[1] Matigi ko: «O tuma la, ne na kɛ Israɛl bɔnsɔn gwaw bɛɛ ka Ala ye. U na kɛ ne ka mɔgɔw ye.»
[2] Matigi ko: «Mɔgɔ minw kisira npan ma, ne ye hɛrɛ kɛ olu ye kungokolon kɔnɔ. Ɔwɔ, Israɛl na se ka sigi lafiya la.»
[3] Matigi y'i jira an na ka kɔrɔ, a ko: «Israɛl, ne bɛ i kanu ni kanuya banbali ye. O de kosɔn, ne ye ne ka ɲumaya to i fɛ.
[4] Ne na i lasigi ko kura, i na jɔ. I na i ka ntamaɲumanw ta ko kura ka taa dɔn kɛɲɛnajɛkɛlaw fɛ.
[5] I na rezɛn sunw turu Samari kuluw kan ko kura. Minw bɛ u turu, olu na u mɔ dumu.
[6] Don bɛ na, kɔlɔsilikɛlaw na pɛrɛn Efrayim kuluw kan, k'a fɔ ko: ‹A' ye wuli, an ka taa Sion, Matigi an ka Ala yɔrɔ.›»
[7] Ayiwa Matigi ko: «Aw ka ɲagalikanba bɔ Yakuba kosɔn, ka barika dali dɔnkili da siyaw kun na siya kosɔn. A' ye aw kan kɔrɔta ka tanuli dɔnkili da, ko: ‹I ka i ka mɔgɔw kisi, Matigi, ka Israɛl tɔ tolenw tila.›
[8] Tiɲɛ la, ne na u lasegin ka bɔ saheli yanfan fɛ, ka u lajɛ yɔrɔ kelen na ka bɔ dugukolo dan na. Fiyentɔw ni sen kelenw ni muso kɔnɔmaw ani muso tintɔw, u bɛɛ na kɛ jamakulu kelen ye ka na yan.
[9] U kasitɔ bɛ na, ne na u ɲɛ minɛ ka u to ne delili la. Ne na taa ni u ye ji boyi da la, sira tilennen fɛ. U sen tɛna talon, sabu ne ye Israɛl fa ye. Efrayim ye ne den fɔlɔ bangelen ye.
[10] Siyaw, aw ka Matigi ka kuma lamɛn, aw k'a fɔ kɔgɔji la gunw kan yɔrɔ jan, ko: ‹Matigi min ye Israɛl jɛnsɛn, o na u lajɛɲɔgɔn fɛ ka u mara, i ko saga gɛnna bɛ a ka sagaw mara cogo min na.›
[11] K'a masɔrɔ Matigi ye Yakuba kunmabɔ, Matigi ye u tila ka bɔ jugu barikama bolo.
[12] U na kɔsegin niɲagalikanba ye Sion kulu kan. U na nisɔndiya u ka fɛn sɔrɔtaw kosɔn Matigi fɛ, alikama ni diwɛn kura ni tulu ni sagaw ni misiw kɔni. U na kɛ i ko nakɔɲuman min sɔnna ko ɲuman, u tɛnaɲɛnasisi tun.
[13] O tuma la npogotigiw na ɲagali ka dɔn kɛ, kamalenw ni cɛkɔrɔbaw na ɲagaliɲɔgɔn fɛ. Ne na u kaɲɛnasisi yɛlɛma ka kɛ sewa ye. Ne na dusu suma di u ma tɔɔrɔ nɔ na. Ne na u ka ɲagali dafa.
[14] Sarakalasebaaw na fa saraka sogo la. Ne ka mɔgɔw na wasa fɛnɲuman la.» Matigi ko ten.
[15] Matigi ko: «Kulokan ni nwunankan bɔra Rama, Rasɛl bɛ a denw suw kasi. A t'a fɛ a dusu ka saalo u ko la, k'a masɔrɔ u tɛ yen tun.»
[16] Matigi ko: «I kana kasi tun, i ɲɛji kana bɔ tun, katuguni i na i ka baara sara sɔrɔ. Matigi ye o fɔ. I denw bɛ na ka bɔ i juguw ka jamana la tun.»
[17] Matigi ko: «I laban ko naɲɛ, i denw na kɔsegin u yɛrɛw ka jamana kɔnɔ.
[18] Ne ye Efrayim kasikan mɛn, a ko: ‹I ye ne bugɔ, ne bugɔra i ko ntura bɔlan min ma kolo fɔlɔ. I ka ne kolo, ni o kɛra, ne na kolo, sabu i ye Matigi ne ka Ala ye.
[19] Ne jɛngɛna ka sira bila, ne nimisara o la, ne ye o dɔn tuma min na, ne ye ne tɔgɔ gosi. Ne maloyara ka ne kun biri, sabu ne denmisɛnma ka fililiw doni bɛ ne kun.›
[20] «Efrayim ye ne diyaɲeden ye min bɛ ne sago kɛ. K'a masɔrɔ ne bɛ kuma a ko la ka caya cogo min na, ne hakili bɛ to a la ka tɛmɛn o kan. O de kosɔn ne dusukun bɛ hami a ko la, ɔwɔ, ne na hinɛ a la.» Matigi ko ten.
