[1] Juda bɔnsɔn ka masakɛ Josiasi denkɛ Sedesiasi ka masaya daminɛ tuma la, Matigi ka kuma sera Jeremi ma,
[2] a ko: «I ka zuw ni u ka sirilanw dila ka olu da i kan na ka u siri.
[3] O kɔ, i ka u ci ka taa u di Edɔm masakɛ ni Moab masakɛ ani Amɔn bɔnsɔn ka masakɛ ni Tir masakɛ ni Sidɔn masakɛ ma lasigidenw bolo, olu minw nana Jerusalɛm Juda bɔnsɔn ka masakɛ Sedesiasi yɔrɔ.
[4] I k'a fɔ u ye ko u k'a fɔ kuntigiw ye ko Kɛlɛbolow Matigi, Israɛl ka Ala ko u k'a fɔ kuntigiw ye, ko:
[5] ‹Ne de ye dugukolo ni a kan fɛnw da ka Hadamadenw ni baganw da ni ne barikaba ni ne ka sebaaya ye. Min ka di ne ye, ne bɛ nin dugukolo di o ma.
[6] Ayiwa sisan, ne ye nin jamana di ne ka jɔnkɛ Babilonɛ masakɛ Nebukadnezar ma. Ne ye kungo sogow fana di a ma walisa olu ka kolo a ye.
[7] Dugukolo kan siyaw bɛɛ na baara kɛ ale ni a denkɛ ni a mɔdenkɛ ye fo ka taa a ka waati dafa. Ni o kɛra, ale yɛrɛ na baara kɛ siya caman ni masakɛbaw ye.
[8] ‹Ni siya dɔ wala masaya dɔ ma sɔn ka kolo Babilonɛ masakɛ Nebukadnezar ye, ni min ma sɔn ka o masakɛ ka zu da a kan na, ne na o siya gosi ni npan ni kɔngɔba ani fiɲɛbana ye fo ka taa u halaki ka u ban Nebukadnezar bolo.
[9] Ayiwa, ni aw ka kiraw ni aw ka filɛlikɛlaw ni aw ka dɔnbaaw ni sankolo taamashyɛn dɔnbaaw ni jinɛtigiw y'a fɔ ko aw tɛna kɛ Babilonɛ masakɛ ka jɔnw ye, aw kana olu lamɛn.
[10] K'a masɔrɔ u bɛ nkalon tigɛ aw ye u ka kiraya kumaw la, walisa aw ka gɛn ka bɔ aw ka jamana kɔnɔ ka taa yɔrɔ jan ka aw halaki.
[11] Nka ni siya min kolola Babilonɛ masakɛ ye ka baara kɛ a ye, ne n'a to o siya ka sigi a yɛrɛ ka jamana kɔnɔ ka sɛnɛ kɛ ka lafiya sɔrɔ yen.›» Matigi ko ten.
[12] Ne ye o kuma kelen fɔ Juda bɔnsɔn ka masakɛ Sedesiasi ye, ko: «Aw ka kolo Babilonɛ masakɛ ye ka baara kɛ ale ni a ka mɔgɔw ye. Ni o kɛra, aw ɲɛnama na to.
[13] Mun kosɔn i ni i ka mɔgɔw bɛ boli saya nɔ fɛ ka halaki npan ni kɔngɔba ani fiɲɛbana fɛ i ko Matigi y'a fɔ cogo min na ko, siya min ma sɔn ka kolo Babilonɛ masakɛ ye, o kow na kɛ o siya la.
[14] Aw ka kira minw b'a fɔ ko aw tɛna kɛ Babilonɛ masakɛ ka jɔnw ye, aw kana olu ka kuma lamɛn. Olu ye kira nkalontigɛlaw de ye.»
[15] Matigi ko: «Ne ma u ci, u ko u bɛ kuma ne tɔgɔ la, nka ne ma u ci nka u bɛ nkalon kiraya kɛ. Ni aw ye u lamɛn, aw ni o kira nkalontigɛlaw na halaki ɲɔgɔn fɛ.»
[16] Ne y'a fɔ sarakalasebaaw ni mɔgɔw bɛɛ fana ye, ko Matigi ko: «Kira minw b'a fɔ aw ye ko Matigi ka so kɔnɔ minanw na cɛ ka bɔ Babilonɛ sɔɔni, aw kana olu lamɛn. Olu ye kira nkalontigɛlaw de ye.
[17] Aw kana u lamɛn, aw ka kolo Babilonɛ masakɛ ye walisa aw ɲɛnama ka to. Mun kosɔn nin dugu ka kɛ tomon ye?
[18] Ni u ye kiraw ye, ni Matigi kumana u fɛ, u ka Kɛlɛbolow Matigi deli ko minan tɔ minw tora Matigi ka so kɔnɔ ani Juda bɔnsɔn ka masaya so kɔnɔ, olu kana cɛ ka bɔ Jerusalɛm ka taa Babilonɛ.
[19] Katuguni Kɛlɛbolow Matigi kumana nin samasenw ni ji faa belebeleba ni jusigilanw ani nin dugu kɔnɔ minan tɔ tolenw bɛɛ ko la,
[20] Babilonɛ masakɛ Nebukadnezar ye olu minw to yen, ni a ye Jojakim denkɛ Jekoniya, Juda ka masakɛ ani Juda ni Jerusalɛm mɔgɔ tɔgɔbaw bɛɛ cɛ ka bɔ Jerusalɛm ka taa n'u ye Babilonɛ tuma min na.
[21] Ɔwɔ, Kɛlɛbolow Matigi, Israɛl ka Ala y'a fɔ o minan tɔ tolenw ko la ko Matigi ka so kɔnɔ minanw ni Juda bɔnsɔn ka masaya so kɔnɔ minanw,
[22] olu na cɛ ka taa Babilonɛ. U na to yen fo ne ka taa u nɔ fɛ ko kura don min na.» Matigi ko: «Ne na u lasegin ka na nin yɔrɔ la tun.»