[1] Matigi ye kuma min fɔ Kalde jamana ni Babilonɛ dugu kama kira Jeremi da la, o filɛ nin ye.
[2] «Aw ka nin kibaru fɔ siyaw ye, ka welewele da ka darapo siri. Aw ka a welewele da, aw kana foyi dogo, ko: ‹Babilonɛ minɛna. Bato fɛn Bel maloyara, Merodak karikarila. A ka boliw cɔngɔra mɔgɔw sen kɔrɔ, a ka bato fɛn fufafuw cira.›
[3] K'a masɔrɔ siya dɔ bɛ bɔ saheli yanfan fɛ ka na nin dugu kama ka a kɛ kungokolon ye. Babilonɛ na lankolonya. A kɔnɔ mɔgɔw ni baganw bɛɛ na boli ka tunun.»
[4] Matigi ko: «O donw la, o waati la, Israɛl bɔnsɔn ni Juda bɔnsɔn na kɔseginɲɔgɔn fɛ. U kasitɔ na taama ka Matigi u ka Ala ɲini.
[5] Sion kulu sira na jira u la, u na u ɲɛ sin a ma. U n'a fɔ ko: ‹A' ye na ka tugu Matigi la ni layidu wulibali ye, min tɛ bɔ mɔgɔ kɔnɔ abada.›
[6] Ne ka mɔgɔw kɛra sagakulu tununnen ye. U gɛnbaaw ye u lafili fo u taara yaala kuluw kan. U tun bɛ yaala kuluw ni tintinw kan ka ɲinɛ u ka sulu kɔ.
[7] Minw ye u ye, olu ye u farafara. U juguw y'a fɔ, ko: ‹An jo don, sabu Israɛl bɔnsɔn ye jurumu kɛ ka u dogo yɔrɔɲuman ni u bɛnbaw jigi da yɔrɔ Matigi hakɛ ta.›
[8] «A' ye boli ka bɔ Babilonɛ, ka bɔ Kalde jamana kɔnɔ ka taama i ko sagajigi bɛ taama sagakuluɲɛ fɛ cogo min na.
[9] Ne na siya dama dɔnbali dɔ lawuli ka bɔ saheli yanfan fɛ ka na Babilonɛ kama. U na u yɛrɛw labɛn ka Babilonɛ kɛlɛ k'a minɛ. O siyaw ka biɲɛdenw bɛ i ko kɛlɛkɛcɛ tɛgɛ duman, min bolo lankolon tɛna kɔsegin.»
[10] Matigi ko: «Kalde jamana na don cɛlikɛlaw bolo, minw bɛɛ bɛ a minɛ, olu na wasa.
[11] Aw bɛ sewa, aw bɛɲagali ne ka mɔgɔw cɛli kosɔn. Aw bɛ aw panpanɲagali la i ko misi geren min bɛ bin nugu cɛma cogo min na. Aw bɛ hanhan i ko sokɛ falen.
[12] O de kosɔn aw woloba na maloya, min ye aw bange, o kun na suuli maloya fɛ. Babilonɛ na kɛ siyaw bɛɛ kɔ fɛ ta ye. A na kɛ kungokolon lankolon ni jamana jalan ye.
[13] Mɔgɔ si tɛna sigi a kɔnɔ tun, Matigi ka dimiya kosɔn. A na kɛ yɔrɔ lankolon ye. Mɔgɔ minw bɛ tɛmɛn Babilonɛ kɛrɛ fɛ, olu bɛɛ na kabakoya ka dala file fyɛ a ka bɔnɛ kosɔn.
[14] Aw kɛlɛkɛ cɛ kalatigiw, a' ye aw labɛn ka Babilonɛ lamini k'a kɛlɛ. A' ye a bon, aw kana biɲɛkisɛw to u forokow kɔnɔ, k'a masɔrɔ a ye Matigi hakɛ ta.
[15] Aw ka pɛrɛn a kama fan bɛɛ la. A donna se sɔrɔbaaw bolo. A jusigilanw cira. A lamini kogow bira. O ye Matigi ka tɔɔrɔ latigɛlen de ye. A' ye aw mɔnɛbɔ a la. A yɛrɛ ye min kɛ tɔw la, aw ka o ɲɔgɔn kɛ a la.
