[1] Juda bɔnsɔn ka masakɛ Sedesiasi ka masaya daminɛ tuma la, o san naaninan kalo duurunan la, Azur denkɛ kira Hananiya min bɔra Gabaon, o y'a fɔ ne ye Matigi batosoba kɔnɔ sarakalasebaaw ni mɔgɔw bɛɛ ɲɛ na,
[2] ko Kɛlɛbolow Matigi, Israɛl ka Ala ko: «Ne ye Babilonɛ masakɛ ka zu kari.
[3] Ni san fila tɛmɛnna, Babilonɛ masakɛ Nebukadnezar ye Matigi ka so kɔnɔ minan minw cɛ ka bɔ u yɔrɔw la, ne bɛ na ni olu ye yan ka bɔ Babilonɛ.
[4] Jojakim denkɛ, Juda bɔnsɔn ka masakɛ Jekoniya ani Juda bɔnsɔn minw cɛra ka taa jɔnya la, ne na olu lasegin nin yɔrɔ la, k'a masɔrɔ ne na Babilonɛ masakɛ ka zu kari.» Matigi ko ten.
[5] O tuma la Jeremi ye kira Hananiya jaabi sarakalasebaaw ni mɔgɔw bɛɛ ɲɛ na Matigi batosoba kɔnɔ.
[6] Kira Jeremi y'a fɔ ko: «Amiina, Matigi ka o kɛ. I ye kiraya kuma min fɔ, Matigi ka o kɛ ka Matigi ka so kɔnɔ minanw ani mɔgɔ cɛlenw bɛɛ kɔsegin ka na yan ka bɔ Babilonɛ.
[7] O bɛɛ n'a ta, i ni mɔgɔw bɛɛ ka ne ka kuma lamɛn.
[8] Kira minw nana ne ni i ɲɛ kabini waati tɛmɛnnenw na, olu ye kiraya kɛ jamanabaw ni masaya barikamaw kama ka kɛlɛ ni bɔnɛ ni fiɲɛbana kow fɔ.
[9] Nka ni min bɛ hɛrɛ ko fɔ, ni o kira ka kuma fɔlen kɛra tuma min na, o tuma la mɔgɔw n'a dɔn ko Matigi ye o kira ci.»
[10] O tuma la kira Hananiya ye zu foni ka bɔ kira Jeremi kan na ka o kari.
[11] O kɔ, a y'a fɔ mɔgɔw bɛɛ ɲɛ na ko Matigi ko: «Ni san fila tɛmɛnna, ne na Babilonɛ masakɛ ka zu kari ka bɔ siyaw bɛɛ kan na nin cogo la.» O kɔ, Jeremi bɔra yen ka taa.
[12] Nka kira Hananiya ye Jeremi ka zu kari tuma min na, Matigi ka kuma sera Jeremi ma, ko:
[13] «I ka taa a fɔ Hananiya ye ko Matigi ko: ‹I ye jiri dɛsɛlen zuw kari nka i na nɛgɛ zuw bila u nɔ na.›
[14] K'a masɔrɔ Kelɛbolow Matigi, Israɛl ka Ala ko: ‹Ne ye nɛgɛ zu da nin siyaw bɛɛ kan na walisa u ka baara kɛ Babilonɛ masakɛ Nebukadnezar ye. U na baara kɛ a ye, hali kungo sogow na kolo a ye.›»
[15] O kɔ, kira Jeremi y'a fɔ kira Hananiya ye ko: «I ka i tulo majɔ, Hananiya. Matigi ma i ci, nka i y'a to mɔgɔw ka u jigi da nkalon kan.
[16] O de kosɔn Matigi ko: ‹Ne na i halaki ka bɔ dugukolo kan. I na saɲinan yɛrɛ, sabu i ye murutili kuma fɔ Matigi ma.›»
[17] Ayiwa kira Hananiya sara o san kalo wolonwulanan yɛrɛ la.