[21] I ka taamashyɛnw dila sira la, ka sira jira jiriw turu. I tun bɛ taama sira min kan, i dusukun sin o sira ma. Israɛl, i ka kɔsegin, i ka kɔsegin i ka nin duguw la.
[22] Denmuso murutilen, i na to ka taa i kun fɛ fo tuma jumɛn? Matigi ye fɛn kura kɛ dugukolo kan, o filɛ nin ye, ko muso bɛ a cɛ ɲini.
[23] Ayiwa, Kɛlɛbolow Matigi, Israɛl ka Ala ko: «Ni ne ye ne ka mɔgɔw labɔ jɔnya la tuma min na, nin kuma na fɔ Juda bɔnsɔn ka jamana ni a ka mɔgɔw ko la tun ko: ‹tilennenya sigi yɔrɔ, kulu senuma, Matigi ka duba i ye.›
[24] Juda bɔnsɔn ka bugufyɛ la mɔgɔw ni a ka duguba la mɔgɔw na sigi jamana kɔnɔɲɔgɔn fɛ, sɛnɛkɛlaw fara bagan gɛnnaw kan.
[25] K'a masɔrɔ ne na dusu minnɔgɔtɔw lamin ka dusu kasitɔw bɛɛ wasa.
[26] Ayiwa ne kununna ka bɔ sunɔgɔ la, ne y'a ye ko ne ka sunɔgɔ tun ka di.»
[27] Matigi ko: «Don bɛ na, ne na Israɛl ka so ni Juda bɔnsɔn ka so jiidi ka mɔgɔw ni baganw caya a kɔnɔ.»
[28] Matigi ko: «Ne ye neɲɛ sin u ma ka u sama ka bɔ ka u bi ka u halaki ka u tiɲɛn ka u ban cogo min na, ne na neɲɛ sin u ma o cogo kelen na ka u jɔ ka u turu ko kura.
[29] O tuma la mɔgɔ si tɛna nin ntalen da, ko: ‹Faw ye rezɛn geren dumu, u denw ɲinw kumuna.›
[30] Nka mɔgɔ bɛɛ kelen-kelen na faga u yɛrɛw ka tilenbaliya kow kosɔn. Ni min ye rezɛn geren dun, o tigiɲinw na kumu.»
[31] Matigi ko: «Don bɛ na, ne na layidu kura ta Israɛl ka so ni Juda ka so ye.»
[32] Matigi ko: «Ne ye u bɛnbaw bolo minɛ ka olu labɔ Misira jamana la tuma min na, ne ye layidu min ta olu ye, u ye o layidu tiɲɛn, hali k'a sɔrɔ ne kɛra u Matigi ye, nin layidu ni o tɛna kɛ kelen ye.»
[33] Nka Matigi ko: «Ne na layidu kura min ta Israɛl bɔnsɔn ka so ye o don tɛmɛnnenw kɔ, o filɛ nin ye. Ne na ne ka sariya kɛ u kɔnɔ ka a sɛbɛn u dusukun na. Ne na kɛ u ka Ala ye, u na kɛ ne ka mɔgɔw ye.
[34] U si tɛna u mɔgɔɲɔgɔnw wala u balimaw kalan, ko: ‹Aw ka Matigi dɔn,› nka u bɛɛ na ne dɔn, mɔgɔ misɛn fara mɔgɔba kan, k'a masɔrɔ ne na u ka tilenbaliya kow yafa u ma, ne tɛna ne hakili jigin u ka jurumuw la tun.»
[35] Matigi ye tile da walisa o ka yeelen bɔ tile fɛ, k'a ka sariya sigi kalo ni dolow kan, walisa olu ka yeelen bɔ su fɛ. A bɛ kɔgɔji kuruw lawuli ka bɔ kɔgɔji la ko u ka mankan bɔ, ale tɔgɔ ko Kɛlɛbolow Matigi.
[36] A ko: «O sariyaw bɛ se ka dabila ka bɔ ne ɲɛ kɔrɔ wa? Ni o tɛ se ka kɛ, Israɛl siya na kɛ siya senuma ye ne ɲɛ kɔrɔ badaa.»
[37] Matigi ko: «Ni sankolo bɛ se ka suma ka a dan dɔn, ni dugukolo jusigilanw bɛ se ka suma ka u duɲa danw dɔn, ni o bɛ se ka kɛ, ne na Israɛl bɔnsɔn fili u ka ko jugu kɛlenw bɛɛ kosɔn.» Matigi ko ten.
[38] Matigi ko: «Don bɛ na, dugu na jɔ Matigi ye k'a daminɛ Hananeɛl kogo la fo ka taa se selekela donda ma.
[39] Sumanikɛ juru na da Gareb tintin kan ka se fo Goat.
[40] Mɔgɔ su don jɛkɛnɛ bɛɛ ni bugurijɛ jɛkɛnɛ ani forow bɛɛ, fo ka taa se Sedrɔn kɔji ma ka taa bila sow donda la kɔrɔn yanfan fɛ, olu bɛɛ na kɛ yɔrɔ senuma ye Matigi ye. U tɛna tiɲɛn wala ka halaki tun.»