[16] Aw ka dannikɛlaw ni sumantigɛlaw halaki ka u ban ka bɔ Babilonɛ. Mɔgɔw bɛɛ kelen-kelen ka boli juguw ka npanɲɛ ka taa u ka mɔgɔw yɔrɔ u ka jamana kɔnɔ.
[17] «Israɛl bɔnsɔn ye saga tununnen ye, warabaw ye a nɔgɛn. Asiri masakɛ fɔlɔ de ye u farafara. O kɔ, Babilonɛ masakɛ Nebukadnezar ye u kolow karikari.»
[18] O de kosɔn Kɛlɛbolow Matigi, Israɛl ka Ala ko: «Ne na bɔnɛ lase Babilonɛ masakɛ ni a ka jamana ma i ko ne ye bɔnɛ lase Asiri masakɛ ma cogo min na.
[19] O kɔ, ne na Israɛl bɔnsɔn lasegin u ka jamana kɔnɔ u sigi yɔrɔ la. U na taa dumuni kɛ Karmɛl kulu kan ani Basan jamana la. U na fa dumuni la Efrayim kuluw ni Galad kuluw kan.»
[20] Matigi ko: «O don ni o waati la, Israɛl bɔnsɔn ka tilenbaliya kow na ɲini, nka u tɛna ye. Juda bɔnsɔn ka jurumu na ɲini, nka jurumu tɛna ye a la, k'a masɔrɔ ne ye mɔgɔ minw kisi, ne na olu ka jurumuw yafa.»
[21] Matigi ko: «Jamana min murutira siɲɛ fila, aw ka taa o kama. Aw ka taa a ka mɔgɔw kama ka u tɔɔrɔ. Aw ka u nɔgɛn ka u faga ka u si tunun. Ne ye min fɔ, i ka o bɛɛ kɛ.
[22] Kɛlɛ mankan bɛ jamana kɔnɔ. Kojuguba sera mɔgɔ ma.
[23] Dugukolo bɛɛ ka marito karila ka tiɲɛn. Babilonɛ kɛra yɔrɔ lankolon ye siyaw cɛma cogo di?
[24] Ne tun ye jan da i ɲɛ, i minɛna o la. Babilonɛ, i minɛna k'a sɔrɔ i ma bɔ a seere ma. I yera ka i minɛ, sabu i ye Matigi kɛlɛ.»
[25] Matigi ye a ka kɛlɛkɛ minan bila yɔrɔ da yɛlɛ. A diminnen ye a ka kɛlɛkɛ minanw labɔ, k'a masɔrɔ Matigi, Kɛlɛbolow Matigi na a ka kɛwalew kɛ Kalde jamana kɔnɔ.
[26] Aw ka bɔ fan bɛɛ la ka na Babilonɛ kɛlɛ ka u ka jiginɛw da yɛlɛ ka fɛnw tonɲɔgɔn kan i ko sumankisɛw, ka u bɛɛ halaki ka u ban ka u si tunun.
[27] A ka ntura minw bɛ taa fagali yɔrɔ la, aw ka olu bɛɛ kan tigɛ. Bɔnɛ bɛ u ye sabu u ka don latigɛlen sera, u ka hakɛw sara tuma sera.
[28] «Mɔgɔ minw bɛ boli ka bɔ Babilonɛ ka taa Matigi an ka Ala ka dimiya labɔ kibaru fɔ a ka so cilen kosɔn Sion kulu kan, aw ka olu pɛrɛnkan lamɛn.
[29] Bonnikɛ kalatigiw ani minw bɛɛ bɛ kala sama cogo dɔn, aw ka olu bɛɛ wele Babilonɛ kama. A' ye daga sigi a da la k'a kɛlɛ. Aw kan'a to mɔgɔ si ka dan kɛ. Aw ka a sara ka kɛɲɛ ni a ka ko kɛlenw ye. A ye min kɛ, aw ka o bɛɛ juru sara a la, k'a masɔrɔ a wulila ni kuncɛbaya ye Matigi, Israɛl ka Senuma kama.»
