔn ka masakɛ Jojakim ye sɛbɛn min jeni, Jeremi ye o kɔnɔ kumaw fɔ Baruk ye ko kura, a ka olu sɛbɛn. O bɔɲɔgɔnko kuma caman wɛrɛ farala a kan.