[30] O de kosɔn Matigi ko: «A ka kamalenw na bi a fɛrɛkɛnɛw la. O don na a ka kɛlɛkɛ cɛw bɛɛ na halaki ka u ban.»
[31] Matigi, Kɛlɛbolow Matigi ko: «Siya kuncɛba, ne na ne mɔnɛbɔ i la, k'a masɔrɔ i ka tɔɔrɔ don sera, o ye i ka bɔnɛ don de ye.
[32] Dugu yɛrɛjiranci, i na talon ka bi. Mɔgɔ si tɛna i lawuli. Ne na tasuma tugu ka i ka duguw ni u laminiw bɛɛ jeni.»
[33] Kɛlɛbolow Matigi, Israɛl ka Ala ko: «Israɛl bɔnsɔn ni Juda bɔnsɔn kɛra mɔgɔ degunlenw ye. Minw taara ni u ye jɔnya la, olu bɛ u to ni u ye, u tɛ sɔn ka u bila ka taa.
[34] Nka u Kunmabɔbaa barika ka bon. O ye Kɛlɛbolow Matigi de ye. O bɛ u lafasa ka lafiya di dugukolo ma k'a to Babilonɛkaw ka yɛrɛyɛrɛ u ɲɛ.»
[35] Matigi ko: «Npan samana Kalde jamana kama. A samana Babilonɛ dugu ni a faamaw ni a hakilitigiw kama.
[36] Npan wulila kira nkalontigɛla hakilintanw kama. Npan wulila kɛlɛkɛ cɛ ja gɛlɛnw kama fo ka u ja tigɛ.
[37] Npan wulila u ka yɛlɛnkan sow ni u ka wotorow ni u ka siginfɛw kama. Olu bɛɛ kɛra i ko musow. Npan wulila nafolo mara yɔrɔ kama ka nafolo cɛ.
[38] Ja sera u ka ji woyo siraw ma ka olu ja, k'a masɔrɔ boliw ka jamana don. U ka bato fɛnw kɛra siranfɛnbaw ye fo ka u hakili tiɲɛn.
[39] «O de kosɔn kungo waraw ni kungo wuluw kɛra u sigiɲɔgɔnw ye. U ka yɔrɔ kɛra kɔnɔsɔgɔntiw sigi yɔrɔ ye. Mɔgɔ tɛna sigi Babilonɛ tun. A yɔrɔ lankolon na san caman kɛ.»
[40] Matigi ko: «Ni Ala ye Babilonɛ halaki tuma min na, mɔgɔ si tɛna sigi a kɔnɔ tun. A na kɛ i ko Sodɔmɛ ni Gomɔrɛ ni u lamini duguw halakira cogo min na.
[41] «Mɔgɔ dɔw natɔ filɛ ka bɔ saheli yanfan fɛ. Siyabaw ni masakɛ caman bɛ wuli ka bɔ dugukolo dan na.
[42] Kala ni tama bɛ u bolo, u ka farin, hinɛ si tɛ u la. U kan bɛ i ko kɔgɔji mankan, u yɛlɛlen bɛ sow kan. Babilonɛ dugu, u labɛnnen bɛ i kɛlɛli kama.
[43] Babilonɛ masakɛ ye o kibaru mɛn, a bolo kolow fagara, a ja tigɛra, tɔɔrɔba y'a sɔrɔ i ko muso tintɔ.
[44] «A na wuli ka taa sigi yɔrɔ barikama kama i ko waraba bɛ wuli ka bɔ Jurdɛn ba da la jiriw cɛma cogo min na. Ne ye jɔnɲɛnatɔmɔ ka nin kɛ, k'a masɔrɔ jɔn bɛ i ko ne? Jɔn bɛ se ka ne wele kiri la? Masakɛ jumɛn bɛ se ka wuli ne kama?»
[45] O de kosɔn Matigi ye ko min latigɛ Babilonɛ kama, ani a ko a na min kɛ Kaldekaw ka jamana la, aw ka o lamɛn sa. U na u sama ka taa ni u ye i n'a fɔ saga barikantanw. U na u sigi yɔrɔ lankolonya, siga t'a la.
[46] Dugukolo na yɛrɛyɛrɛ Babilonɛ dugu minɛkan kosɔn. Kulokanba na mɛn siyaw cɛma.